00:00:00 IGIHE NETWORK KN KINYARWANDA EN ENGLISH FR FRANCAIS

FC Barcelone izakina umukino ugamije kwibuka Diego Maradona

Yanditswe na Bukuru JC
Kuya 25 Ukwakira 2021 saa 11:20
Yasuwe :
0 0

Ikipe ya FC Barcelone yo muri Espagne yatangaje ko izakina na Club Atlético Boca Juniors yo muri Argentine ku wa 14 Ukuboza 2021 mu mukino wa gicuti wiswe “Maradona Cup” ugamije kwibuka no guha icyubahiro umunyabigwi Diego Armando Maradona nyuma y’umwaka umwe yitabye Imana.

Umunyabigwi w’umupira w’amaguru Diego Maradona wakiniye amakipe yombi, yitabye Imana ku wa 25 Ugushyingo 2020, afite imyaka 60, nyuma yo guhagarara k’umutima.

Mu rwego rwo kumwibuka no kumuha icyubahiro, FC Barcelone na Club Atlético Boca Juniors zizahurira mu mukino wa gicuti uzabera kuri Marsool Park yo mu mujyi wa Riyadh muri Arabie Saoudite, ukaba uzitabirwa n’abafana ibihumbi 25.

Maradona yabanje gukinira Boca Juniors mu mwaka w’imikino wa 1981/82, ayihesha kwegukana Shampiyona ya Metropolitano no kubona itike ya Copa Libertadores. Yayisubiyemo mu 1995, ayikinira imyaka ibiri mbere yo gusezera.

Muri FC Barcelone, yahakinnye imyaka ibiri hagati ya 1982 na 1984, agaragara mu mikino 58, aho yayifashije kwegukana ibikombe bitatu birimo icya Copa del Rey, Super Cup na League Cup itagikinwa.

Barça na Boca Juniors zahuye inshuro 10 mu bihe byashize ndetse inshuro iheruka ni ubwo zahatanira igikombe cya Joan Gamper mu 2018, aho FC Barcelone yatsinze ibitego 3-0.

Ni ku nshuro ya kabiri FC Barcelone izaba ikiniye muri Arabie Saoudite nyuma y’uko iki gihugu cyakiriye imikino ya nyuma ya Super Cup ya Espagne mu 2020 ndetse kikazongera kubikora muri Mutarama 2022.

Diego Maradona yakiniye FC Barcelone na Boca Juniors

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .