FC Barcelone iri mu makipe yatsinzwe byinshi na Cristiano Ronaldo wujuje ibitego 700

Yanditswe na Eric Tony Ukurikiyimfura
Kuya 15 Ukwakira 2019 saa 10:06
Yasuwe :
0 0

Rutahizamu wa Portugal, Cristiano Ronaldo yaraye yujuje ibitego 700 mu mukino ikipe y’igihugu cye yatsinzwemo na Ukraine ibitego 2-1 mu gushaka itike y’Igikombe cy’u Burayi cya 2020.

Ronaldo w’imyaka 34, yatsindiye Portugal kuri penaliti yo ku munota wa 72.

Iki gitego cyabaye icya 700 uyu mukinnyi atsinze kuva atangiye gukina nk’uwabigize umwuga ndetse hari mu mukino we wa 973, aho mu mikino 458 yagiye atsindamo igitego.

Cyari igitego cya 95 yatsindiye igihugu cye cya Portugal, aho kugeza ubu Umunya-Iran Ali Daei ari we umaze gutsindira igihugu cye ibitego byinshi, 109, kurusha abandi ku Isi.

Cristiano Ronaldo yateye ikirenge mu cy’ibindi bihanganye byabashije kugeza ibitego 700 mu mupira w’amaguru nk’uko bigaragazwa n’urubuga rwa Rec.Sport.Soccer Statistics Foundation.

Uyu mukinnyi usanzwe ukinira Juventus de Turin yo mu Butaliyani, aracyafite byinshi byo gukora kugira ngo azakureho agahigo k’Umunya-Repubulika ya Tchèque, Josef Bican watsinze ibitego 805.

Umunya-Brésil, Romario yatsinze ibitego 772 mu gihe mugenzi we Pelé atsinda ibitego 767.

Umunyabigwi wo muri Hongrie, Ferenc Puskás yatsinze ibitego 746 agikina naho Umudage Gerd Müller atsinda 735.

Muri ibi bitego 700 Ronaldo amaze gutsinda, 450 yabitsinze akinira Real Madrid naho 118 abitsinda ari muri Manchester United hagati ya 2003 na 2009.

Ibitego 95 amaze gutsindira Portugal byikubye kabiri iby’undi mukinnyi umukurikiye mu bakiniye iki gihugu. Pauleta umugwa mu ntege, yatsinze 47.

Andorra, Armenia, Latvia na Suède ni byo bihugu Ronaldo yaboneranye cyane, buri kimwe agitsinda ibitego bitanu mu gihe Estonia, Ibirwa bya Faroe, Hongarie, Lithuania, Luxembourg n’u Buholandi yabitsinze ibitego bine.

Cristiano Ronaldo nta gitego arinjiza mu izamu ry’ibihugu nk’u Bufaransa, u Budage, u Butaliyani n’u Bwongereza ku mugabane w’u Burayi.

Ku rwego rw’amakipe, Sevilla (27), Atlético Madrid (25), Getafe (23), Celta Vigo (20) na FC Barcelone (18) ni yo yatsinze ibitego byinshi kugeza ubu.

Cristiano Ronaldo afite uduhigo twihariye, turimo kuba ari we mukinnyi umaze gutsinda ibitego byinshi muri UEFA Champions League no muri Real Madrid, gukina imikino myinshi mu marushanwa y’u Burayi no gukinira igihugu cye imikino myinshi.

Akomeje guhangana na Lionel Messi, na we ugaragaza ko ari umwe mu bakinnyi beza u Burayi bufite kugeza ubu.

Igitego Ronaldo yatsinze Bayer Leverkusen muri Champions League, cyatumye ageza ibitego 605, arusha bibiri Lionel Messi ufite 603 kugeza ubu (ibyo bombi batsinze mu makipe bakinira ukuyemo ay’ibihugu).

Aba bombi banganya ibitego 419 ku mwanya wa mbere w’abamaze gutsinda ibitego byinshi muri shampiyona eshanu zikomeye i Burayi.

Ronaldo amaze gutsinda ibitego 422 muri Shampiyona, ariko ibitego bitatu yatsinze ubwo yakinira Sporting Lisbon iwabo muri Portugal, ntabwo bibarwa ku buryo yaba uwa mbere.

Cristiano Ronaldo akeneye gutsinda ibitego bine ku mukino wa nyuma wa UEFA Champions League kugira ngo akureho agahigo ka Puskás na Alfred di Stefano batsinze birindwi.

Akeneye kandi igitego mu mwaka utaha w’imikino w’iri rushanwa kugira ngo agere ku gahigo ka Ryan Giggs watsinze mu myaka 16 ya Champions League yikurikiranya.

Cristiano Ronaldo yaraye atsinze igitego cya 700
Ronaldo na Messi bafatwa nk'abeza kugeza ubu,baracyafite byinshi basabwa kugira ngo bagere ku barimo Josef Bican

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza