Europa League: Inter Milan yanyagiye Shakhtar Donetsk isanga Seville ku mukino wa nyuma

Yanditswe na Eric Tony Ukurikiyimfura
Kuya 17 Kanama 2020 saa 11:55
Yasuwe :
0 0

Inter Milan yasanze Seville FC ku mukino wa nyuma wa Europa League nyuma yo kunyagira Shakhtar Donetsk ibitego 5-0.

Ikipe ya Inter Milan yo mu Butaliyani yandagaje Shakhtar Donetsk iyitsinda ibitego bitanu ibifashijwemo n’abarimo Romelu Lukaku mu mukino wabaye kuri uyu wa Mbere, tariki ya 17 Kanama 2020.

Uyu mukino umwe wa ½ wabereye muri Dusseldörf, wahiriye Inter Milan yafunguye amazamu ku munota wa 19 ku gitego cyatsinzwe na Lautaro Martínez ubwo umunyezamu Andry Pyatov yakuragamo umupira watewe na Nicolo Barella.

Nyuma yo gusoza igice cya mbere nta zindi mpinduka zibaye, Danilo D’Ambrosio yatsinze igitego cya kabiri cya Inter Milan n’umutwe ku mupira wari uvuye muri koruneri yatewe na Marcelo Brozović ku munota wa 60.

Lautaro Martínez yatsinze icya gatatu ku munota wa 74 mbere y’uko Romelu Lukaku atsinda ibindi bitego bibiri ku munota wa 78 n’uwa 84.

Uyu rutahizamu w’Umubiligi, Lukaku, yatsinze mu mikino 10 yikurikiranya ya Europa League mu gihe yujuje ibitego 33 muri uyu mwaka w’imikino.

Uburyo bumwe bukomeye Shakhtar Donetsk yabonye muri uyu mukino, byarangiye bupfushijwe ubusa Junior Morães wateye umupira kuri Samir Handanović nyamara yashoboraga kwishyurira ikipe ye.

Inter Milan itarabashije kwegukana igikombe cya Shampiyona y’u Butaliyani, izahatanira icya Europa League ku mukino wa nyuma uzayihuza na Seville ku wa Gatanu tariki ya 21 Kanama 2020.

Iyi kipe yo mu Butaliyani iheruka kwegukana igikombe icyo aricyo cyose mu 2011.

Taison watsinze ibitego 11 mu mikino 37 uyu mwaka, ntacyo yafashije Shakhtar Donetsk uyu munsi
Luis Castro utoza Shakhtar yereka abakinnyi be uko bakina
Antonio Conte yagejeje Inter Milan ku mukino wa nyuma wa Europa League
Lautaro Martinez na Romelu Lukaku batsinze ibitego bibiri kuri buri umwe
D'Ambrosio yishimira igitego cya kabiri yatsindiye Inter Milan
Lukaku yatsinze igitego muri buri mukino, mu 10 aheruka gukina muri Europa League
Inter Milan izahura na Seville ku mukino wa nyuma uzaba ku wa Gatanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .