Europa League: Arsenal na Manchester United zageze mu kindi cyiciro ziyoboye amatsinda (Amafoto)

Yanditswe na Eric Tony Ukurikiyimfura
Kuya 13 Ukuboza 2019 saa 07:44
Yasuwe :
0 0

Imikino isoza amatsinda ya Europa League yabaye kuri uyu wa Kane, yasize amakipe atatu ahagarariye u Bwongereza; Manchester United, Arsenal na Wolves yose abonye itike ya 1/16.

Arsenal yari yerekeje mu Bubiligi, aho yakiriwe na Standard Liège, yasabwa byibuze inota rimwe kugira ngo yizere kubona itike cyangwa kudatsindwa ibitego biri hejuru ya bitatu.

Eintracht Frankfurt yo mu Budage yari ihanganiye umwanya wa mbere na Arsenal mu itsinda F, yatsinzwe na Vitória Guimarães yo muri Portugal ibitego 3-2, bituma Arsenal yanganyije na Standard de Liège ibitego 2-2 iyobora itsinda.

Arsenal yabanjwe ibitego bibiri byatsinzwe na Samuel Bastien na Salem Asmalla mbere y’uko Alexander Lacazette na Bukayo Saka bayishyurira, izamuka iyoboye itsinda n’amanota 11.

Mu Bwongereza, Manchester United yasabwaga inota rimwe kugira ngo yizere kuzamuka ari iya mbere mu itsind L, yanyagiye AZ Alkmaar yo mu Buholandi ibitego 4-0 byatsinzwe na Ashley Young, Juan Mata kuri penaliti na Mason Greenwood watsinze ibitego bibiri. Ibi bitego byose uko ari bine, byabonetse mu gice cya kabiri.

Mason Greenwood yabaye umukinnyi wabashije gutsinda ibitego bibiri mu mukino umwe akiri muto mu mateka ya Manchester United, akuyeho agahigo kari gafitwe na Marcus Rashford.

Wolverhampton Wanderers nayo yazamutse ku mwanya wa kabiri mu itsinda K yari iherereyemo, nyuma yo gutsinda Beskitas ibitego 4-0 birimo bitatu bya Diogo Jota wahise unakora amateka ko ariwe mukinnyi watsinze ibitego bitatu mu gihe gito mu mateka ya Europa League [iminota icyenda n’amasegonda 38]. Ikindi gitego cyatsinzwe na Leander Dendocker.

Tombola y’uburyo amakipe azahura muri 1/16 cya Europa League iteganyijwe kuwa Mbere tariki ya 16 Ukuboza 2019.

Amakipe yose yageze muri 1/32 cya Europa League

Amakipe yazamutse ayoboye amatsinda ni: Sevilla (Espagne), Malmo (Suède), FC Basel (Swisse), LASK Linz (Autriche), Celtic Glassgrow (Equose), Arsenal (Mu Bwongereza), FC Porto (Portugal), Espanyol (Espagne), KAA Gent (Mu Bubiligi), Istanbul Basaksehir (Turquie), Sporting Braga (Portugal) na Manchester United (Mu Bwongereza).

Amakipe yazamutse nk’aya kabiri mu matsinda ni: Apoel Nicosia (Chypre), FC Kobenhavn (Denmark), Getafe (Espagne), Sporting CP (Portugal), CFR Cluj (Romania), Eintracht Frankfurt (Mu Budage), Rangers (Equose), Ludogorets (Bulgarie), Wolfsburg (Mu Budage), AS Roma (Mu Butaliyani), Wolves (Mu Bwongereza) na AZ Alkmaar (Mu Buholandi)

Hari kandi amakipre umunani yavuye muri Champions League ari yo Shakhtar Donetsk (Ukraine), Inter Milan (mu Butaliyani), Club Brugge (Mu Bubiligi), Olympiacos (Mu Bugereki), Leverkusen (Mu Budage), Red Bul Salzburg (Serbie), Benfica Lisbon (Portugal) na Ajax Amsterdam (Mu Buholandi).

Oussama Idrissi ari mu babonye uburyo bwiza ku ruhande rwa AZ Alkmaar, agorwa n'abarimo Axel Tuanzebe
Nemanja Matic utaherukaga gukina, yari yahawe umwanya
Anthony Martial ahanganye na Jordy Clasie wigeze gukina mu Bwongereza
Ashley Young yishimira igitego cya mbere cya Manchester United
Manchester United yahawe penaliti ku ikosa ryakorewe kuri Greenwood
Juan Mata atera penaliti yavuyemo igitego cya gatatu
Mata na Greenwood bishimira igitego cya gatatu
Mason Greenwood atsinda igitego cya kane ku ishoti yatereye mu rubuga rw'amahina
Greenwood yishimira igitego cya kane yatsindiye Manchester United muri uyu mukino
Uyu musore w'imyaka 18 ashimirwa na bagenzi be
Ole Gunnar Solskjaer utoza Manchester United yari yaruhukije bamwe mu bakinnyi
Oussama Idrissi ari mu babonye uburyo bwiza ku ruhande rwa AZ Alkmaar, agorwa n'abarimo Axel Tuanzebe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza