00:00:00 IGIHE NETWORK KN KINYARWANDA EN ENGLISH FR FRANCAIS

Euro 2020: Ikipe eshatu zirimo u Bubiligi zageze muri 1/8 (Amafoto)

Yanditswe na Habimana Sadi
Kuya 18 Kamena 2021 saa 07:03
Yasuwe :
0 0

Nyuma y’imikino ibiri y’irushanwa ry’igikombe cy’i Burayi, amakipe y’ibihugu atatu arimo u Bubiligi, u Butaliyani n’u Buholandi yamaze gukatisha itike yo kuzakina imikino ya 1/8 cy’irangiza muri iri rushanwa.

Ku wa Kane Tariki ya nibwo hakinwaga imikino ya kabiri yo mu itsinda rya kabiri (B) n’irya gatatu (C). Mu itsinda rya kabiri habaye umukino umwe gusa wahuje u Bubiligi na Denmark.

Ikipe y’Igihugu ya Denmark yabanje igitego cyatsinzwe na Yussuf Poulsen ku munota wa kabiri gusa ku mupira mwiza yari ahawe na Pierre-Emile Hoejbjerg.

Nyuma yo kubona igitego, Denmark yakomeje kugicunga ihagarara neza mu bwugarizi bwayo bituma iminota 45 irangira u Bubiligi butabonye izamu ngo bwishyure igitego bwari bwatsinzwe.

Bakigaruka mu gice cya kabiri, u Bubiligi bwahise busimbuza havamo Dries Martens. Eden Hazard we asimbura Yannick Carrasco. Aba bombi basabwaga kongera imbaraga mu busatirizi bw’u Bubiligi.

Ntabwo byafashe u Bubiligi iminota myinshi kuko ku munota wa 55 gusa bwari bubonye igitego cyo kwishyura cyatsinzwe na Thorgan Hazard ku mupira mwiza yari ahawe na Kevin De Bruyne.

Nyuma yo kubona igitego cyo kwishyura, u Bubiligi bwahise butangira kwiharira umupira biciye ku bakinnyi barimo Y.Tielemans, Thorgan Hazard na Thomas Meunier.

Uku gukomeza kwiharira umupira cyane ku ruhande rw’u Bubiligi, kwatumye bubona igitego cya kabiri cyatsinzwe na Kevin De Bruyne ku munota wa 70 ku mupira mwiza yari ahawe na Eden Hazard. Byatumye u Bubiligi buhita buyobora umukino kuva ubwo.

Abasore barimo nka Romelu Lukaku nubwo atatsindiye igitego ikipe ye y’Igihugu, ariko ni umwe mu bagize uruhare rukomeye muri iyi ntsinzi.

U Bubiligi bwongeye gukora impinduka ku munota wa 59 ubwo havagamo L. Dendoncker agasimburwa na Axel Witsel. Ikipe y’Igihugu ya Denmark yo yasimbuje Yussuf Poulsen ku munota wa 61wasimbuwe na Christian Noergaard, mu gihe kuri uwo munota n’ubundi Daniel Wass yasimbuwe na Jens Stryger Larsen, hanyuma Thomas na Jannik Westergaard basimbuwe na Mathias Jansen na Andreas Skov Olsen.

Izi mpinduka zose Denmark yakoze nta kinini zayifashije kuko umukino warangiye u Bubiligi bwegukanye intsinzi y’ibitego bibiri kuri kimwe. U Bubiligi bwo bwongeye gukora impinduka ku munota wa 90 ubwo bwakuragamo Thorgan Hazard wasimbuwe na Thomas Vermaelen. Romelu Lukaku w’u Bubiligi ni we wahembwe nk’umukinnyi witwaye neza mu mukino kurusha abandi.

Iyi ntsinzi y’u Bubiligi yahise ituma iyi kipe igera muri 1/8 cy’irangiza, ihasanga u Butaliyani bwabigezeho butsinze u Busuwisi ibitego bitatu ku busa.

Hahise hakurikiraho imikino ibiri yo mu itsinda rya Gatatu (C). Ikipe y’Igihugu ya Ukraine ibifashijwemo na Andriy Yarmolenko (29‘) na Roman Yaremchuk (34‘) yatsinze Macedonia ibitego bibiri kuri kimwe.

Undi mukino wo mu Itsinda rya Gatatu wakurikiyeho, ni uwahuje u Buholandi na Autriche. Wabereye kuri Stade Johan Cruijff Arena. Wari umukino wihutaga ariko u Buholandi bukanyuzamo bugakinira ku izamu rya Autriche kuko bwari bufite inyota yo kubona igitego.

Imibare yaje kuba mibi kuri Autriche ubwo u Buholandi bwatsindaga igitego cya mbere, kuri Penaliti yatewe neza na Mephis Depay ku munota wa 11. Nyuma yo gutsinda igitego, Mephis Depay yahushije ubundi buryo bwari bwabazwe ku mupira mwiza yahawe na Georginio Wijnaldum ku munota wa 37. Iminota 45 yarangiye u Buholandi buri imbere n’igitego kimwe ku busa bwa Autriche.

Mu gice cya kabiri cy’umukino, u Buholandi n’ubundi bwari buri hejuru, biciye cyane cyane kuri kapiteni wabo, Georginio Wijnaldum wakinaga ajyana imipira imbere.

Uku gukomeza gusatira cyane izamu rya Autriche, byavuyemo igitego cya kabiri cy’u Buholandi cyatsinzwe na Denzel Dumfries ku munota wa 67, ku mupira mwiza wari uzamukanywe na Donyell Malen maze ageze imbere y’izamu arawumuha undi nawe ntiyatinzamo ahita awushyira mu rushundura.

U Buholandi bwasimbuje abakinnyi batanu, havamo Delay Blind (64‘) asimburwa na Nathan Ake, Wout Weghorst (64‘) asimburwa na Donyell Malen, Patrick Van Aanholt (65‘) asimburwa na Owen Wijndal, Marten de Roon (74‘) asimburwa na Ryan Gravenberch na Mephis Depay (82‘) wasimbuwe na Luuk de Jong.

Autriche nayo yasimbuje abakinnyi batanu, havamo Konrad Laimer (61‘) asimburwa na Florian Grillitsch, M.Gregoritsch (62‘) asimburwa na Sasa Kalajdzic, C.Baumgartner (70‘) asimburwa na Valentino Lozaro na A. Gragovic (84‘) wasimbuwe na Philip Lienhart, mu gihe Xaver Schlager (84‘) yasimbuwe na Karim Onisiwo.

Mu minota 90, u Buholandi bwasoje umukino bufite 48% mu guhererekanya umupira (Ball Possession) mu gihe Autriche yari ifite 52%. U Buholandi bwateye amashoti atatu ajya mu izamu mu gihe Autriche yateye ishoti rimwe.

Ibi byatumye u Buholandi nabwo bwiyongera ku Bubiligi n’u Butaliyani, ziba ikipe eshatu za mbere zikatishije itike ya 1/8 cy’irangiza n’amanota atandatu ku yandi.

Mu itsinda rya Kabiri (B), u Bubiligi ni ubwa mbere n’amanota 6 mu mikino ibiri, bugakurikirwa n’u Burusiya n’amanota atatu mu mikino ibiri, Finland igakurikira n’amanota atatu mu gihe Denmark yo yamaze gusezererwa nyuma yo gutsindwa imikino ibiri ibanza ikaba inafite umwenda w’ibitego bibiri.

Mu itsinda rya Gatatu ho u Buholandi burayoboye n’amanota atandatu, Ukraine igarukira n’amanota atatu, Autriche igakurikira n’amanota atatu nayo, mu gihe Macedoni yatsinzwe imikino ibiri yose ikaba irimo n’umwenda w’ibitego bitatu.

Yussuf Poulsen niwe wafunguye amazamu ku ruhande rwa Denmark
Lukaku ubwo yahoberanaga n'umukinnyi wa Denmark mu mukino
Ubwo Denmark yishimiraga igitego yari imaze gutsinda
Kevin De Bruyne ubwo yari amaze kubonera ikipe y'u Bubiligi igitego cy'intsinzi
Lukaku na De Bruyne bafashije u Bubiligi
Ubwo Kevin De Bruyne yahaga umupira wavuyemo igitego Thorgan Hazard
Thorgan Hazard niwe watsindiye u Bubiligi igitego cyo kwishyura
Nk'ibisanzwe Lukaku yafashije u Bubiligi kubona amanota atatu
Lukaku yabaye umukinnyi witwaye neza mu mukino aranabihemberwa
Mephis Depay yinjije penaliti neza u Buholandi bwabonye ku munota wa 11
Yahise ajya kwishimira igitego yari atsindiye ikipe ye
Mephis Depay ubwo yaganaga ku ntebe y'abasimbura kwishimira igitego
U Buholandi bwahise bubona itike ya 1/8 cy'irangiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .