00:00:00 IGIHE NETWORK KN KINYARWANDA EN ENGLISH FR FRANCAIS

Eto’o na Messi basabye indege, Ronaldinho ntiyatanye n’akabyiniro: Ingingo zikomeye mu masezerano y’abakinnyi

Yanditswe na Byiringiro Osée Elvis
Kuya 26 Nzeri 2022 saa 06:42
Yasuwe :

Iyo udasabye, ntuhabwa! Ibi bishobora kuba byari mu mutwe wa Lionel Messi ubwo yaganiraga na FC Barcelona ku kumwongerera amasezerano mu 2020.

Ibikubiye mu busabe bwa Messi bwashyizwe ku karubanda n’itangazamakuru ryo muri Espagne mu cyumweru gishize, ryerekana ko uyu mukinnyi ukomoka muri Argentine yifuzaga ko umuryango we n’uwa mugenzi we Luis Suarez ihabwa ahantu hihariye izajya irebera umukino muri Nou Camp, Stade ya FC Barcelone.

Messi yanasabye guhabwa miliyoni 8.7£ yo gusinyishwa amasezerano mashya, inyongera ya 10% ku mushahara wa 2021-22 n’uwa 2022-23 hongereweho inyungu ya 3% ndetse n’indege yihariye izajya ijyana umuryango we muri Argentina mu biruhuko bya Noheli.

Uyu rutahizamu ariko si we mukinnyi wa ruhago wasabye ibintu bihambaye ashaka kongera amasezerano mu ikipe ye.

Sportsmail yakoze urutonde rw’abakinnyi 10 basabye ibintu birimo ibihambaye n’ibisekeje mu makipe bashaka kwerekezamo cyangwa kongeramo amasezerano.

Iyo winjiye mu masezerano y’abakinnyi mu bihugu byateye imbere, kenshi usanga hari ibiba biyakubiyemo ‘Clause’ bigomba kuganirwaho n’impande zombi.

  Lionel Messi

Ku wa Kabiri, tariki 20 Nzeri 2022, Ikinyamakuru cyandikirwa muri Espagne El Mundo cyahishuye ibyo Messi yasabaga kugira ngo yongere amasezerano ye muri FC Barcelona mu 2020.

Mu ngingo yasabaga gushyira mu masezerano harimo guhabwa ahantu hihariye kandi hiyubashye umuryango we n’uwa Luis Suarez [Umunya-Uruguay bakinanaga] izajya irebera imikino yabereye kuri Stade ya FC Barcelone, Camp Nou.

Yanasabye guhabwa indege yihariye izajya ijyana umuryango we wose muri Argentine mu biruhuko bya Noheli.

Ibi byiyongeraho guhabwa inyongera ya miliyoni 10 z’amayero yo kumusinyisha, kumugenera inyungu ya 3% ku mafaranga yakaswe mu gihe cya COVID-19.

Uyu mugabo wegukanye Ballon d’Or zirindwi kandi yari yasabye ko ikipe yamushaka yazamugura £8,700 aho kuba miliyoni £610 nkuko Barcelona yabyifuzaga.

Ikipe yemeye ubusabe bwe ariko kuri iyi ngingo yo kugabanya agaciro k’amafaranga azagurwa gatuma impande zombi zinanirana, yerekeza muri Paris Saint Germain yo mu Bufaransa mu mpeshyi ya 2021.

Lionel Messi yasabye FC Barcelone guhabwa indege izajya ijyana umuryango we mu biruhuko bya Noheli muri Argentine buri mwaka

  Mauro Icardi

Mu mpeshyi y’uyu mwaka ni bwo Rutahizamu ukomoka muri Argentine Mauro Icardi yerekeje muri Turikiya mu Ikipe ya Galatasaray.

Umugore we Wanda Nara ni we ushinzwe kumushakira amakipe. Mu biganiro na Galatasaray, yasabye ibintu bitandatu birimo guhabwa umutetsi n’umushoferi bihariye ndetse n’inzu icungirwa umutekano mu buryo bwihariye.

Umugore wa Mauro Emanuel Icardi Rivero yasabye kuba muri hotel kugeza mu Ukuboza ndetse abana be bakishyurirwa amashuri mu gihe cyose uyu muryango uzamara muri Turikiya.

Mauro Icardi yasabye Galatasaray umutetsi n'umushoferi bihariye

  Moise Kean

Moise Kean ni rutahizamu w’Umutaliyani wazamukiye mu Ikipe ya Juventus.

Se witwa Biorou yasabye Juventus kubagurira imashini yo kubahingira mu mirima bafite muri Côte d’Ivoire.

Byavuzwe ko Juventus yemeye ubusabe bwa Biorou ariko iza kongera kwinjira mu masezerano n’umukinnyi atarimo imashini zihinga.

Juventus yagurishije Kean kuri miliyoni 27.5£ muri Everton mu 2019 ariko iza kumwisubiza nk’intizanyo y’iyi kipe yo mu Butaliyani kugeza mu 2024.

Moise Kean yasabye Juventus kugurira se imashini ihinga

  Emmanuel Adebayor

Rutahizamu w’Umunye-Togo Emmanuel Sheyi Adebayor yakiniye amakipe atandukanye arimo AS Monaco, Arsenal FC, Tottenham Hotspur, Manchester City na Real Madrid.

Mu 2016, Lyon yashatse kumusinyisha ariko ayisaba kumuha inzu, indege yihariye no kwambara nimero 10 yambarwaga na rutahizamu iyi kipe yagenderagaho icyo gihe Alexandre Lacazette.

Byaje kurangira Lyon ibyanze, gahunda ipfa ityo Adebayor ajya muri Istanbul Basaksehir yo muri Turikiya.

Emmanuel Adebayor yasabye Lyon guhabwa imodoka yihariye no kwambara nimero 10

  Neymar

Neymar da Silva Santos Júnior yageze muri FC Barcelone afite imyaka 21, yari umwana utanga icyizere, afatwa nk’umusimbura wa Ronaldo na Ronaldinho.

Mu masezerano ye yasabye ikipe kujya itegera inshuti ze buri mezi abiri ziva Brazil zigana i Catalonia muri Espagne kumusura.

Byari bigoye ko FC Barcelone yabyanga mu gihe yari imuhanganiye na mukeba wayo Real Madrid.

Neymar yasabye FC Barcelone kujya itegera inshuti ze buri mezi abiri indege zikamusura muri Espagne zivuye muri Brazil

  Ronaldinho

Abenshi mu barebye Ronaldinho akina bemeza ko ari mu bakinnyi beza Isi yagize. Byaje no gushimangirwa na Ballon d’Or yatwaye mu 2005 ndetse yanahesheje FC Barcelone Champions League.

Mu 2011 yasubiye muri Flamengo y’iwabo muri Brazil. Icyo gihe mu masezerano ye yasabye kujya ahabwa uruhushya rwo kujya mu kabyiniro kabiri mu cyumweru.

Muri uwo mwaka w’imikino yatsinze ibitego 19 mu mikino 44 yakiniye Flamengo.

Ronaldinho yasabye Flamengo guhabwa uruhushya rwo kujya mu kabyiniro kabiri mu kwezi

  Paul Gascoigne

Gascoigne yari umukinnyi ukomeye mu myaka ya za 80, ubwo Tottenham yashakaga kumugura, mu masezerano ye yasabye ko ikipe igurira se umubyara inzu n’imodoka bishya no kugurira mushiki we igitanda kimeze nka bimwe byifashishwa ku bwogero, iyo abahagannye bari kota izuba.

Byari ibintu bitangaje muri iyi myaka ariko Tottenham ntiyazuyaje mu kwibikaho umwe mu bakinnyi bari bakomeye icyo gihe.

Paul Gascoigne yasabye Tottenham kugurira se inzu n'imodoka nshya

  Samuel Eto’o

Samuel Eto’o Fils yari umwe muri ba rutahizamu bakomeye mu myaka ya 2011 kumanura.

Uyu mugabo mbere yo kwerekeza mu Burusiya muri Anzhi Makhachkala mu 2011, hari icyo yisabiye iyi kipe.

Iyi kipe yabarizwaga mu Mujyi wa Dagestan mu bilometero 2000 uvuye mu Murwa Mukuru Moscow kandi ni ho Eto’o yashakaga kuba.

Mu masezerano ye yasabye guhabwa indege yihariye yo kumujyana Dagestan imukuye i Moscow buri gitondo muri gahunda z’ikipe.

Anzhi yemeye ubusabe bwe ndetse Eto’o ukomoka muri Cameroun yayikiniye imyaka ibiri.

Samuel Eto'o yasabye indege yihariye izajya imujyana mu myitozo ubwo yashakaga kwerekeza muri Anzhi Makhachkala mu 2011

  Keisuke Honda

Honda yamenyekanye mu Ikipe ya AC Milan mbere y’uko mu 2020 yerekeza muri Botafogo yo muri Brazil.

Uyu musore yasabye iyi kipe kumuha imodoka itabasha kwinjirwamo n’amasasu (Bulletproof) n’abamucungira umutekano mu gihe ari gutembera i Rio de Janeiro.

Ikipe yarabyemeye gusa ntiyahatinze kuko yakinnye imikino 27 gusa mbere yo kurekurwa.

Keisuke Honda yasabye Botafogo guhabwa imodoka idashobora gutoborwa n'amasasu

  Giuseppe Reina

Giuseppe ni Umudage wakiniye amakipe nka Arminia Bielefeld na Borussia Dortmund.

Mu 1996 mbere yo kwerekeza muri Arminia Bielefeld yasabye iyi kipe kujya imugurira inzu buri mwaka.

Ikipe yarabyemeye ubundi babana imyaka itatu mbere yo kwerekeza muri Dortmund mu 1999.

Umudage Giuseppe yasabye Arminia Bielefeld kujya imugurira inzu buri mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .