Uyu mukino wabereye kuri Stade Umuganda i Rubavu kuri uyu wa Kane, tariki ya 22 Ukuboza 2022. Etincelles FC yawakiriye, yari imaze iminsi yitwara ndetse na APR FC byari uko, dore ko zombi ziheruka gutsinda Rayon Sports.

Umutoza Ben Moussa wasigaranye APR FC, yasabwe gukora impinduka hakiri kare ubwo Kapiteni we, Manishimwe Djabel, yavunikaga ku munota wa 15, asimburwa na Ishimwe Anicet.

APR FC itaremaga uburyo bwinshi, yafunguye amazamu ku munota wa 27 ku gitego cyatsinzwe na Bizimana Yannick kuri koruneri yatewe na Niyibizi Ramadhan.

Etincelles FC yagerageje gushaka uburyo bwo kwishyura iki gitego, ariko abakinnyi barimo Ciza Hussein, Mudeyi Sulaiman, Niyonkuru Sadjati na rutahizamu Sumaila Moro bagorwa n’ubwugarizi bwa APR FC.

Mu minota ya mbere y’igice cya kabiri, Ikipe y’Ingabo yabonye ubundi buryo gusa abarimo Niyibizi Ramadhan na Bizimana Yannick bananirwa kububyaza umusaruro.

Etincelles FC yasatiriye cyane mu gice cya kabiri, yishyuye igitego ku munota wa 71 gitsinzwe Sumaila Moro n’umutwe, ni ku mupira yahinduriwe na Rutayisire Amani.

APR FC yagerageje gushaka uko ibona igitego cy’intsinzi mu minota yari isigaye ari na ko yakoze impinduka zitandukanye aho Ishimwe Fiston yasimbuye Niyibizi Ramadhan na Mugunga Yves agasimbura Bizimana Yannick, ariko ntibyagize icyo bitanga, umukino urangira ari 1-1.

Kunganya uyu mukino byatumye APR FC ifata umwanya wa kabiri n’amanota 28 n’ibitego umunani izigamye, ni mu gihe Rayon Sports zinganya amanota izigamye ibitego birindwi. Zombi zirushwa amanota abiri na AS Kigali ya mbere.

Gahunda y’Umunsi wa 15 wa Shampiyona

Ku wa Gatatu, tariki ya 21 Ukuboza 2022

• Sunrise FC 2-1 AS Kigali

• Musanze FC 1-2 Police FC
• Espoir FC 0-1 Gorilla FC
• Rwamagana City 2-1 Mukura VS
• Rutsiro FC 2-1 Bugesera FC

Ku wa Kane, tariki ya 22 Ukuboza 2022

• Etincelles 1-1 APR FC

Ku wa Gatanu, tariki ya 23 Ukuboza 2022

• Marines FC vs Kiyovu Sports (15:00)
• Rayon Sports vs Gasogi United (18:00)

Abakinnyi 11 babanje mu kibuga ku ruhande rwa Etincelles FC

Abakinnyi 11 babanje mu kibuga ku ruhande rwa APR FC

Abakapiteni b'amakipe yombi bafashe ifoto y'urwibutso bari kumwe n'abasifuzi bayoboye umukino

Ishimwe Anicet agerageza gucenga abakinnyi ba Etincelles FC

APR FC yafunguye amazamu ku munota wa 27 w'umukino

Abakinnyi ba APR FC bishimira igitego

Chairman wa APR FC, Lt Gen Mubarakh Muganga (iburyo), yakurikiye uyu mukino

Perezida wa Etincelles FC, Ndagijimana Enock, yakurikiye uko ikipe ye yitwara

Umutoza wa Marines FC, Yves Rwasamanzi, na we yakurikiye uyu mukino

Ushinzwe Igura n'Igurisha ry'Abakinnyi n'Abatoza ba APR FC, Mupenzi Eto'o, yarebye uyu mukino

Sumaira Moro ari muri ba rutahizamu bamaze kwigaragaza neza

Etincelles FC iri kwihagararaho ku mikino yakirira kuri Stade Umuganda

Abakinnyi ba Etincelles FC bishimira igitego

Moro Sumaila yatsindiye Etincelles FC igitego kimwe yabonye muri uyu mukino

Moro Sumaila [15] na Niyonsenga Ibrahim bishimira igitego cya Etincelles FC cyo kwishyura

Aba byabasabye kurebera umukino bicaye mu giti hejuru

Abafana ba APR FC baherekeje ikipe yabo ari benshi

Bamwe byabasabye kurira stade ngo barebe umukino bari ahirengeye

Ishimwe Anicet winjiye mu kibuga asimbuye yagaragaje ko ari umukinnyi mwiza

Bizumuremyi Radjab utoza Etincelles FC areba uko abakinnyi be bitwara

Abakinnyi ba Kiyovu Sports bitegura umukino wa Marines FC ku wa Gatanu, tariki ya 23 Ukuboza 2022, bakurikiye umukino wa Etincelles FC na APR FC

Kwitonda Alain "Bacca" yagerageje gushaka igitego ariko biranga

Iminota itanu yongeweho ntacyo yatanze

Kwitonda Alain "Bacca" yagerageje biranga

Umutoza Ben Moussa wasigaranye APR FC, nta kanya ko gutakaza yashakaga gutanga

Ombolenga Fitina ukinira APR FC agerageza gucenga umukinnyi wa Etincelles FC

Amafoto: Ntare Julius

Video: Byiringiro Ephter