Etincelles FC vs APR FC: Amakuru avugwa mu makipe yombi mbere y’umukino

Yanditswe na Eric Tony Ukurikiyimfura
Kuya 18 Mutarama 2020 saa 10:56
Yasuwe :
0 0

Etincelles FC irakira APR FC mu mukino w’umunsi wa 18 wa Shampiyona ubera kuri Stade Umuganda i Rubavu kuri uyu wa Gatandatu saa Cyenda.

Iyi kipe y’i Rubavu iri ku mwanya wa cyenda n’amanota 21 mu gihe APR FC itaratsindwa, iyoboye Shampiyona n’amanota 41 mu mikino 17 imaze gukinwa.

Etincelles FC iheruka gutsinda APR FC muri Mata 2016, igitego 1-0 ndetse mu mikino 21 iheruka guhuza amakipe yombi, ikipe y’ingabo yatsinzemo 16, zombi zinganya imikino ine.

Etincelles FC rakina uyu mukino idafite myugariro wayo ngenderwaho, Rucogoza Aimable ‘Mambo’, wabonye ikarita itukura ku mukino uheruka kubahuza na Heroes FC ndetse na rutahizamu Mumbele Saiba Claude ufite ikibazo cy’ibyangombwa bye bimwemerera gukorera mu Rwanda byarangiye.

Visi Perezida wa Etincelles FC, Gafora Abdulkalim, avuga ko bakaniye uyu mukino ku buryo biteguye gutsinda APR FC kugeza ubu itaratsindwa mu mikino 17 imaze gukinwa.

Ati ‘’Kambale natabona igitego Mutebi azakibona. Mutebi natakibona, Kaburuta azakibona, na we natakibona Kibonge azakibona cyangwa undi mukinnyi wa Etincelles azakibona. Icyo dushaka ni uko uyu mukino tugomba kuwutsinda byanze bikunze.’’

‘’APR FC ntabwo iratsindwa ariko ndakubwiza ukuri turayitsindira kuri iki kibuga, Umuganda. Nta kintu na kimwe tutakoze, ariko umukino wa APR dushaka kuwutsinda, uzambwira umukino urangiye.’’

Abakunzi ba Etincelles bavuga ko banyotewe no gutsinda ikipe ya APR FC, ibintu baheruka kubona n’amaso yabo kera.

Ku ruhande rwa APR FC iri kubarizwa mu Karere ka Rubavu guhera ku wa Kane, yo irakina idafite Byiringiro Lague ufite amakarita atatu y’umuhondo, Niyonzima Olivier Sefu, Mugunga Yves na Nkomezi Alex bafite imvune mu gihe Ntwari Fiacre yamaze gusubukura imyitozo.

Umutoza wa APR FC, Adil Erradi, avuga ko nubwo yatsinze Etincelles FC ibitego 3-0 mu mikino ibanza, yiteze umukino utandukanye kuri uyu wa Gatandatu.

Ati ”Umukino warangiye si umukino wacu, umukino wacu ni uwo tuzakina ejo [uyu munsi], kandi nyuma yo kubatsinda habayemo impinduka nyinshi, ikipe yahinduye umutoza, byumvikana ko yanahinduye uburyo bw’imikinire yabo niyo mpamvu twiteze ko hari byinshi bizahinduka ugereranyije n’umukino twakinnye mbere.”

Etincelles FC itozwa Bizimana Abdu ‘Bekeni’, iheruka gutsindwa na Heroes FC ya nyuma, igitego 1-0, mu mukino wabereye mu muhezo nyuma y’ibihano yari yahawe n’Ishyirahamwe Nyarwanda ry’Umupira w’Amaguru (FERWAFA) byo gukina umukino umwe idafite abafana ku kibuga.

Mugunga Yves ni umwe mu bakinnyi ba APR FC badakina umukino wa Etincelles FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .