00:00:00 IGIHE NETWORK KN KINYARWANDA EN ENGLISH FR FRANCAIS

Espoir FC mu biganiro n’abatoza babiri bashobora kuvamo usimbura Bisengimana Justin

Yanditswe na Ntare Julius
Kuya 20 Ukuboza 2022 saa 10:34
Yasuwe :

Espoir FC yo mu Karere ka Rusizi, yahagaritse ukwezi umutoza Bisengimana Justin ku wa 19 Ukuboza 2022, iri mu biganiro n’abatoza babiri basanzwe bazwi cyane muri Shampiyona y’Icyiciro cya mbere mu Rwanda.

Uwa mbere ni Umurundi utoza Bugesera FC, Ndayiragije Étienne uri ku mwanya wa 11 ku rutonde rwa Shampiyona.

Amakuru IGIHE yamenye ni uko igihe ubuyobozi bwa Espoir FC bwagendaga buha imikino ya nyirantarengwa Bisengimana Justin agakomeza guhusha intego ari nako ibiganiro byarushagaho kwenyegezwa hagati yabwo na Ndayiragije watojeho amakipe arimo iy’Igihugu ya Tanzania mu Gikombe cya Afurika cya 2021, Azam FC yo muri Tanzania, Kiyovu Sports n’ayandi.

Ubuyobozi bwa Espoir FC busanga buhaye ikipe Ndayiragije mu mikino yo kwishyura, ari we mucunguzi wayirokora kumanuka mu Cyiciro cya Kabiri.

Ibiganiro birakomeje kandi hagati ya Espoir FC na Nshimiyimana Maurice "Maso" uherutse kuva kwigira Licence B muri Uganda agahita asezererwa na Musanze FC yari amazemo umwaka n’igice.

Maso watojeho amakipe atandukanye mu Rwanda nka Rayon Sports, Bugesera FC, Police FC, Musanze FC n’ayandi, na we arafatwa nk’igisubizo cyakura mu manga Espoir FC imaze gutsinda umukino umwe muri 14 ya Shampiyona y’uyu mwaka.

Uyu mutoza ufite umwihariko wo kuba afite uburambe muri ruhago Nyarwanda, afatwa nk’igisubizo cya bugufi kandi kidasaba amikoro menshi kugira ngo kigangahure iyi kipe y’i Rusizi.

Espoir FC yahagaritse umutoza Bisengimana Justin mu gihe cy’ukwezi kuri ubu yabaye ihawe Umutoza w’abanyezamu, Bipfubusa Methode ukomoka mu Burundi, ugomba gushaka amanota atatu ku mukino wa Gorilla FC ngo nibura ayikure ku mwanga wa nyuma yicayeho n’amanota arindwi gusa.

Espoir FC yatsinzwe 2-0 na Etincelles FC mu mukino uheruka kuri Stade ya Rusizi ku wa Gatandatu, izakira Gorilla FC tariki 21 Ukuboza mu mukino upfundikira imikino ibanza ya Shampiyona y’uyu mwaka 2022/23.

Inkuri bifitanye isano: Bisengimana Justin yahagaritswe muri Espoir FC, ati “Sinatunguwe”

Ndayiragije Étienne utoza Bugesera FC, amaze iminsi mu biganiro na Espoir FC
Nshimiyimana Maurice 'Maso' nta kipe afite nyuma yo gutandukana na Musanze FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .