00:00:00 IGIHE NETWORK KN KINYARWANDA EN ENGLISH FR FRANCAIS

Erling Haaland, umucunguzi w’ubusatirizi bwa Manchester City nyuma ya Kun Agüero?

Yanditswe na Mihigo Saddam
Kuya 11 May 2022 saa 11:13
Yasuwe :

Mu cyumweru gishize nibwo amakuru yasakaye Isi ahamya ko ikipe ya Manchester City yaba yasoje gahunda yo kugura rutahizamu Erling Braut Haaland usanzwe muri Borussia Dortmund. Kugeza ubu iyi kipe yatangaje ko iyi gahunda igeze ku kigero cya 98%.

Ubutumwa buragira buti “Manchester City ishobora guhamya ko yamaze kumvikana na Borussia Dortmund ku igurwa rya Erling Haaland kuba yaza mu ikipe tariki ya 1 Nyakanga 2022.”

“Ibisigaye ni ibisabwa biri hagati y’ikipe (Manchester City) n’umukinnyi (Haaland).”

Erling Braut Haaland ni rutahizamu wari umaze kwemeza abakunzi ba Borussia Dortmund binyuze mu buhanga afite mu gutsinda ibitego byinshi mu gihe gito.

Uyu Munya-Norvège w’imyaka 21 y’amavuko yageze muri Borussia Dortmund mu 2020 avuye muri Red bull Salzburg yo muri Autriche.

Mu mikino 88 marushanwa yose yafatanyijemo na Borussia Dortmund, Haaland yatsinzemo ibitego 85, kimwe mu byatumye amakipe akomeye atangira kumwibazaho.

Ku mugoroba w’uyu wa Kabiri nibwo ubuyobozi bw’ikipe ya Manchester City bwatangaje ko kugura Haaland bigeze ahashimishije kuko ngo amakipe yombi yamaze kumvikana.

Muri ubu butumwa buri kuri Twitter ya Manchester City, buvuga ko igisigaye ari ibiganiro byimbitse hagati ya City n’umukinnyi.

Haaland azinjira muri Manchester City tariki ya 1 Nyakanga 2022 ubwo umwaka w’imikino wa 2021-2022 uzaba ushyizweho akadomo.

Erling Braut Haaland umusimbura wa Sergio Kun Aguero

Kuva mu 2021 Sergio Kun Aguero yava muri Manchester City akagana muri FC Barcelona, ikipe ya Manchester City yakomeje kubaho idafite utaha izamu wa nyawe.

Mu buryo iyi kipe yari isigaye ikina byabaga ari ugufata abakinnyi bakina mu mpande bakaba bataha izamu bitari umwanya wabo karemano.

Igenda rya Kun Aguero ryateye ubukene bw’ibitego byisumbuye ku bataha izamu kuko n’ubu nta mukinnyi wa Manchester City uri mu bafite ibitego byinshi muri Premier League.

Raheem Sterling nawe utabona umwanya uhoraho niwe ufite ibitego byinshi muri Manchester City (12) mu gihe Mohammed Salah wa Liverpool ayoboye abandi (22).

Undi mukinnyi ufite ibitego byisumbuye muri Manchester City ni Kevin de Bryne ufite ibitego 11.

Mu gushaka ibisubizo by’umukinnyi wajya ategerezwaho ibitego byinshi abandi bakaba inyongera, Manchester City yatangiye ishaka Harry Kane wa Tottenham.

Kapiteni wa Tottenham, Harry Kane kuri ubu afite ibitego 13, ararushwa ibitego icyenda na Mohammed Salah wa mbere muri Premier League y’uyu mwaka.

Mu gihe Haaland yagera muri Manchester City azaba ategerejweho kuharamba agakora ibyakozwe na Sergio Kun Aguero.

Mu myaka 10 yamaze muri iyi kipe, Sergio Kun yatsinze ibitego 184 mu mikino 275 yabakiniye.

Erling Haaland, yitezweho kuba umusimbura mwiza wa Sergio Kun Aguero wavuye muri Man City

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .