Didier Drogba yiyamamarije kuyobora Ishyirahamwe rya ruhago muri Côte d’Ivoire

Yanditswe na Eric Tony Ukurikiyimfura
Kuya 2 Kanama 2020 saa 08:55
Yasuwe :
0 0

Umunyabigwi Didier Drogba wamenyekanye akinira Chelsea, yiyamamarije kuyobora Ishyirahamwe ry’Umupira w’Amaguru muri Côte d’Ivoire (FIF).

Ku wa Gatandatu nibwo Didier Drogba yatanze ibyangombwa byo kwiyamamaza mu matora azaba muri Nzeri.

Didier Drogba w’imyaka 42, ni umwe mu bakandida bane bifuza kuyobora ishyirahamwe rya ruhago muri Côte d’Ivoire, aho afite icyizere ko ibyo yagezeho akinira ikipe y’igihugu byamufasha kwegukana uyu mwanya.

Gusa uyu mugabo wabaye Umukinnyi w’Umwaka wa Afurika inshuro ebyiri, si we uhabwa amahirwe yo kuzatsinda amatora azaba tariki ya 5 Nzeri.

Reuters yatangaje ko Drogba akeneye gushyigikirwa byibuze n’amakipe atatu muri 14 y’Icyiciro cya Mbere, abiri yo mu byiciro byo hasi ndetse akagira n’umuntu mu byiciro bitanu birimo abasifuzi, abatoza, abaganga, abakinnyi n’abahoze bakina.

Ubwo yatangaga ibyangombwa bye, Drogba yavuze ko yiyamamaje kubera ko ashaka guhindura siporo mu gihugu.

Ati “Ntabwo ari ibanga ko umupira wacu uhagaze nabi, ndetse n’iyo mpamvu hamwe n’ikipe yanjye dushaka kugira uruhare mu gutuma ubaho bundi bushya.”

Ishyirahamwe ry’Umupira w’Amaguru muri Côte d’Ivoire (FIF) ryatangaje ko rizasuzuma ubusabe bw’abiyamamaje mu gihe cy’iminsi itanu y’akazi, abasabye bakazamenyeshwa icyemezo cya Komisiyo y’Amatora.

Didier Drogba yimamarije kuyobora Ishyirahamwe rya ruhago muri Côte d’Ivoire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .