David Luiz azareba umukino wa APR FC na Etincelles FC

Yanditswe na Eric Tony Ukurikiyimfura
Kuya 11 Ukwakira 2019 saa 09:24
Yasuwe :
0 0

Myugariro wa Arsenal, David Luiz uri mu Rwanda kuva kuri uyu wa Kane, azitabira umukino w’umunsi wa gatatu wa Shampiyona uzahuza APR FC na Etincelles FC kuri uyu wa Gatandatu.

Uyu mukino uzahuza amakipe yombi ari mu ya mbere muri Shampiyona y’Icyiciro cya Mbere mu Rwanda, uzabera kuri Stade ya Kigali i Nyamirambo saa 15:00.

Etincelles FC ni yo iyoboye shampiyona n’amanota atandatu nyuma yo gutsinda imikino ibiri yahuyemo na Kiyovu Sports na Heroes FC mu gihe mu gihe APR FC ifite amanota ane nyuma yo kunganya na AS Kigali, no gutsinda Bugesera FC ku wa Kabiri.

Ikigo cy’Igihugu cy’Iterambere, RDB, cyatangaje ko uyu mukino wa Shampiyona uzitabirwa na myugariro wa Arsenal, David Luiz.

Luiz yaje mu Rwanda mu gihe Shampiyona zo ku mugabane w’u Burayi zahagaze kubera imikino y’amakipe y’ibihugu, uyu we akaba atarahamagawe n’Umutoza wa Brésil, Tite, mu mikino ya gicuti igihugu cye kiri gukinira muri Singapore irimo n’uwo cyanganyije na Sénégal igitego 1-1 wakinwe ku wa 10 Ukwakira 2019.

Muri Gicurasi 2018 nibwo u Rwanda rwinjiye mu bufatanye bw’imyaka itatu na Arsenal FC, bugamije kurumenyekanisha u Rwanda nk’icyerekezo gikomeye cy’ubukerarugendo n’ishoramari, binyuze mu gushyira ikirango ‘Visit Rwanda’ ku kuboko kw’imyenda yayo.

Kuri uyu wa Gatanu, David Luiz yasuye urwibutso rwa Jenoside rwa Kigali ndetse yakirwa na Perezida Paul Kagame muri Village Urugwiro.

Biteganyijwe ko kuri uyu wa Gatandatu azagirana ikiganiro n’itangazamakuru mbere y’uko asubira mu Bwongereza.

David Luiz azareba umukino wa APR FC na Etincelles FC kuri uyu wa Gatandatu
APR FC na Etincelles ni amwe mu makipe yatangiye neza Shampiyona

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza