00:00:00 IGIHE NETWORK KN KINYARWANDA EN ENGLISH FR FRANCAIS

Cristiano Ronaldo yizeye gukina indi myaka ine cyangwa itanu

Yanditswe na Eric Tony Ukurikiyimfura
Kuya 18 January 2022 saa 10:16
Yasuwe :

Rutahizamu wa Manchester United n’Ikipe y’Igihugu ya Portugal, Cristiano Ronaldo, yavuze ko yizeye gukina indi myaka ine cyangwa itanu nubwo azuza imyaka 37 mu kwezi gutaha.

Ronaldo kuri uyu wa Mbere yahawe igihembo cyihariye n’Ishyirahamwe ry’Umupira w’Amaguru ku Isi (FIFA) mu bihembo by’abitwaye neza mu mwaka wa 2021.

Igihembo uyu mukinnyi w’imyaka 36 yahawe ni uko ubu amaze gutsindira Portugal ibitego 115 nyuma y’uko muri Nzeri yakuyeho agahigo k’Umunya-Iran Ali Daei wari waratsinze ibitego 109 mu mikino mpuzamahanga.

Ubwo yari abajijwe na Jermaine Jenas wari mu bayoboye umuhango wo gutanga ibihembo uko afata umupira w’amaguru, Ronaldo yavuze ko akiwukunze nk’uko byari bimeze akiri muto ndetse yifuza gukomeza kuwukina.

Ati “Sinigeze ntekereza ko nzashyiraho uriya muhigo. Ntewe ishema cyane n’iki gihembo cyihariye cya FIFA, urwego nubaha cyane. Binteye ishema, ndacyakunze uyu mukino, atari ugutsinda ibitego gusa, ahubwo no gushimisha abantu.”

Yakomeje agira ati “Iyo ngiye mu kibuga yewe no mu myitozo, buri gihe mba nyotewe no gukina. Ngiye kuzuza imyaka 37 ariko ndumva meze neza kandi ndashaka gukomeza gukina. Akenshi abantu bambaza imyaka nsigaje, ariko nizeye ko nzakina imyaka ine cyangwa itanu. Iyo ufashe umubiri wawe neza, igihe ukeneye umubiri wawe, na wo uraguha.”

Ronaldo yatsinze ibitego 14 mu mikino 22 amaze gukinira Manchester United yasubiyemo muri Nzeri umwaka ushize.

Muri Premier League, Manchester United iri ku mwanya wa karindwi, irushwa amanota atanu na West Ham ya kane mu gihe kandi irushwa amanota 24 na Manchester City ya mbere, ariko ifite ibirarane bibiri.

Cristiano Ronaldo yizeye ko ashobora gukina indi myaka ine cyangwa itanu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .