Cristiano Ronaldo yanduye Coronavirus

Yanditswe na Eric Tony Ukurikiyimfura
Kuya 13 Ukwakira 2020 saa 11:58
Yasuwe :
0 0

Rutahizamu wa Juventus n’Ikipe y’Igihugu ya Portugal, Cristiano Ronaldo, yanduye icyorezo cya Coronavirus.

Ishyirahamwe ry’Umupira w’Amaguru muri Portugal (FPF) ryemeje aya makuru kuri uyu wa Kabiri.

Ryavuze ko Cristiano Ronaldo w’imyaka 35 “Ameze neza, nta bimenyetso agaragaza, kandi ari mu kato.”

Ronaldo yanduye Coronavirus mu gihe ikipe y’igihugu cye izahura na Suède mu mukino wa UEFA Nations League uzaba ku wa Gatatu.

FPF yatangaje ko abandi bakinnyi bari mu ikipe y’umutoza Fernando Santos, basanze ari bazima ku buryo bazitabazwa kuri uwo mukino.

Portugal yanganyije n’u Bufaransa ubusa ku busa mu mukino wabaye ku Cyumweru, ikomeza kuyobora itsinda inganya amanota n’iyi kipe yatwaye Igikombe cy’Isi mu 2018.

Ronaldo usanzwe ari kapiteni wa Portugal, yabaye umukinnyi wa mbere wo mu Burayi watsinze ibitego 100 mu mikino mpuzamahanga mu bagabo ubwo igihugu cye cyatsindaga Suède mu mukino ubanza wabaye muri Nzeri.

Kubera akato yashyizwemo, byitezwe ko Cristiano Ronaldo azasiba umukino wa Shampiyona y’u Butaliyani, Juventus izahuramo na Crotone ku wa 17 Ukwakira ndetse n’uwo izahuramo na Dynamo Kiev ku munsi wa mbere w’amatsinda ya Champions League ku itariki ya 20 Ukwakira.

Iyi kipe yatwaye Shampiyona y’u Butaliyani mu mwaka ushize w’imikino, izahura na Verona mu mukino wa shampiyona uzaba ku wa 25 Ukwakira mbere yo guhura na FC Barcelone mu mukino wa kabiri wo mu itsinda rya Champions League ku wa 28 Ukwakira.

Ku wa Mbere, Ronaldo yari yashyize ku mbuga nkoranyambaga ifoto ye ari kumwe na bagenzi be bakinana mu Ikipe y’Igihugu ya Portugal, avuga ko “Bunze ubumwe mu kibuga no hanze yacyo.”

Cristiano Ronaldo yanduye Coronavirus, yishyira mu kato

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .