00:00:00 IGIHE NETWORK KN KINYARWANDA EN ENGLISH FR FRANCAIS

Cristiano Ronaldo yahigitse Messi ku rutonde rw’abakinnyi ba ruhago binjiza amafaranga menshi

Yanditswe na Eric Tony Ukurikiyimfura
Kuya 22 Nzeri 2021 saa 08:33
Yasuwe :
0 0

Nyuma yo gusubira muri Manchester United, Cristiano Ronaldo yahigitse Lionel Messi ku rutonde rw’abakinnyi binjiza amafaranga menshi, aho azabona hafi miliyoni 125$ muri uyu mwaka w’imikino wa 2021/22.

Uretse kuba Cristiano Ronaldo ari we mukinnyi ukina mu ikipe umaze gukorera miliyari 1$ hatarakurwamo imisoro, Forbes Magazine yagaragaje ko kuri ubu ari we winjiza amafaranga menshi mu bakina umupira w’amaguru.

Muri uyu mwaka w’imikino wa 2021/22, Ronaldo azabona miliyoni 125$ arimo miliyoni 70$ y’imishahara ndetse na miliyoni 55$ binyuze mu kwamamaza abafatanyabikorwa bakorana na we.

Abifashijwemo n’ibicuruzwa bye bwite birimo umubavu, amadarubindi, imyenda y’imbere, hoteli na gyms, Ronaldo ari mu bakinnyi binjiza amafaranga menshi hanze y’ikibuga.

Gusa, amafaranga yinjiza muri ibyo ari munsi y’aya Conor McGregor (miliyoni 158$), Roger Federer (miliyoni 90$), LeBron James (miliyoni 65$) na Tiger Woods winjiza miliyoni 60$.

Nubwo aheruka kugirana amasezerano y’imyaka itatu n’uruganda rwa Budweiser rukora inzoga, Messi uheruka kwerekeza muri Paris Saint-Germain, yagiye ku mwanya wa kabiri na miliyoni 110$, aho amafaranga yinjiza mu kibuga yagabanutse ugereranyije na miliyoni 97$ yabonye mu mwaka ushize w’imikino akiri muri FC Barcelone.

Miliyoni 75$ ahembwa, ayanganya na Neymar bakinana muri Paris Saint-Germain nk’abakinnyi babiri ba mbere ba ruhago bahembwa menshi, gusa na bo bakaba barushwa na Dak Prescott wa Cowboys yo muri NFL, we winjizaga miliyoni 97,5$ mu mwaka ushize.

Neymar uri ku mwanya wa gatatu, yinjiza miliyoni 95$, arusha Cristiano Ronaldo guhembwa menshi mu kibuga, ariko na we akaba arushwa mu yo binjiza hanze yacyo. Gusubira inyuma kwa Neymar byaturutse ku gutandukana kwe na Nike yamushinje guhohotera umukozi wayo ariko amafaranga ye yiyongereye ubwo yakoranaga na TikTok.

Paris Saint-Germain ifite abakinnyi batatu muri bane bahembwa neza ku Isi kuko Kylian Mbappé abona miliyoni 43$ ku mwaka. Gusa, uyu mukinnyi w’imyaka 22 yanze gusinya amasezerano mashya muri iyi kipe, yari gutuma abona miliyoni 28$, akubye hafi gatatu ayo bivugwa ko azahabwa na Real Madrid.

Rutahizamu wa Liverpool, Mohamed Salah, ari ku mwanya wa gatanu na miliyoni 41$ mu gihe gutungurana gukomeye kuri uru rutonde ari ukwa Andrés Iniesta wigeze gukinira FC Barcelone, aho ari ku mwanya wa karindwi na miliyoni 35$ nyuma yo kongera amasezerano y’imyaka ibiri muri Vissel Kobe yo mu Buyapani.

Iniesta yinjiza amafaranga angana n’aya Robert Lewandowski wa Bayern Munich mu gihe bakurikirwa na Paul Pogba wa Manchester United (miliyoni 34$) n’abakinnyi babiri ba Real Madrid, Eden Hazard (miliyoni 32$) na Gareth Bale (miliyoni 29$), mu 10 ba mbere.

Cristiano Ronaldo ayoboye urutonde rw'abakinnyi b'umupira w'amaguru binjiza amafaranga menshi muri uyu mwaka w'imikino wa 2021/22
Ronaldo akurikiwe n'abakinnyi batatu ba PSG: Lionel Messi, Neymar na Kylian Mbappé

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .