00:00:00 IGIHE NETWORK KN KINYARWANDA EN ENGLISH FR FRANCAIS

Cristiano Ronaldo yaciye agahigo ko gutsinda ibitego byinshi muri Shampiyona ya Arabie Saoudite

Yanditswe na Eric Tony Ukurikiyimfura
Kuya 28 May 2024 saa 08:24
Yasuwe :

Rutahizamu Cristiano Ronaldo yashyizeho agahigo gashya ko gutsinda ibitego byinshi mu mwaka umwe wa Shampiyona ya Arabie Saoudite aho yatsinze bibiri mu mukino wa Al-Nassr na Al-Ittihad, ageza ibitego 35.

Ronaldo w’imyaka 39, yatsinze ibitego bibiri muri 4-2 ikipe ye yatsinzemo uyu mukino, atambuka ku gahigo kari kashyizweho na Abderrazak Hamdallah watsinze ibitego 34 mu mwaka w’imikino wa 2018/19.

Itandukaniro rito ririmo ni uko uyu Munya-Maroc na we wakiniraga Al-Nassr, we yabitsinze arushwa imikino ine na Ronaldo.

Uyu Munya-Portugal amaze gutsinda ibitego 64 mu mikino 69 yakiniyemo Al-Nassr mu marushanwa yose kuva ayigezemo avuye muri Manchester United muri Mutarama 2023.

Intsinzi Al-Nassr yabonye ku wa Mbere yatumye izasoza Shampiyona ku mwanya wa kabiri ku nshuro ya kabiri yikurikiranya, irushwa amanota 14 na Al-Hilal yatwaye igikombe, ariko na yo ikaba irusha amanota 17 Al-Ahli ya gatatu.

Kugeza ubu, Ronaldo amaze gutsinda ibitego 765 mu myaka 22 yakiniyemo amakipe ya Sporting Lisbon, Manchester United, Real Madrid na Juventus.

Ni we kandi ufite agahigo ko gutsinda ibitego byinshi mu mikino mpuzamahanga aho yatsindiye Portugal ibitego 128 mu mikino 206 amaze kuyikinira.

Ronaldo ashobora kongera ibyo bitego mu Gikombe cy’u Burayi kizabera mu Budage kuva tariki ya 14 Kamena kugeza ku ya 14 Nyakanga 2024.

Cristiano Ronaldo yaciye agahigo ko gutsinda ibitego 35 mu mwaka umwe wa Shampiyona ya Arabie Saoudite
Ronaldo yatsinze ibitego bibiri mu mukino batsinzemo Al-Ittihad
Cristiano Ronaldo w'imyaka 39, amaze gutsindira Al-Nassr ibitego 64 mu mikino 69

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .