00:00:00 IGIHE NETWORK KN KINYARWANDA EN ENGLISH FR FRANCAIS

Cristiano Ronaldo mu biganiro na Ten Hag ku hazaza he muri Manchester United

Yanditswe na Byiringiro Osée Elvis
Kuya 26 July 2022 saa 11:15
Yasuwe :

Cristiano Ronaldo yemeye gusubira i Manchester kuganira na Eric Ten Hag, umutoza mushya wa Manchester United ku hazaza he muri iyi kipe.

Cristiano Ronaldo aheruka kugaragara mu bikorwa by’iyi kipe mu mpera z’umwaka ushize.

Ku mpanvu yise ize bwite, Ronaldo ntiyigeze agaragara mu myiteguro y’umwaka mushya w’imikino (Pre-Season) iyi kipe yakoreye muri Thailand na Australia.

Uyu mugabo w’imyaka 37 yasabye Manchester united ko yamurekura akagenda muri iyi mpeshyi, kubera umusaruro mubi ikipe yagize umwaka ushize utayemerera kuzakina irushanwa ry’amakipe yabaye aya mbere iwayo (Champions League), akongeraho ko no ku isoko ry’igura n’igurisha nta mbaraga ikipe igaragaza ko umwaka utaha byahinduka.

Nyuma y’iminsi akorera imyitozo ku giti cye aho ikipe y’igihugu ya Portugal akomokamo ikorera imyitozo, amakuru agezweho avuga ko uyu mugabo yasubiye i Manchester kuganira na Ten Hag ku hazaza he muri iyi kipe.

Biteganyijwe ko bombi bari bugirane ibiganiro kuri uyu wa Kabiri tariki 26 Nyakanga 2022.

Ten Hag avuga ko ibiganiro bombi bagiranye mbere yo kwerekeza muri Thailand byari byiza cyane. Ati “Nagiranye ibiganiro byiza nawe, nubwo biri hagati yanjye na Ronaldo gusa. Icyo nabahamiriza ni uko ari byiza.”

Manchester united yasoje ku mwamya wa gatandatu umwaka ushize, bituma itazakina irushanwa ry’amakipe yabaye aya mbere iwayo (Champions league) ahubwo ikazakina murumuna waryo Europa League, Ronaldo azaba akinnye bwa mbere.

Nubwo Manchester United yakomeje guhamya ko uyu mugabo ubitse imipira ya zahabu 5 usigaje umwaka umwe muri iyi kipe atagurishwa, kutagaragara kwe mu myitozo byazamuraga amakuru menshi amwerekeza mu yandi makipe nka Chelsea, Bayern Munich na Atletico Madrid.

Ku wa gatandatu tariki 30 Nyakanga 2022, Manchester united izakina na Atletico Madrid muri Norvege, mu gihe umukino wa nyuma wa pre-season uzabera mu rugo kuri Old Trafford ku Cyumweru bakina na Rayo Vallecano.

Manchester United izatangira Shampiyona y’u Bwongereza, Premier league ku Cyumweru tariki 7 Kanama 2022 yakira Brighton.

Cristiano Ronaldo mu biganiro na Ten Hag ku hazaza he muri Manchester United

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .