Ciza Hussein yahishuye ibanga ryafasha Rayon Sports gutsinda Mukura VS

Yanditswe na Eric Tony Ukurikiyimfura
Kuya 13 Ukuboza 2019 saa 09:14
Yasuwe :
0 0

Ciza Hussein ukina inyuma ya ba rutahizamu muri Rayon Sports, yavuze ko kugira ngo iyi kipe akinira izatsinde Mukura Victory Sports mu mukino w’umunsi wa 14 wa Shampiyona uzahuza amakipe yombi ku Cyumweru, igomba kwita cyane kuri Duhayindavyi Gaël ukina mu kibuga hagati.

Ciza Hussein yageze muri Rayon Sports muri Kamena uyu mwaka, avuye muri Mukura Victory Sports yakiniye imyaka itandatu yose.

Rayon Sports izakira Mukura Victory Sports mu mukino w’umunsi wa 14 wa Shampiyona uzaba ku Cyumweru kuri Stade ya Kigali saa 15:00.

Ciza Hussein asanga kugira ngo Rayon Sports akinira, izitware neza muri uyu mukino, igomba kwita cyane ku Murundi Duhayindavyi Gaël ukina mu kibuga hagati muri Mukura Victory Sports, uyu wanamusimbuye ku bukapiteni muri iyi kipe y’i Huye.

Ati ’’Nzi Mukura, ni ikipe ugomba kubaha, ni ikipe ikina umupira wo hasi kandi ni ikipe ikinisha imbaraga. Tugomba kubabuza gukina kugira ngo tubone intsinzi.’’

"Gael ni umukinnyi mwiza umaze kumenyera, icyazaba cyiza ni ukumubuza gutanga iriya mipira ye kuko ni we ukinisha hagati hayo. Iyo ubonye amahirwe yo kumufata uba ufite umukino mu biganza byawe.’’

Ciza avuga ko Rayon Sports igomba kwihimura kuri Mukura nyuma y’uko iyitwaye Igikombe cy’Agaciro 2019, cyakiniwe mbere y’uko Shampiyona itangira.

Ati ’’Mukura duheruka guhura uyu mwaka ku mukino wa nyuma w’Agaciro, ntabwo wari umukino woroshye kuri twebwe kandi yadutwaye igikombe. Tugomba kwihimura nka ikipe tubereke ko Rayon Sports iri ku rundi rwego.’’

Uyu mukinnyi yemeza ko yagowe no kwisanga muri Rayon Sports, ariko nk’umukinnyi mukuru agerageza gushaka uburyo yakongera kuba umukinnyi ubona umwanya uhagije wo gukina.

Ati "Ndabizi, gutangira hano ntabwo byari byoroshye, ntabwo kwisanga byahise bikunda ariko nk’umukinnyi, nk’umuntu mukuru ufite ubunarariboye urakomeza gukora kugira ngo ugarurire icyizere abafana ba Rayon Sports.’’

Rayon Sports ya kabiri n’amanota 28, izakina uyu mukino ishaka gukomeza gusatira APR FC zizahura ku munsi wa 15 wa Shampiyona. Ikipe y’ingabo iri ku mwanya wa mbere n’amanota 31, yo izakirwa na Heroes FC kuri uyu wa Gatandatu mu Bugesera.

Gahunda y’umunsi wa 14 wa Shampiyona

Ku wa Gatandatu tariki ya 14 Ukuboza 2019

  • Gasogi United vs AS Kigali (Stade de Kigali, 15h00)
  • Heroes FC vs APR FC (Stade Bugesera, 15h00)
  • Gicumbi FC vs Bugesera FC (Stade Mumena)

Ku Cyumweru tariki ya 15 Ukuboza 2019

  • Rayon Sports FC vs Mukura VS (Stade de Kigali, 15h00)
  • Musanze FC vs Etincelles FC (Stade Ubworoherane, 15h00)
  • SC Kiyovu vs Police FC (Stade Mumena, 15h00)
  • Sunrise FC vs Marines FC (Stade Nyagatare, 15h00)
  • Espoir FC vs AS Muhanga (Stade Rusizi, 15h00)
Ciza Hussein asanga uyu ari wo mwanya wo kugira ngo Rayon Sports yihimure kuri Mukura Victory Sports
Ciza yagiriye inama bagenzi be ko bazabuza kapiteni wa Mukura, Dauhayindavyi Gael, gukinana na bagenzi be
Iradukunda Bertrand na Duhayindavyi bashimira Ciza Hussein wari umaze gutsinda igitego ubwo yari agikina muri Mukura VS

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza