Mu mpera z’icyumweru gishize, Shampiyona y’u Bwongereza yakomeje ku munsi wa 15 wasize Chelsea ikomeje gutanga ubutumwa ko ari iyo kwitondera.

Uyu munsi wari uteganyijwemo Merseyside Derby ariko ntiwabaye kubera imvura nyinshi yaguye ku kibuga cya Everton bityo ntiyabasha kwakira mukeba Liverpool.

Undi mukino w’umunsi wahuje Chelsea yavuye inyuma itsinda Tottenham ibitego 4-3, Cole Palmer watsinze penaliti ebyiri yandika amateka yo kuba ntayo arahusha muri 12 amaze gutera muri iyi shampiyona.

Arsenal yirangayeho inganya na Fulham igitego 1-1. Manchester City yanganyije na Crystal Palace ibitego 2-2, Aston Villa itsinda Southampton igitego 1-0.

Ku wa Gatandatu, Manchester United yatsindiwe mu rugo na Nottingham Forest ibitego 3-2, Brentford itsinda Newcastle ibitego 4-2.

Uyu munsi wasize Liverpool ikomeje kwicara ku mwanya wa mbere n’amanota 35, Chelsea yazamutse igeze ku wa kabiri na 31, Arsenal ifite 29, Man City ya kane ifite amanota 27. Ni mu gihe, Manchester United iri ku mwanya wa 13 n’amanota 19.

Ku Cyumweru, tariki ya 15 Ukuboza 2024, Manchester City izakira Manchester United saa 18:30 kuri Etihad Stadium.

Cole Palmer yanditse ameteka yo gutsinda penaliti zose yateye (12)

Chelsea ikomeje gutanga ubutumwa

Arsenal yanganyije na Fulham

Man City yanganyije na Crystal Palace

Manchester United yatsindiwe mu rugo na Nottingham Forest

La Liga: Barcelona ikomeje gukora amakosa

Shampiyona ya Espagne yakomeje ku munsi wa 16, waranzwe no kunganya kwa FC Barcelona.

Ku wa Gatandatu, FC Barcelona yanganyije na Real Betis ibitego 2-2, Real Madrid itsinda Girona ibitego 3-0, Valencia itsindwa na Rayo Vallecano igitego 1-0.

Ku Cyumweru, Atlético de Madrid yavuye inyuma itsinda Seville ibitego 4-3, Athletic Club itsinda Villarreal ibitego 2-0, mu gihe Real Sociedad yatsinze Leganes ibitego 3-0.

Barcelona imaze iminsi yitwara nabi iracyari ku mwanya wa mbere n’amanota 38, ikurikiwe na Real Madrid ifite 36 n’ikirarane, Atlético de Madrid ifite 35 na Athletic Club ya kane ifite amanota 32.

Kylian Mbappé yongeye gufasha Real Madrid kubona intsinzi

Barcelona yanganyije na Real Betis

Serie A: Kera kabaye Napoli yaratakaje

Mu mpera z’icyumweru, Shampiyona y’u Butaliyani yakomeje ku munsi wa 15, waranzwe no gutsindwa kwa Napoli na AC Milan.

Uyu munsi watangiye ku wa Gatanu, Atalanta itsinda AC Milan ibitego 2-1, Inter de Milan itsinda Parma ibitego 3-1.

Ku wa Gatandatu, Juventus yanganyije na Bologna ibitego 2-2, AS Roma itsinda Lecce ibitego 4-1, Fiorentina itsinda Cagliari igitego 1-0.

Ku Cyumweru, Lazio yatsinze Napoli igitego 1-0, Verona intsindwa na Empoli ibitego 4-1, mu gihe Venezia yanganyije na Como ibitego 2-2.

Atalanta yafashe umwanya wa mbere n’amanota 34, ikurikiwe na Napoli ifite 32, Inter de Milan ya gatatu, Fiorentina na Lazio zinganya amanota 31. Juventus ya gatandatu ifite 27, ikurikiwe na AC Milan ifite 22.

Juventus yanganyije na Bologna

Ademola Lookman yafashije Atalanta gufata umwanya wa mbere

Bundesliga: Amakipe akomeye yitwaye neza

Shampiyona y’u Budage yakomeje ku munsi wa 13 waranzwe no kwitwara neza ku amakipe akomeye.

Bayern Munich yatsinze Heidenheim ibitego 4-2, Bayer Leverkusen itsinda FC St Pauli ibitego 2-1, Stuttgart itsinda Union Berlin ibitego 3-2, mu gihe Leipzig yatsinze Holstein Kiel ibitego 2-0.

Borussia Dortmund yanganyije na Borussia Mönchengladbach igitego 1-1, Wolfsburg yatsinze Mainz 05 ibitego 4-3, Frankfurt yanganyije na Ausburg ibitego 2-2.

Bayern Munich iracyari ku mwanya wa mbere n’amanota 33, ikurikiwe na Eintracht Frankfurt ifite 27, Leverkusen ifite 26 na Leipzig ya kane ifite amanota 24.

Bayern Munich yongeye kubona intsinzi

Ligue 1: Marseille yitwaye neza, PSG iratungurwa

Shampiyona y’u Bufaransa yakomeje ku munsi 14 waranzwe no kongera gutsikira kwa Paris Saint-Germain.

Iyi kipe y’i Paris yanganyije na Auxerre ubusa ku busa, Lille itsinda Brest ibitego 3-1, Monaco itsinda Toulouse ibitego 2-0, Nice itsinda le Havre ibitego 2-1.

Umukino w’umunsi wabaye ku Cyumweru, Marseille yatsinze St Etienne ibitego 2-0, Nantes itsinda Rennes igitego 1-0, Lyon itsinda Angers ibitego 3-0.

PSG iri ku mwanya wa mbere n’amanota 34, ikurikiwe na Marseille ifite 29 inganya na AS Monaco, Lille iri ku mwanya wa kane n’amanota 26.

Mason Greenwood akomeje gufasha Marseille kwicuma igana imbere

PSG yanganyije na Auxerre