Champions League: Tottenham ya Mourinho yatsindiwe mu rugo, Atalanta yihererana Valence CF (Amafoto)

Yanditswe na Eric Tony Ukurikiyimfura
Kuya 20 Gashyantare 2020 saa 07:58
Yasuwe :
0 0

Imikino ibanza ya 1/8 cy’irushanwa rihuza amakipe yabaye aya mbere iwayo ku mugabane w’Uburayi, UEFA Champions League, yakomeje ejo ku wa Gatatu, yasize Tottenham yo mu Bwongereza itsindiwe mu rugo na RB Leipzig yo mu Budage igitego 1-0.

Tottenham itozwa na José Mourinho, yakiriye uyu mukino ubanza ibura bamwe mu bakinnyi bayo bakomeye nka Harry Kane umaze iminsi yaravunitse, ukongeraho Son Heung-min wavunitse ikiganza.

Iyi kipe yari imbere y’abafana bayo, yarushijwe bigaragara kuva ku munota wa mbere, aho RB Leipzig yakabaye yafunguye amazamu ku buryo bwinshi bwabonetse, Tottenham itabarwa n’umunyezamu Hugo Lloris.

Mu gihe cy’amasegonda 60 ya mbere gusa, Lloris yakuyemo imipira ibiri, aho uwa mbere watewe na Angelino yawukuyemo ugafata igiti cy’izamu mbere y’uko akuramo n’irindi shoti rya Timo Werner watereye mu rubuga rw’amahina.

Igitego kimwe rukumbi cyabonetse muri uyu mukino cyatsinzwe na Timo Werner kuri penaliti nyuma y’uko umusifuzi yemeje ko umupira uterekwa mu rubuga rw’amahina ubwo Ben Davies yari amaze kugusha Konrad Laimer ku munota wa 57.

Tottenham na yo yagiye inyuzamo igasatira ishaka igitego, ariko uburyo burimo umupira w’umuterekano watewe na Giovani Lo Celso bukurwamo n’umunyezamu Peter Gulacsi mu gihe umupira w’umutwe watewe na Lucas Moura wagiye hejuru y’izamu.

Undi mukino wa 1/8 wabaye ku wa Gatatu, Atalanta yo mu Butaliyani yakiriye Valence C.F yo muri Espagne, iyinyagira ibitego 4-1.

Igice cya mbere cy’umukino cyarangiye ari ibitego 2-0 byatsinzwe na Hans Hateboer ku munota wa 16 ndetse na Josip Ilicić ku wa 42.

Ku wa 57, Remo Freuler yatsinze icya gatatu, Hans Hateboer yongeramo icya kane ku wa 62, mu gihe icy’impozamarira cyabonetse ku ruhande rwa Valence C.F, cyatsinzwe na Denis Cheryshev ku munota wa 79.

Imikino yo kwishyura iteganyijwe ku wa Kabiri tariki ya 10 Werurwe mu gihe mu cyumweru gitaha, ku wa Kabiri no ku wa Gatatu, hazakinwa indi mikino ine ibanza ya 1/8 ku yandi makipe asigaye.

Abafana ba Leipzig bari bitwaje ibisa n'igikombe cya Champions League
Abafana bari baherekeje Leipzig bazunguza amadarapo yayo mbere y'umukino
Timo Werner ahusha uburyo bwiza ku mupira wakuwemo na Hugo Lloris
Rutahizamu wa Tottenham, Steven Bergwijn areba umunyezamu wa Leipzig akuramo umupira yari ateye
Steven Bergwijn w'imyaka 22 ukomoka mu Buholandi yifashe mu mutwe nyuma yo guhusha uburyo bwiza
Umutoza Nagelsmann ntiyiyumvishaga uburyo ye iri guhusha cyane mu minota ya mbere
Abafana ba Leipzig bajugunye impapuro z'isuku mu kibuga ubwo umukino wari uri kuba
Ben Davies agusha Konrad Laimer mu rubuga rw'amahina
Umusifuzi yatanze penaliti n'ikarita y'umuhondo kuri Ben Davies
Timo Werner atsindira RB Leipzig nubwo Hugo Lloris yagerageje gukurikira umupira
Timo Werner (hagati) yahesheje Leipzig kuyobora umukino guhera ku munota wa 58
Abakinnyi ba RB Leipzig bishimira igitego imbere y'abafana babo
Abafana ba Leipzig bajugunye impapuro z'isuku mu kibuga ubwo umukino wari uri kuba
Dele Alli ntiyishimiye gusimbuzwa akubita icupa ry'amazi n'inkweto ze hasi
Lucas Moura atera umupira n'umutwe mu buryo bwiza ikipe ye yabonye, ariko umupira waciye hejuru y'izamu
Serge Aurier yahise aryama hasi ubwo umukino wari urangiye
Jose Mourinho asuhuzanya na Julian Nagelsmann utoza Leipzig
Mourinho n'abakinnyi be basubira mu rwambariro ubwo umukino wari urangiye
Indi mikino ya 1/8 izakinwa mu cyumweru gitaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza