Champions League: PSG yihimuye kuri Manchester United y’abakinnyi 10, Giroud atsindira Chelsea ibitego bine

Yanditswe na Eric Tony Ukurikiyimfura
Kuya 3 Ukuboza 2020 saa 04:54
Yasuwe :
0 0

Paris Saint-Germain yiyongereye amahirwe yo kurenga amatsinda ya UEFA Champions League, itsinda Manchester United ibitego 3-1 mu mukino w’umunsi wa gatanu wakiniwe kuri Old Trafford ku wa Gatatu.

Iyi kipe yo mu Bufaransa yasabwaga gutsinda uyu mukino wo mu itsinda H kugira ngo yizere kuguma mu irushanwa.

Yafunguye amazamu ku munota wa gatandatu ku gitego cyatsinzwe na Neymar ku mupira wari uhinduriwe icyerekezo na Victor Lindelof nyuma yo guterwa na Kylian Mbappé.

PSG yashoboraga kandi gutsinda igitego cya kabiri mu minota ine yakurikiyeho, ishoti rikomeye ryatewe na Alessandro Florenzi, rikurwamo n’umunyezamu David De Gea.

Manchester United yagize amahirwe yo kudahabwa Ikarita itukura ubwo Fred yakubitaga umutwe Leandro Parades ku munota wa 23.

Byasabye iyi kipe yo mu Bwongereza gutegereza umunota wa 32, itsinda igitego cyo kwishyura cyabonywe na Marcus Rashford ku ishoti yatereye inyuma gato y’urubuga rw’amahina, rikora ku kirenge cya Abdou Diallo.

Manchester United yihariye iminota 17 ibanza y’igice cya kabiri, ibona uburyo butatu bukomeye itabashije kubyaza umusaruro burimo umupira watewe hejuru y’izamu na Anthony Martial ndetse n’umupira Edinson Cavani yateye aroba umunyezamu Keylor Navas, ugarurwa n’umutambiko w’izamu.

Paris Saint-Germain yari imaze akanya gato ihushije uburyo bukomeye ku mupira wakuwemo na David De Gea, yatsinze igitego cya kabiri ku munota wa 69 ubwo abakinnyi ba Manchester United bibwiraga ko Marquinhos yaraririye.

Nyuma y’umunota umwe, Manchester United yasigaye ari abakinnyi 10 mu kibuga ubwo Fred yahabwaga ikarita ya kabiri y’umuhondo, umusifuzi w’Umutaliyani, Daniele Orsato, yemeza ko yakiniye nabi Ander Herra.

Mu gihe iyi kipe yo mu Bwongereza yarwanaga no kwishyura mu minota ya nyuma, PSG yatsinze igitego cya gatatu mu minota y’inyongera, gitsinzwe na Neymar ku mupira yahawe na Rafinha.

Gutsinda uyu mukino byafashije PSG kugira amanota icyenda ku mwanya wa kabiri, iyanganya na Manchester United ya mbere ndetse na RB Leipzig ya gatatu.

Ku munsi wa nyuma uzakinwa mu cyumweru gitaha, ku wa 8 Ukuboza, PSG izakira Istanbul Basaksehir mu gihe RB Leipzig izakira Manchester United.

Mu yindi mikino yabaye ku wa Gatatu, mu itsinda E, Chelsea yanyagiye Seville C.F ibitego 4-0 byose byatsinzwe na Olivier Giroud, yizera kuzamuka iyoboye itsinda n’amanota 13 mu gihe iyi kipe yo muri Espgane ifite amanota 10. FC Krasnodar yiyongereye amahirwe yo gukina Europa League itsinda Rennes 1-0.

Mu itsinda F, Borussia Dortmund yizeye kurenga amatsinda nyuma yo kunganya na Lazio igitego 1-1, ikagira amanota 10 ku mwanya wa mbere. Ku munsi wa nyuma, Lazio ifite amanota icyenda izahura na Club Brugge ifite arindwi, yo yatsinze Zenit St Petersburg 3-0.

Imikino ibiri yabaye mu itsinda G, yasize FC Barcelone ikomeje kuriyobora n’amanota 15 nyuma yo gutsinda Ferencváros ibitego 3-0 mu gihe Juventus yagize amanota 12 itsinze Dynamo Kyiv 3-0 mu mukino wasifuwe n’umugore Stephanie Frappart.

Neymar yafunguye amazamu hakiri kare
Moise Kean na Neymar bishimira igitego cya mbere cya PSG
Fred wa Manchester United yagize amahirwe ntiyahabwa ikarita itukura ku mutwe yakubise Leandro Parades
Umusifuzi Daniele Orsato yahaye Fred ikarita y'umuhondo
Marcus Rashford atera umupira wavuyemo igitego cya Manchester United
Aaron Wan-Bissaka na Rashford bishimira igitego
Scott McTominnay wa Manchester United ahanganye na Neymar mu gice cya mbere
Umusifuzi Daniele Orsato aganira na Neymar ubwo amakipe yombi yari agiye kuruhuka
Anthony Martial yahushije uburyo bukomeye mu minota ya mbere y'igice cya kabiri
Marquinhos yatsindiye PSG igitego cya kabiri arobye umunyezamu De Gea
Daniele Orsato yereka Fred ikarita itukura nyuma yo gukinira nabi Herrera
Fred yasohotse mu kibuga atabyumva nyuma y'uko yibwiraga ko yatanze umupira Ander Herrera
Rashford yasimbuwe na Paul Pogba nyuma yo kuvunika urutugu
Neymar yatsinze igitego cya gatatu cya PSG mu minota y'inyongera
Abakinnyi ba PSG bishimira intsinzi yari ikenewe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .