Champions League: Manchester City yatsindiye i Budapest, Real Madrid yikura kwa Atalanta

Yanditswe na Eric Tony Ukurikiyimfura
Kuya 25 Gashyantare 2021 saa 12:19
Yasuwe :
0 0

Manchester City yiyongereye icyizere cyo gukomeza mu cyiciro gikurikira cya UEFA Champions League, itsindira Borussia Moenchengladbach i Budapest ibitego 2-0 mu mukino ubanza wa 1/8 wabaye kuri uyu wa Gatatu.

Nk’uko byagenze kuri imwe mu yindi mikino ya 1/8, Borussia Moenchengladbach yakiriye umukino wayo muri Hongrie kubera amabwiriza yo kwirinda COVID-19 yashyizweho mu Budage.

Uretse igitego cyinjijwe na Bernardo Silva ku mupira yatsindishije umutwe ari hagati ya ba myugariro ba Borussia Moenchengladbach, uhinduwe na João Cancelo, nta bundi buryo bukomeye bwabonetse mu minota 45 ibanza.

Ku munota wa 61, Denis Zakaria yacomekeye umupira Alassane Plea wateresheje agatsitsino, ku bw’amahirwe make uca imbere gato y’izamu rya Ederson Moraes.

Gabriel Jesus wari wahushije uburyo bwiza mu minota ya mbere y’igice cya kabiri ku mupira yakuweho mu rubuga rw’amahina, yatsinze igitego cya kabiri ku munota wa 64, ku mupira wahinduwe na Raheem Sterling, usanga Bernardo Silva washyizeho umutwe ugera kuri Jesus awohereza mu izamu.

Phil Foden yagerageje ishoti ryanyuze hejuru gato y’izamu ahagana ku munota wa 80, iminota mike mbere y’uko asimburwa na Sergio Kun Agüero wari umaze igihe atifashishwa kubera imvune.

Mu wundi mukino wabaye kuri uyu wa Gatatu, Atalanta yasoje umukino ari abakinnyi 10 mu kibuga, yatsinzwe na Real Madrid igitego 1-0.

Remo Freuler yahawe ikarita itukura ku munota wa 17 w’umukino mu gihe byasabye ikipe y’umutoza Zinedine Zidane gutegereza umunota wa 86 kugira ngo ibone igitego cyinjijwe na Ferland Mendy.

Imikino yo kwishyura ya 1/8 cya UEFA Champions League izakinwa hagati ya tariki ya 9 n’iya 17 Werurwe 2021.

Uko amakipe yatsindanye mu mikino ibanza ya 1/8

Ku wa Kabiri tariki ya 16 Gashyantare

  • FC Barcelone 1-4 Paris Saint-Germain
  • RB Leipzig 0-2 Liverpool

Ku wa Gatatu tariki ya 17 Gashyantare

  • FC Porto 2-1 Juventus
  • Seville 2-3 Borussia Dortmund

Ku wa Kabiri tariki ya 23 Gashyantare

  • Atlético Madrid 0-1 Chelsea
  • Lazio 1-4 Bayern Munich

Ku wa Gatatu tariki ya 24 Gashyantare

  • Atalanta 0-1 Real Madrid
  • Borussia Moenchengladbach 0-2 Manchester City
Puskas Arena yabereyeho umukino i Budapest
Imikino iba mu muhezo mu rwego rwo kwirinda ikwirakwira rya COVID-19
Abakinnyi b'amakipe yombi babanje gupfukama mu rwego rwo gushyigikira ubukangurambaga bwo kurwanya irondaruhu
Umuyobozi wa Siporo wa Borussia Moenchengladbach, Max Eberl
Kyle Walker ahanganiye umupira na Alassane Plea
Lars Stindl atwara umupira Rodri wa Manchester City
Umutoza wa Manchester City, Pep Guardiola, atanga amabwiriza ku bakinnyi be
Abakinnyi ba Manchester City bishimira igitego cya mbere cyatsinzwe na Bernardo Silva
Raheem Sterling agerageza gusobanurira umusifuzi Artur Dias wayoboye umukino
Ederson Moraes atanguranwa umupira na Denis Zakaria

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .