Champions League: Liverpool yatsinzwe na Atlético Madrid, PSG itsindirwa mu Budage (Amafoto)

Yanditswe na Eric Tony Ukurikiyimfura
Kuya 19 Gashyantare 2020 saa 07:38
Yasuwe :
0 0

Atlético Madrid yo muri Espagne yatsinze Liverpool yo mu Bwongereza igitego 1-0 mu mukino ubanza wa 1/8 cy’irushanwa rya UEFA Champions League ryakomeje ejo hashize ku wa Kabiri tariki ya 18 Gashyantare 2020.

Atlético Madrid yari imbere y’abafana bayo, yatangiye umukino iri hejuru ndetse yashoboraga gufungura amazamu ku munota wa gatatu, umupira Diego Costa yahinduye imbere y’izamu ntiwagera kuri Álvaro Morata.

Liverpool ifite igikombe giheruka, yatsinzwe igitego hakiri kare, cyabonetse ku munota wa kane gusa gitsinzwe na Saul Niguez ku mupira wari uvuye muri koruneri, Fabinho wari Liverpool ananirwa kuwukura imbere y’izamu.

Ángel Correa na Álvaro Morata babonye kandi uburyo bwiza ku ruhande rw’iyi kipe yo muri Espagne, Liverpool itabarwa n’umunyezamu Alisson Becker.

Iyi kipe yo mu Bwongereza yabonye uburyo bubiri bukomeye muri uyu mukino, bwashobora kuyihesha kwishyura, ariko imipira ntiyagana mu izamu.

Igitego Liverpool yatsindiwe na Mohamed Salah ku munota wa 27, cyanzwe nyuma yo gusanga mugenzi we Roberto Firmino yari yaraririye.

Mohamed Salah yabonye uburyo bukomeye ku munota wa 53, umupira yateresheje umutwe ujya hanze mu gihe ishoti rikomeye ryatewe na Jordan Henderson na ryo ryanyuze ku ruhande rw’izamu rya Jan Oblak.

Umutoza Jürgen Klopp yakuyemo Sadio Mané igice cya mbere kirangiye na Mohamed Salah ku munota wa 72, bombi basimbuwe na Divock Origi na Alex Oxlade-Chamberlain, ariko ntacyo bahinduye ku mukino.

Undi mukino wabaye kuri uyu wa Kabiri, wasize Paris Saint-Germain itsindiwe mu Budage na Borussia Dortmund ibitego 2-1.

Dortmund ni yo yabanje gufungura amazamu ku gitego cyatsinzwe na Erling Braut Haaland ku munota wa 69 mbere y’uko Neymar yishyurira PSG ku wa 75 ku mupira yaherejwe na Kylian Mbappé.

Nyuma y’iminota ibiri, Haaland w’imyaka 19 ukomoka muri Norvège, yatsinze igitego cyahesheje Dortmund intsinzi mu mukino ubanza, ku ishoti yatereye ahagana ku murongo w’urubuga rw’amahina.

Imikino yo kwishyura izaba mu kwezi gutaha, ku wa Gatatu tariki ya 11 Werurwe 2020.

Uyu munsi ku wa Gatatu, hateganyijwe indi mikino ibiri ibanza ya 1/8, aho Atalanta yo mu Butaliyani yakira Valence C.F yo muri Espagne mu gihe Tottenham yo mu Bwongereza, yakira RB Leipzig yo mu Budage.

Amakipe yombi mu kibuga mbere y'uko umukino utangira
Umutoza Diego Simeone wa Atletico Madrid asuhuzanya na Jurgen Klopp wa Liverpool
Abakinnyi ba Liverpool bananiwe gukura umupira imbere y'izamu ubwo Atletico Madrid yatsindaga igitego
Saul Niguez atsinda igitego cya Atletico Madrid ari hagati ya Virgil van Djik n'umunyezamu Alisson
Niguez na bagenzi be bishimira igitego cyabonetse hakiri kare
Abakinnyi ba Atletico Madrid bagiye kwishimira igitego imbere y'abafana babo
Virgil van Dijk yitegereza nyuma y'uko ikipe ye itsinzwe igitego mu minota ya mbere
Umutoza Jurgen Klopp yasaga n'aho atishimiye imikinire y'abakinnyi be
Saul Niguez asoma ku kuboko kwe nyuma yo gutsindira kuri Stade yabo ya Wanda Metripolitano
Joe Gomez ashaka uko atwara umupira Alvaro Morata
Sadio Mane yagize amahirwe yo kudahabwa ikarita y'umuhondo ubwo yari ahanganiye umupira na Sime Vrsaljko
Andy Robertson wa Liverpool atera umupira n'umutwe
Mohamed Salah yari yizeye ko yatsinze igitego cyo kwishyura ariko Firmino yari yarariye
Alisson yakuyemo umupira ukomeye watewe na Morata
Firmino agerageza gucenga Morata na Koke bari bamusatiriye
Vrsaljko ahanganye na Sadio Mane
Mohamed Salah yifashe mu mutwe nyuma yo guhusha uburyo bwiza ku mupira yateresheje umutwe
Angel Correa ahanganiye umupira na Georginio Wijnaldum

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza