Curtis Jones yatsinze iki gitego ku munota wa 56 ku makosa y’umunyezamu André Onana wibwiye ko umupira wahinduwe na Neco Williams urenga, ariko uyu rutahizamu w’imyaka 19 wa Liverpool ahita awutera mu izamu.

Liverpool yakabaye yafunguye amazamu mu minota ya mbere y’umukino, ariko ishoti rikomeye ryatewe na Curtis Jones ari inyuma y’urubuga rw’amahina, risubizwa inyuma n’igiti cy’izamu.

Umunyezamu Caoimhin Kelleher wakinnye uyu mukino ku ruhande rwa Liverpool mu mwanya wa Alisson Becker wiyongereye ku bakinnyi benshi bavunitse, yitwaye neza muri uyu mukino, arokora ikipe ye.

Yabujije Ajax gutsinda ku buryo bwabonywe na Klaas-Jan Huntelaar ndetse na Antony Matheus dos Santos mu gihe Davy Klaassen na David Neres wateye umupira wakubise igiti cy’izamu, na bo babonye uburyo bukomeye muri uyu mukino ku ruhande rw’iyi kipe yo mu Buholandi.

Gutsinda uyu mukino byafashije Liverpool gukomeza muri 1/8 iyoboye itsinda D n’amanota 12 mu gihe Ajax yagumye ku manota arindwi ku mwanya wa gatatu.

Atalanta yo mu Butaliyani, yafashe umwanya wa kabiri n’amanota umunani nyuma yo kunganya na FC Midtjylland ya nyuma n’inota rimwe, igitego 1-1.

Inota FC Porto yabonye imbere ya Manchester City nyuma yo kunganya ubusa ku busa, ryayihesheje gukomeza ifite amanota umunani mu gihe iyi kipe yo mu Bwongereza yazamutse iyoboye itsinda C n’amanota 13. Muri iri tsinda, Olympique Marseille yabonye amanota ya mbere ubwo yatsindaga Olympiacos ibitego 2-1.

Mu itsinda A, Atlético Madrid yananiwe gutsinda Bayern Munich zinganya igitego 1-1. Iyi kipe yo muri Espagne ifite amanota atandatu ku mwanya wa kabiri mu gihe ikurikiwe na RB Salzburg yatsinze Lokomotiv Moscow ibitego 3-1, ikagira amanota ane mu gihe iyi ya nyuma ifite amanota atatu. Bayern Munich yamaze kuzamuka ari iya mbere n’amanota 13.

Mu itsinda B, Real Madrid ishobora gusezererwa cyangwa ikarokoka ku munsi wa nyuma, ni nyuma y’uko yatsinzwe na Shakhtar Donetsk ibitego 2-0, zikanganya amanota arindwi. Inter Milan yagize amanota atanu ku mwanya wa nyuma nyuma yo gutsinda Borussia Moenchengladbach ya mbere n’amanota umunani, ibitego 3-2.

Imikino iteganyijwe kuri uyu wa Gatatu:

Itsinda E

• FC Krasnodar vs Rennes (19:55)
• Seville vs Chelsea

Itsinda F

• Borussia Dortmund vs Lazio Roma
• Club Brugge vs Zenit St. Petersburg

Itsinda G

• Ferencvaros vs FC Barcelone
• Juventus vs Dynamo Kyiv

Itsinda H}

• Istanbul Basaksehir vs RB Leipzig (19:55)
• Manchester United vs Paris Saint-Germain

Klassen yananiwe gutsindira Ajax ku mupira yateye n'umutwe ugaca ku ruhande

Caoimhin Kelleher akuramo umupira watewe na Klaas-Jan Huntelaar

David Neres yahushije uburyo bwabazwe ku ruhande rwa Ajax

Sadio Mané agushwa na Perr Schuurs wa Ajax

Jones atsinda igitego mu gihe umunyezamu Onana yibwiraga ko umupira wagiye hanze

Curtis Jones w'imyaka 19, yishimira igitego yatsindiye Liverpool kikayihesha gukomeza

Abakinnyi ba Liverpool bishimira igitego cyatsinzwe na Curtis Jones

Andy Robertson yababariye muri uyu mukino ndetse ashobora kwiyongera ku bandi bakinnyi bavunitse

Kelleher akuramo uburyo bw'ishoti ryatewe na Davy Klassen mu gice cya mbere

Jurgen Klopp utoza Liverpool, yashimiye cyane Kelleher