Champions League: Ibigugu byahiriwe n’umunsi wa nyuma, amakipe 16 azakina 1/8 aramenyekana (Amafoto)

Yanditswe na Eric Tony Ukurikiyimfura
Kuya 12 Ukuboza 2019 saa 08:03
Yasuwe :
0 0

Imikino y’amatsinda y’irushanwa rihuza amakipe yabaye aya mbere iwayo ku mugabane w’Uburayi, UEFA Champions League, yaraye isojwe, aho umunsi wa gatandatu wahiriye amakipe akomeye, yose yitwaye neza.

Amakipe ya Atlanta na Atlético Madrid ni yo yabonye itike yo gukomeza muri 1/8 kuri uyu munsi wa nyuma.

Mu itsinda A, Real Madrid yari yakiriwe na Club Brugge yo mu Bubiligi, iyitsinda ibitego 3-1 bya Rodrigo Goes,Vinicius Junior na Luka Modrić.

Paris Saint Germain yanyagiye Galatasaray yo muri Turikiya, iyitsinda ibitego 5-0, aho abakinnyi bayo bose bakomeye barimo Mauro Icardi, Pablo Sarabia, Kylian Mbappé, Neymar Jr na Edinson Cavani babonye inshundura.

Iyi kipe yo mu Bufaransa yazamutse iyoboye itsinda n’amanota 16, ikurikiwe na Real Madrid yagize amanota 11 mu gihe Club Brugge ya gatatu, izakomereza muri Europa League.

Mu itsinda B, Tottenham n’umutoza wayo José Mourinho, batsindiwe mu Budage na Bayern Munch ibitego 3-1 byatsinzwe na Kingsley Coman, Thomas Muller na Philippe Coutinho. Igitego cy’iyi kipe yo mu Bwongereza cyatsinzwe n’umukinnyi ukiri muto, Ryan Sessegnon.

Muri iri tsinda kandi, Olympiacos yatsinze Crvena Zvezda igitego 1-0 yizera gukomereza muri Europa League nk’ikipe yabaye iya gatatu. Bayern yasoje iyi mikino y’amatsinda iyoboye n’amanota 18, ikurikiwe na Tottenham n’amanota 10 gusa.

Mu itsinda C ryabimburiye ayandi gukina, Manchester City yanyagiriye Dynamo Zagreb iwayo ibitego 4-1 birimo bitatu byatsinzwe na Gabriel Jesus mu gihe ikindi cyatsinzwe na Phil Foden.

Atalanta yabonye itike yo gukomeza muri 1/8 ubwo yatunguriraga Shakhtar Donetsk ku kibuga cyayo, iyitsinda ibitego 3-0.

Manchester City yazamutse ifite amanota 14, ikurikiwe na Atalanta yagize amanota arindwi mu gihe Shakhtar Donetsk izakomereza muri Europa League.

Mu itsinda D, Atlético Madtid na yo yakoze ibyo yasabwabga itsinda Locomotiv Moscow ibiteg 2-0 bya João Félix na Luis Felipe nubwo yahushije penaliti yatewe na Kieran Trippier.

Iyi ntsinzi yatumye iyi kipe yo muri Espagne izamuka ari iya kabiri n’amanota 10 inyuma ya Juventus yagize amanota 16 itsindiye Bayer Leverkusen iwayo ibitego 2-0 bya Cristiano Ronaldo na Gonzalo Huguain. Iyi kipe yo mu Budage yo izakomereza muri Europa League.

Nyuma y’iyi mikino y’amatsinda yasojwe, amakipe 16 yabonye itike yo gukomeza ni PSG, Real Madrid, Bayern Munich, Tottenham, Manchester City, Atalanta, Juventus, Atlético Madrid, Liverpool, Napoli, FC Barcelone, Borussia Dortmund, RB Leipzig, Lyon, Valence C.F na Chelsea.

Tombola y’uburyo aya makipe azahura muri 1/8 izaba ku wa Mbere tariki ya 16 Ukuboza 2019, aho nta kipe zo mu gihugu kimwe cyangwa izari mu itsinda rimwe zemerewe guhura.

Kinglsley Coman atsindira Bayern Munich igitego cya mbere ubwo yanyuzaga umupira ku munyezamu Paulo Gazzaniga
Coman yishimiye igitego ashushanya L akoresheje ikiganza
Bidatinze cyane, Tottenham yishyuriwe na Ryan Sessegnon w'imyaka 19
Uyu musore ukiri muto ukina iburyo nka myugariro, yishimira igitego yatsindiye kuri Allianz Arena
Thomas Muller yafashije Bayern Munich kubona igitego cya kabiri
Philippe Coutinho yatsinze igitego cyahesheje Bayern Munich kwizera amanota atatu
Coutinho yishimira igitego yatsinze muri uyu mukino
Bayern Munich ni yo kipe yazamutse itsinze imikino yayo yose uyu mwaka
Umutoza wa Tottenham Jose Mourinho aganira n'umwungiriza we Joao Sacramento
Coman yagowe n'ikibuga agwa nabi muri uyu mukino
Uyu musore w'Umufaransa yahise asimburwa na Thomas Muller

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza