Champions League: Bayern Munich yanyagiye Chelsea, FC Barcelone isezerera Napoli (Amafoto)

Yanditswe na Eric Tony Ukurikiyimfura
Kuya 8 Kanama 2020 saa 11:55
Yasuwe :
0 0

Imikino ibiri yo kwishyura itarabereye igihe muri 1/8 cy’Irushanwa rya UEFA Champions League, yabaye kuri uyu wa Gatandatu, yasize Bayern Munich inyagiye Chelsea ibitego 4-1 mu gihe FC Barcelone yatsinze Napoli ibitego 3-1.

Imikino yombi yagombaga kuba muri Werurwe, isubikwa n’uko i Burayi hari hamaze gukwirakwira icyorezo cya Coronavirus cyibasiye Isi.

Kuri Allianz Arena, Bayern Munich yari yakiriye Chelsea mu mukino wabereye mu muhezo nk’imwe mu ngamba zo kwirinda ikwirakwira rya Coronavirus.

Iyi kipe yo mu Budage, yari yatsinze ibitego 3-0 mu mukino ubanza wabereye mu Bwongereza n’ubundi yongeye gufungura amazamu hakiri kare ku gitego cyatsinzwe na Robert Lewandowski kuri penaliti nyuma y’ikosa yakorewe n’umunyezamu Willy Caballero ku munota wa 10.

Lewandowski yagize kandi uruhare mu gitego cya kabiri cyatsinzwe na Ivan Persić ku munota wa 24 mu gihe Callum Hudson-Odoi yabonye amahirwe yo kwishyurira Chelsea nyuma y’iminota ine, ariko ikoranabuhanga rya VAR rikagaragaza ko habayeho kurarira.

Habura umunota umwe ngo amakipe yombi ajye kuruhuka, Tammy Abraham yatsindiye Chelsea igitego kimwe yabonye muri uyu mukino ku makosa yakozwe n’umunyezamu Manuel Neuer.

Bayern Munich yashimangiye ngo itari ku rwego rwa Chelsea iyitsinda ibindi bitego bibiri mu minota 15 ya nyuma, ibifashijwemo na Corentin Tolisso na Lewandowski, ikomeza ku bitego 7-1 mu mikino yombi.

Undi mukino wabaye kuri uyu wa Gatandatu, wasize FC Barcelone isezereye Napoli yo mu Butaliyani ku bitego 4-2 mu mikino yombi, ni nyuma y’uko uwo kwishyura warangiye iyi kipe yo muri Espagne itsinze ibitego 3-1.

Igice cya mbere cy’uyu mukino wabereye muri Espagne, cyarangiye FC Barcelone ifite ibitego bitatu byatsinzwe na Clément Lenglet, Lionel Messi na Luis Suárez wacyinjije kuri penaliti mu gihe icya Napoli cyatsinzwe na Lorenzo Insigne kuri penaliti, na bwo mbere gato y’uko amakipe yombi ajya kuruhuka.

Imikino ya ¼ cya UEFA Champions League izakinwa ari umwe, aho yose izabera muri Portugal mu cyumweru gitaha.

Uko amakipe azahura:

  • Ku wa 12 Kanama: Atalanta vs PSG
  • Ku wa 13 Kanama: RB Leipzig na Atlético Madrid
  • Ku wa 14 Kanama: FC Barcelone vs Bayern Munich
  • Ku wa 15 Kanama: Manchester City vs Lyon
Willy Caballero yakoze ikosa ryavuyemo igitego cya mbere cya Bayern Munich kuri penaliti
Lewandowski afungura amazamu kuri penaliti yateye atareba
Ivan Perišić atsinda igitego cya kabiri cya Bayern Munich
Igitego cya Hudson-Odoi cyanzwe nyuma y'uko VAR igaragaje ko habayeho kurarira
Tammy Abraham ntiyishimiye igitego yatsindiye Chelsea
Frank Lampard utoza Chelsea, yasaga n'aho yamaze kwiyakira
Corentin Tolisso atsinda igitego cya gatatu cya Bayern Munich
Robert Lewandowski yazonze abakinnyi ba Chelsea muri uyu mukino yatsinzemo ibitego bibiri
Philippe Coutinho yagiye mu kibuga asimbura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .