CECAFA U-15: Amavubi mato yihanangirije Ethiopia, ayobora itsinda B

Yanditswe na Eric Tony Ukurikiyimfura
Kuya 21 Kanama 2019 saa 10:45
Yasuwe :
0 0

Ikipe y’Igihugu y’u Rwanda y’abatarengeje imyaka 15 ikomeje kwitwara neza mu irushanwa ry’abato rihuje ibihugu byo muri Afurika y’Iburasirazuba n’iyo Hagati muri Érythrée, aho yatsinze Ethiopia ibitego 3-0 mu mukino wa kabiri yakinnye kuri uyu wa Gatatu.

U Rwanda rwahise rufata umwanya wa mbere mu itsinda B kuko rwari rwatangiye rutsinda Sudani y’Epfo ibitego 3-0 mu mukino wabaye ku Cyumweru.

Igitego cya mbere cy’Amavubi U-15 cyatsinzwe na Iradukunda Siradji ku munota wa 36 ku mupira w’umuterekano watewe na Irahamye Eric.

Nyuma y’iminota ibiri, Iradukunda Pacifique yatsindiye Amavubi mato igitego cya kabiri mbere y’uko kapiteni wayo, Hoziyana Kenedy atsinda igitego cya gatatu mu gice cya mbere.

Umutoza w’Amavubi U-15, Rwasamanzi Yves, yashimiye abakinnyi be uko bakomeje kwitwara muri iri rushanwa ribayeho bwa mbere mu Karere.

Ati "Ndashimira abakinnyi banjye uko bitwaye uyu munsi. Twakinnye n’ikipe nziza, ntabwo twayemereye ko ikina ndetse twasabwaga kuyishyiraho igitutu kugira ngo tubone ibitego. Ni byiza ko twatsinze ibitego hakiri kare.”

Yakomeje avuga ko ubu amaso bayahanze umukino wa gatatu bazahuramo na Serengeti Boys ya Tanzania ku wa Gatanu.

Ati ”Ubu tugiye kwitegura umukino utaha tuzahuramo na Tanzania. Twiteze ko uzaba ari umukino ukomeye kandi tugomba guhatana cyane kugira ngo tugume ku mwanya wa mbere niba dushaka kugera muri ½.”

Undi mukino wo mu itsinda B wabaye kuri uyu wa 21 Kanama 2019, warangiye Tanzania inyagiye Sudani y’Epfo ibitego 6-0.

U Rwanda ruyoboye iri tsinda n’amanota atandatu, aho ruzigamye ibitego byinshi kurusha Uganda banganya amanota.

Tanzania ni iya gatatu n’amanota atatu mu gihe Ethiopia na Sudani y’Epfo zifite inota rimwe kugeza ubu.

Kuri uyu wa Kane hazaba imikino ibiri yo mu itsinda A, aho Somalia izahura na Sudani mu gihe Érythrée yakiriye irushanwa, izahura na Kenya kuri Asmara Stadium.

Muri iri tsinda, Kenya n’u Burundi zinganya amanota arindwi ku mwanya wa mbere, aho zikurikiwe na Érythrée ifite amanota atatu mu gihe Somalia na Sudani nta nota zirabona.

Amakipe abiri muri buri tsinda ni yo azabona itike yo gukomeza muri ½ kizakinwa tariki ya 28 Kanama mu gihe umukino wa nyuma uzaba tariki ya 30 mu Mujyi wa Asmara.

Ingimbi z'u Rwanda zatsinze umukino wa kabiri zahuyemo na Ethiopia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza