00:00:00 IGIHE NETWORK KN KINYARWANDA EN ENGLISH FR FRANCAIS

Casemiro yageze muri Man United, Chelsea itegereje Aubameyang, Tielemans bikomeje kugorana… Iminsi ya nyuma y’isoko i Burayi

Yanditswe na Byiringiro Osée Elvis
Kuya 20 August 2022 saa 11:43
Yasuwe :

Mu gihe habura iminsi 11 ngo isoko ry’igura n’igurisha rifunge ku mugabane w’i Burayi, amakipe akomeje kwiyubaka by’umwihariko ayagaragaje intege nke mu ntangiro za shampiyona.

Manchester United itaratsinda umukino kuva shampiyona yatangira, yaraye itangaje ko yamaze kwibikaho Umunya-Brésil, Casemiro ukina mu kibuga hagati yugarira, umwanya iyi kipe yari imaze igihe kinini idafiteho umukinnyi ukomeye.

Umutoza mushya w’iyi kipe, Eric ten Hag, yari amaze igihe yifuza umukinnyi ukina hagati mu kibuga by’umwihariko Frankie De Jong wanze kuva muri FC Barcelone, nyuma yo kubonako Fred na Scott McTominany batari ku rwego rwo hejuru.

Casemiro, umwe mu bakinnyi beza ku mwanya we ku Isi, yaguzwe miliyoni 59 z’ama-pound.

Ten Hag aracyakeneye umukinnyi wugarira ku ruhande rw’iburyo ndetse n’ukina imbere ku ruhande. Ni yo mpamvu yagiye muri Ajax gushakayo Anthony ariko miliyoni 80 z’ama-euro Manchester United yatanze Ajax yarazanze.

Iyi kipe kandi irashaka Cody Gakpo wa PSV Eindhoven no gutira Christian Pulisic muri Chelsea.

Bivugwa ko kandi mbere y’uko isoko rifunga, Wan Bissaka na Axel Tuanzebe bagomba kuba basohotse muri iyi kipe.

Indi kipe iri ku isoko cyane ni Chelsea y’umuherwe Toddy Boehly, ikomeje gushaka rutahizamu nyuma yo kurekura Romelo Lukaku na Timo Werner.
Umutoza Thomas Tuchel yagiye muri Barcelona gushaka Pierre Emerick Aubameyang banabanye muri Dortmund.

Chelsea ivuga ko izatanga Marco Alonso Barcelona yifuza, ikongeraho miliyoni 15 z’ama-pound ariko Barcelona yayanze. Umutoza Xavi ntiyifuza kurekura Aubameyang nubwo yazanye Lewandowski.

Chelsea kandi miliyoni 40 yatanze kuri Anthony Gordon wa Everton yanzwe. Iyi kipe kandi ikomeje kwifuza Wesley Fofana, myugariro wa Leicester na Frankie De Jong ukinira Barcelona.

Ni mu gihe Callum Hudson-Odoi akomeje kwifuzwa na Juventus na Dortmund nk’intizanyo.

Ikipe ya Arsenal yo isa nk’iri gusoza ibintu isoko nyuma yo kugura abakinnyi benshi bayobowe na Gabriel Jesus, Oleksandr Zinchenko n’abandi.

Iyi kipe y’umutoza Mikel Arteta ikomeje kwifuza Umubiligi Youri Tielemans ukinira Leicester City,

Isoko ry’igura n’igurishwa i Burayi rizafunga tariki 1 Nzeri 2022 saa tanu z’ijoro.

Ajax yanze miliyoni 80 z'ama-euro zatangwaga na Manchester United kuri Anthony
Wesley Fofana ari kwifuzwa na Chelsea
Casemiro yageze muri Manchester United
Youri Tielemans aracyategerejwe muri Arsenal

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .