00:00:00 IGIHE NETWORK KN KINYARWANDA EN ENGLISH FR FRANCAIS

Carrick yasezeye muri Man United, Cristiano Ronaldo ageza ku bitego 800 (Amafoto)

Yanditswe na Eric Tony Ukurikiyimfura
Kuya 3 Ukuboza 2021 saa 08:23
Yasuwe :

Cristiano Ronaldo wagejeje ibitego 801 kuva atangiye gukina, yafashije Manchester United gutsinda Arsenal ibitego 3-2 mu mukino w’umunsi wa 14 wa Premier League wakurikiwe no gusezera kwa Michael Carrick wari umaze imyaka 15 muri iyi kipe.

Muri uyu mukino wabereye kuri Old Trafford, Arsenal yafunguye amazamu ku munota wa 13 ku gitego cyinjijwe na Emile Smith Rowe, ariko mu buryo butavuzweho rumwe.

Smith Rowe yateye umupira mu izamu mu gihe umunyezamu David De Gea yari amaze umwanya muto aryamye hasi nyuma yo kuvunwa na mugenzi we Fred.

Nyuma yo kwitabaza ikoranabuhanga ry’amashusho ryifashishwa mu misifurire [VAR], umusifuzi Martin Atkinson yemeje igitego mu gihe abakinnyi ba Manchester United baburanaga bavuga ko umunyezamu yari yavunitse.

Abantu batandukanye bemeje ko cyagombaga kwemezwa nk’igitego kuko umusifuzi atigeze ahagarika umukino ubwo umunyezamu yagwaga ndetse akaba atigeze akorerwa ikosa n’umukinnyi wa Arsenal.

Byasabye Manchester United gutegereza umunota wa 43, yishyurirwa na Bruno Fernandes ku mupira yatsindiye mu rubuga rw’amahina nyuma yo guherezwa na Fred.

Hashize iminota irindwi amakipe yombi avuye kuruhuka, Cristiano Ronaldo yatsinze igitego cya kabiri cya Manchester United aherejwe na Marcus Rashford, ariko nyuma y’iminota ibiri cyishyurwa na Martin Odeegard waherejwe na Gabriel Martinelli.

Iki gitego cya Cristiano Ronaldo cyabaye icya 800 yatsinze kuva atangiye gukina nk’uwabigize umwuga ndetse ku munota wa 70 yatsinze icya 801, kikaba icya 130 muri Manchester United, kuri penaliti yateye nyuma y’ikosa Odeegard yakoreye kuri Fred waherejwe umupira na Jadon Sancho akagushwa mu rubuga rw’amahina.

Gutsinda uyu mukino byatumye Manchester United igira amanota 21 ku mwanya wa karindwi, irushwa abiri na Arsenal ya gatanu mu gihe Tottenham ifite umukino w’ikirarane, yagize 22 nyuma yo gutsinda Brentford ibitego 2-0 mu wundi mukino wabaye ku wa Kane.

Ubwo Manchester United yari imaze gutsinda Arsenal, yahise itangaza ko uwari wayisigaranye nk’umutoza, Michael Carrick, yasezeye.

Carrick yari umutoza w’ikipe ya mbere wungirije Ole Gunnar Solskjaer wirukanywe ku wa 21 Ugushyingo.

Uyu mugabo wari umaze imyaka 15 i Manchester, aho yabaye umukinnyi mu gihe cy’imyaka 12 agatwara ibikombe birimo UEFA Champions League ya 2008 na Premier League eshanu, yatoje imikino itatu iheruka, atsinda Villarreal na Arsenal mu gihe yanganyije na Chelsea.

Yasezeye mu gihe Manchester United yamaze kwemeza Umudage Ralf Rangnick uzayitoza kugeza ku mpera z’uyu mwaka w’imikino ndetse akaba yarebye uyu mukino wabaye ku wa Kane.

Emile Smith Rowe yafunguye amazamu ku ishoti yateye ubwo umunyezamu De Gea utagaragara mu ifoto yari aryamye hasi nyuma yo kuvunika
Nyuma y'iminota y'urujijo igitego cyemejwe ku ruhande rwa Arsenal
Bayobowe na Fred,, abakinnyi ba Manchester United baburanye n'umusifuzi Martin Atkinson ko igitego kitakwemezwa
Bruno Fernandes yishyuriye Manchester United ku mupira yaherejwe na Fred
Cristiano Ronaldo yatsinze igitego cya kabiri nyuma y'iminota irindwi amakipe yombi avuye kuruhuka
Iminota mike nyuma y'igitego cya Ronaldo, Odeegard yahise yishyurira Arsenal
Martin Odegaard akorera ikosa kuri Fred ryavuyemo igitego cya gatatu cya Manchester United
Cristiano Ronaldo yatsinze igitego cya gatatu kuri penaliti kiba icya 801 kuva atangiye gukina
Michael Carrick yasezeye muri Manchester United yari amazemo imyaka 15
Ralf Rangnick ugiye gutoza Manchester United yarebye uyu mukino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .