CAN 2021 yasimbujwe CHAN 2020, CAF ifata indi myanzuro ku marushanwa itegura

Yanditswe na Eric Tony Ukurikiyimfura
Kuya 30 Kamena 2020 saa 04:08
Yasuwe :
0 0

Impuzamashyirahamwe y’Umupira w’Amaguru muri Afurika (CAF) yemeje ko Igikombe cya Afurika cya 2021 cyagombaga kubera muri Cameroun mu mwaka utaha, kimuriwe muri Mutarama 2022.

Kuri uyu wa Kabiri nibwo habaye inama ya Komite Nyobozi ya CAF yateranye hifashishijwe ikoranabuhanga ry’amashusho.

Yari igamije gufata ibyemezo no kwiga ahazaza h’umupira w’amaguru wa Afurika nyuma y’uko ugizweho ingaruka n’icyorezo cya Coronavirus cyibasiye Isi.

Perezida wa CAF, Ahmad Ahmad, yemeje ko Igikombe cya Afurika cya 2021 cyari kubera muri Cameroun guhera tariki ya 9 Mutarama kugeza ku wa 6 Gashyantare 2021, kimuriwe muri Mutarama 2022.

Iri rushanwa rizahuza amakipe 24, ryimuwe bitewe n’uko kugeza ubu hakinwe imikino ibiri gusa y’amatsinda yo gushaka itike yo kuryitabira mu gihe indi ine isigaye, byari biteganyijwe ko izaba yarangiye mu Ukwakira.

Mu cyumweru gishize, Ishyirahamwe ry’Umupira w’Amaguru ku Isi (FIFA) ryatangaje ko Umugabane wa Afurika uri mu itemerewe gutegura imikino mpuzamahanga kugeza muri Nzeri uyu mwaka.

Hemejwe ko CAN 2021 isimbuzwa Igikombe cya Afurika cy’abakina imbere mu bihugu byabo (CHAN 2020) cyagombaga kubera muri Cameroun hagati ya tariki ya 4 n’iya 25 Mata 2020.

Ku bijyanye n’amarushanwa y’amakipe, CAF yemeje ko imikino ya kimwe cya kabiri n’umukino wa nyuma, izakinirwa hamwe (hazaba umukino umwe gusa muri kimwe cya kabiri) muri Cameroun muri Nzeri muri CAF Conferederation Cup nayo yari igeze muri icyo cyiciro, izasorezwa muri Maroc.

Hemejwe ko kandi Igikombe cya Afurika cy’Abagore cyagombaga kuba mu Ugushyingo uyu mwaka, gikuweho mu rwego rwo kugira ngo hitegurwe itangizwa rya Champions League ya 2021 izahuza amakipe y’abagore yo kuri uyu mugabane.

CAN 2021 yimuriwe muri Mutarama 2022

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .