CAF yatangaje imijyi izakira umukino wa nyuma wa Champions League n’uwa Confederation Cup

Yanditswe na Eric Tony Ukurikiyimfura
Kuya 16 Werurwe 2020 saa 08:46
Yasuwe :
0 0

Impuzamashyirahamwe y’Umupira w’Amaguru muri Afurika (CAF) yemeje ko Umujyi wa Douala muri Cameroun ari wo uzakira umukino wa nyuma wa CAF Champions League 2020 mu gihe uwa Confederation Cup uzabera i Rabat muri Maroc.

Muri Nyakanga 2019 nibwo CAF yemeje ko amarushanwa yombi azajya asozwa n’umukino wa nyuma umwe uzajya ubera ku kibuga cyihariye.

Kuri uyu wa Mbere tariki ya 16 Werurwe 2020, CAF yemeje ko umukino wa nyuma w’irushanwa rihuza amakipe yabaye aya mbere iwayo, CAF Champions League, uyu mwaka uzakinirwa kuri Stade nshya ya Japoma iherereye mu Mujyi wa Douala muri Cameroun, tariki ya 29 Gicurasi 2020.

Stade Mohammed V yo mu Mujyi wa Casablanca muri Maroc na Stade Olympique de Radès yo muri Tunisia, na zo zari zasabye kwakira uyu mukino wa nyuma.

Kugeza ubu irushanwa rya CAF Champions League rigeze muri ½, aho Raja Casablanca yo muri Maroc izahura na Zamalek yo mu Misiri mu gihe Wydad Casablanca yo muri Maroc izahura na Al Ahly yo mu Misiri.

CAF yemeje ko kandi umukino wa nyuma wa Confederation Cup ihuza amakipe yatwaye ibikombe iwayo, uzabera kuri Prince Moulay Abdellah Sports Stadium iri mu Mujyi wa Rabat muri Maroc, tariki ya 24 Gicurasi 2020.

Iri rushanwa rigeze muri ½, aho Pyramids FC yo mu Misiri izahura na Horoya FC yo muri Guinée mu gihe RS Berkane na Hassania Agadir zo muri Maroc nazo zizahura mu wundi mukino uzaba muri Gicurasi mu gihe nta mpinduka zibayeho bitewe n’icyorezo cya Coronavirus cyibasiye Isi, cyatumye byinshi mu bikorwa by’imikino bisubikwa.

Aya marushanwa yombi yatangiye kuba mu myaka 55 ishize, yari asanzwe asozwa n’imikino ibiri ya nyuma, aho buri kipe yagiraga umukino umwe yakira, hakabaho ubanza n’uwo kwishyura.

Stade Pajoma yo muri Cameroun niyo izakira umukino wa nyuma wa CAF Champions League
Prince Moulay Abdellah Sports Stadium yo muri Maroc, izakira umukino wa nyuma wa CAF Confederation Cup 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza