Ku mugoroba wo ku wa Mbere, nibwo CAF yagaragaje bamwe mu bagomba gutoranywamo ab’indashyikirwa bahize abandi muri ruhago.

Muri abo harimo Simon Adingra wo muri Côte d’Ivoire, Serhou Guirassy w’Umunya-Guinea, Achraf Hakimi wo muri Maroc, Ademola Lookman wa Nigeria ndetse na Ronwen Williams wo muri Afurika y’Epfo. Aba bose bitwaye neza mu Gikombe cya Afurika cya 2023.

Aba bakinnyi batanu bari kumwe na bagenzi babo batakomeje aribo Amine Gouiri, Edmond Tapsoba, Chancel Mbemba, Soufiane Rahimi na William Troost-Ekong.

Si ibi bihembo bizatangwa gusa, kuko hari igihataniwe cy’umunyezamu mwiza uzava hagati ya André Onana, Yahia Fofana, Mostafa Shobeir, Stanley Nwabali na Ronwen Williams.

Abatoza beza bazatoranywa hagati ya Pedro Gonçalves wa Angola, Emerse Faé wa Côte d’Ivoire, Sébastien Desabre wa RDC, Marcel Koller wa Al Ahly na Hugo Broos wa Afurika y’Epfo.

Umuhango wo gutanga ibihembo ku mukinnyi wahize abandi kugeza, biteganyijwe kuba tariki ya 16 Ukuboza 2024, bikazabera muri Maroc mu mujyi wa Marrakech.

Achraf Hakimi ukinira Maroc na Paris Saint-Germain ari mu bahabwa amahirwe yo kwegukana igihembo cy'umukinnyi mwiza

Ademola Lookman ni umwe mu bakinnyi ngenderwaho ba Nigeria

Simon Adingra wa Côte d’Ivoire ni umwe mu bakinnyi b'Abanyafurika bahagaze neza

Serhou Guirassy ari muri batanu bazaba bahataniye igihembo cy'uwahize abandi muri Afurika

Umunyezamu Ronwen Williams ahatanye mu byiciro bibiri by'umukinnyi w'Umunyafurika wahize abandi

André Onana ari mu bahataniye igihembo cy'umunyezamu mwiza w'Umunyafurika

Emerse Faé utoza Côte d'Ivoire ari mu batoza bazatoranywamo umwiza