CAF Confederation Cup: AS Kigali yananiwe gutsindira Proline FC i Nyamirambo (Amafoto)

Yanditswe na Eric Tony Ukurikiyimfura
Kuya 14 Nzeri 2019 saa 08:42
Yasuwe :
0 0

AS Kigali yananiwe gutsinda Proline FC yo muri Uganda mu mukino ubanza w’ijonjora rya kabiri rya CAF Confederation Cup wabereye kuri Stade ya Kigali i Nyamirambo kuri uyu wa Gatandatu, amakipe yombi anganya igitego 1-1.

Ikipe y’Umutoza Nshimiyimana Eric, yari ifite abakinnyi bashya yaguze barimo abanyamahanga bane, aho mu minsi ishize bemerewe gukina aya marushanwa ya CAF mu gihe kapiteni wayo, Niyonzima Haruna ibye bitarakemuka naho Kalisa Rashid akaba arwaye.

Rick Martel Allogo Mba na Makon Nloga bagiriwe icyizere cyo kubanza mu kibuga mu gihe Aristide Patrick Essombe na Ndayishimiye Eric ‘Bakame’ babanje ku ntebe y’abasimbura.

Ikipe y’Umujyi wa Kigali yabuze amahirwe yo gufungura amazamu hakiri ku mupira watereshejwe umutwe na Bishira Latif, ugarurwa n’izamu ku munota wa gatatu mu gihe nyuma y’iminota 10, na bwo Rick Martel yateye ishoti ridakanganye ryafashwe n’umunyezamu Hassan Matovu.

Mu minota yakurikiyeho, Proline FC yiganjemo abakinnyi bakiri bato, yahise itangira gusatira AS Kigali, iyikinisha umukino wihuta ndetse wo gusatira cyane, abakinnyi ba AS Kigali ntibongera gutindana umupira igihe kirekire.

Iyi kipe yo muri Uganda byayihiriye nyuma y’iminota ibiri gusa amakipe yombi avuye kuruhuka, ifungura amazamu ku gitego cyatsinzwe na Bright Anukani ku ishoti rikomeye yatereye muri metero nka 25, umunyezamu Bate Shamiru ntiyabasha kugera ku mupira.

Nshimiyimana Eric wabonaga ko ikipe ye ikomeje kurushwa ku buryo bugaragarira buri wese, yakuyemo Makon Nloga, ashyiramo Benedata Janvier mbere y’uko igice cya kabiri gitangira mu gihe Ssentongo Farouq yasimbuye Rick Martel ku munota wa 57.

Nsabimana Eric yananiwe gutsindira AS Kigali ku mupira wari uturutse kuri Bishira Latif, ari mu rubuga rw’amahina, awutera hanze mbere y’uko abona ubundi buryo bwiza, ananirwa gukora ku mupira wahinduwe na Nshimiyimana Ibrahim ku munota wa 70.

Kwinjiza mu kibuga Cyitegetse Bogarde mu minota ya nyuma, afashe umwanya wa Nshimiyimana Ibrahim, byongeye imbaraga ku ruhande rwa AS Kigali yabonye igitego cyo kwishyura ku munota wa 85, gitsinzwe na Ssentongo Farouq kuri penaliti, ni nyuma y’uko Saka Mpiima yari amaze gukora umupira n’ikiganza.

Nkinzingabo Fiston yananiwe gutsindira AS Kigali igitego cy’impamba mu minota y’inyongera, umukino urangira amakipe yombi anganyije 1-1.

Umukino wo kwishyura uzabera i Kampala mu byumweru bibiri biri imbere, tariki ya 28 Nzeri 2019, aho ikipe izakomeza mu ijonjora rya nyuma, izahura n’imwe mu makipe yasezerewe muri CAF Champions League mbere yo kugera mu matsinda.

Abakinnyi bitabajwe ku mpande zombi:

AS Kigali: Bate Shamiru, Rusheshangoga Michel, Ishimwe Christian, Songayingabo Shaffy, Bishira Latif, Ntamuhanga Tumaine (C), Alongo Mba Rick, Makon Nloga Thierry, Nshimiyimana Ibrahim, Nsabimana Eric, Nkizingabo Fiston.

Proline FC: Hassan Matovu, Saka Mpiima, Mukisa Yusuf, Mujuzi Musitafa (c), Bernard Muwanga, Wammanah Ibrahim, Begisa James, Anukani Bright, Ivan Bogere, Hamisi Kizza, Kiwanuka Hakim.

Hassan Matovu ntiyashoboye gukuramo penaliti yatewe na Ssentongo Farouq
Nsabimana Eric (ufite umupira) na Ssentongo Farouq bahise bawujyana mu kibuga hagati kuko iminota yari yagiye
Okiringi akuraho umupira ubwo yari asatiriwe na Ishimwe Christian
Aristide Patrick Essombe ntabwo yitabajwe kuri uyu mukino
Isiagi Okiring ahanganiye umupira na Ntamuhanga Tumaini
AS Kigali ntiyabyaje umusaruro iminota ine y'inyongera
Makon Thierry Nloga ahanganiye umupira n'abakinnyi ba Proline FC
Ring Nyier Akech Malong wo muri Sudani y'Epfo, ni we wayoboye uyu mukino
Rutahizamu wa AS Kigali, Rick Martel Mba afungisha umupira igituza
Rusheshangoga Michel ahanganiye umupira na Hakim Kiwanuka

Kalisa Rashid (wa kabiri uturutse ibumoso), Niyonzima Haruna (ufite ikibazo cy'ibyangombwa) na Hategekimana Bnnheur ntabwo bitabajwe kuri uyu mukino. Aha bari kumwe n'Umunyamategeko w'Ishyirahamwe ry'Umupira w'Amaguru mu Rwanda (Ferwafa), Karangwa Jules
Umutoza wa AS Kigali Nshimiyimana Eric atanga amabwiriza ku bakinnyi be
Ba kapiteni bombi: Ntamuhanga Tumaini na Musitafa Mujuzi bafata ifoto hamwe n'abasifuzi bo muri Sudani y'Epfo
Mathias Lule utoza Proline FC
Abasimbura ba AS Kigali
Abakinnyi ba AS Kigali babanje mu kibuga
Abakinnyi babanjemo ku ruhande rwa Proline FC

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza