Byitezwe ko Ronald Koeman agirwa umutoza mushya wa FC Barcelone

Yanditswe na Eric Tony Ukurikiyimfura
Kuya 17 Kanama 2020 saa 04:22
Yasuwe :
0 0

Umuholandi Ronald Koeman w’imyaka 57, ni we ushobora kugirwa umutoza mushya wa FC Barcelone iteganya kwirukanwa Quique Sétien, nyuma yo gusezererwa na Bayern Munich muri UEFA Champions League, itsinzwe ibitego 8-2.

Ibinyamakuru byinshi byo muri Espagne bikomeje gutangaza ko Koeman ashobora kwemezwa nk’umutoza mushya wa FC Barcelone muri iki cyumweru mu gihe kuri uyu wa Mbere habaye inama yigiwemo ahazaza h’umutoza Quique Sétien.

Bivugwa ko icyemezo cyo kwirukana Sétien wari umaze amezi umunani gusa asimbuye Ernest Valverde wirukanywe muri Mutarama, cyafashwe mu karuhuko k’umukino FC Barcelone yanyagiwemo na Bayern Munich ibitego 8-2 ku wa Gatanu.

Ikinyamakuru Mundo Deportivo cyatangaje ko Ronald Koeman ashobora kugaruka i Camp Nou kuko ibijyanye n’amasezerano ye aribyo bikiri gutunganywa nyuma y’uko FC Barcelone iganiriye n’Ishyirahamwe ry’Umupira w’Amaguru mu Buholandi, aho yatozaga ikipe y’Igihugu.

Cyakomeje kivuga ko Koeman azasinya imyaka ibiri ku buryo ibyo guhabwa amasezerano y’igihe kirekire byazaterwa n’ibizava mu matora y’umuyobozi w’iyi kipe ateganyijwe mu mwaka utaha.

Ku rupapuro rwacyo rubanza, ikinyamakuru Sports cyanditse ko Sétien yirukanywe nyuma yo gukoza isoni FC Barcelone igatsindwa ibitego 8-2 mu mukino wa ¼ wa UEFA Champions League wabaye mu ijoro ryo ku wa Gatanu.

Kivuga ko Ronald Koeman n’uwahoze ari umutoza wa Tottenham, Mauricio Pochettino ari bo bahabwa amahirwe yo kwegukana aka kazi muri FC Barcelone.

Hejuru y’ibi, Sports yatangaje ko kandi FC Barcelone ishobora kugarura Neymar wayivuyemo mu 2017 akerekeza muri Paris Saint-Germain.

Bivugwa ko kugira ngo Barcelone ibone amafaranga yo kugura Neymar, yiteguye gutanga Antoine Griezmann uhabwa agaciro ka miliyoni 55£.

Ikinyamakuru AS, cyo cyavuze ko Koeman ari we mutoza mushya wa FC Barcelone ndetse icyo azakora mbere na mbere ari ugukora ivugurura mu bakinnyi bayo.

Abakinnyi barindwi kivuga ko bashobora guhita bagurishwa barimo Ivan Rakitić, Ousmane Dembélé, Arturo Vidal, Arthur Melo, Junior Firpo, Martin Braithwaite na Samuel Umtiti.

Melo yamaze kumvikana na Juventus mu gihe Rakitić na Vidal na bo bavugwa mu makipe yo mu Butaliyani.

FC Barcelone ifite icyizere ko ishobora kubona miliyoni 90£ muri aba bakinnyi bose kugira ngo yubake ikipe ikomeye nyuma yo kumara umwaka idatwaye igikombe, ibintu byaherukaga mu mwaka w’imikino wa 2007/08.

Ibinyamakuru bitandukanye byo muri Espagne bivuga ko Ronald Koeman azemezwa nk'umutoza mushya wa FC Barcelone muri iki cyumweru
Koeman wakiniye FC Barcelone akanayibera umutoza wungirije, kuri ubu ni umutoza w'ikipe y'Igihugu y'u Buholandi
Umutoza wa FC Barcelone, Quique Setién w'imyaka 61, ashobora kwirukanwa igihe icyo aricyo cyose
Bivugwa ko FC Barcelone ishaka kugarura Neymar wayivuyemo mu 2017 ajya muri PSG

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .