00:00:00 IGIHE NETWORK KN KINYARWANDA EN ENGLISH FR FRANCAIS

Byasabye igitego cyo ku munota wa nyuma ngo APR FC yikure imbere ya Musanze (Amafoto)

Yanditswe na Byiringiro Osée Elvis
Kuya 20 August 2022 saa 07:35
Yasuwe :

Bigoranye, APR FC yatsinze Musanze FC ibitego 2-1 mu mukino w’umunsi wa mbere wa shampiyona aho igitego cy’intsinzi cyabonetse mu minota ya nyuma kuri iyi kipe y’Ingabo z’Igihugu.

Wari umukino wa mbere wa shampiyona ku mpande zombi, wasozaga iyakinwe kuri uyu wa Gatanu.

Ni umukino watangiye ushyushye cyane ishyaka ari ryose ku mpande zombi, ku munota wa 20 Musanze FC yazamukanye neza umupira ariko Niyomugabo Claude arahagoboka awushyira muri koroneri.

Ku munota wa 23, Ishimwe Christian ukina inyuma ku ruhande rw’ibumoso muri APR FC, azamukanye umupira ahererekanya neza na Manishimwe Djabel ariko bawugaruye mu rubuga rw’amahina rwa Musanze, Ruboneka Jean Bosco awushyira hejuru y’izamu.

Rutahizamu wa Musanze FC, Peter Abglevor, wari wazonze APR FC; ku munota wa 38 yazamukanye umupira neza areba uko umuzamu Ishimwe Pierre ahagaze arekura ishoti rikomeye, igitego cya mbere kiba kirinjiye.

Mu minota itatu y’inyongera APR FC yatatse cyane ishaka kugombora maze Ishimwe Christian wacaga imbere ku ruhande rw’ibumoso azamukana umupira neza awuhereza Mugunga Yves yishyura igitego akoresheje umutwe. Igice cya mbere cyarangiye amakipe yombi aguye miswi ku gitego 1-1.

Cyari igice cya mbere kiryoshye ku buryo byari bigoye kureba ku ruhande cyangwa kugira utundi wahugiramo.

Amakipe yombi yatangiranye igice cya Kabiri umuvuduko n’ishyaka nk’uko yasoje icya mbere, ariko APR FC isatira kurusha Musanze.

Ikipe y’Ingabo yakomeje gukora impinduka ishyiramo Kwitonda Alain uzwi nka Bacca na Bizimana Yannick ariko Musanze ikomeza kuzibira neza.

Musanze yageze aho iryama mu izamu ntiyongera gusatira nko mu gice cya mbere, ariko ntibyayihira kuko mu minota itanu y’inyongera APR FC yabonye Coup Franc ubundi Ruboneka aha umupira Mugunga awutera akoresheje umutwe, umuzamu Ntaribi Steven awukuramo usanga Bizimana atsinda igitego cya kabiri.

Ni igitego cyahembuye imitima y’abakunzi ba APR FC bari bihebye bitewe n’aho umukino wari ugeze.

Uko imikino y’umunsi wa mbere wa Shampiyona y’u Rwanda yagenze

Ku wa Gatanu, tariki ya 19 Kanama 2022

– AS Kigali 2-0 Etincelles FC

– Sunrise FC 1-0 Police FC

– Espoir FC 1-0 Marines FC

– APR FC 2-1 Musanze FC

Imikino iteganyijwe ku wa Gatandatu, tariki ya 20 Kanama 2022

– Bugesera FC VS Kiyovu Sports [Stade ya Bugesera: Saa 15:00]

– Rwamagana City VS Gorilla FC [Stade ya Ngoma: Saa 15:00]

– Gasogi United VS Mukura VS & L [Stade ya Kigali: Saa 15:00]

– Rayon Sports FC VS Rutsiro FC [Stade ya Kigali: Saa 18:30]

Biteganyijwe nyuma y’umunsi wa mbere, hazafatwa akaruhuko abakinnyi bakajya mu mwiherero w’Ikipe y’Igihugu Amavubi wo kwitegura imikino ya CHAN 2023 izabera muri Algérie.

Abakinnyi 11 babanje mu kibuga ku ruhande rwa APR FC bari biganjemo abo yakinishaga umwaka ushize
Abakinnyi 11 babanje mu kibuga ku ruhande rwa Musanze FC
Abanya-Musanze bari babukereye, bakoze ku ngoma zabo kugira ngo bashyigikire ikipe bihebeye
Ibyishimo byari byose ku bafana
APR FC yanyuzagamo ikiharira umupira cyane cyane mu gice cya kabiri
Abari kuri Stade ya Kigali i Nyamirambo babonye umukino w'imbaraga
Mugunga yashimiye Imana nyuma yo gufasha APR FC kwishyura
Mugunga Yves yerekanye ko ari rutahizamu ukomeye mu Rwanda
APR FC yatangiye neza shampiyona, irashaka kwisubiza igikombe ibitse
Abakinnyi ba APR FC bishimira igitego cya mbere cyatsinzwe na Mugunga Yves
Kwitonda Alain yagerageje uburyo bwinshi bwashoboraga kubyarira APR FC igitego mu gice cya mbere cy'umukino
Wari umukino uryoheye ijisho kandi w'imbaraga ku mpande zombi cyane cyane mu gice cya mbere
Ibyishimo byarenze Bizimana Yannick maze akuramo umupira mu kwishimira igitego
Mu gice cya mbere cy'umukino, Musanze FC yakinnye umupira wo ku rwego rwo hejuru
Byari ibyishimo ku bakinnyi ba APR FC babonye intsinzi bayivunikiye
Bizimana Yannick ni we wafashije APR FC gucyura amanota atatu y'umunsi wa mbere mu mukino w'ishiraniro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .