Bugesera FC yahize gutsinda Mukura VS ku mukino wa mbere uzatozwa na Masudi Djuma

Yanditswe na Eric Tony Ukurikiyimfura
Kuya 22 Ugushyingo 2019 saa 07:51
Yasuwe :
0 0

Ikipe ya Bugesera FC yatangaje ko yiteguye gutsinda Mukura Victory Sports mu mukino w’umunsi wa cyenda wa Shampiyona uzahuza amakipe yombi ku Cyumweru kuri Stade ya Bugesera saa cyenda.

Bugesera FC ya 12 n’amanota umunani, izakira Mukura Victory Sports ya gatatu n’amanota 17 mu mukino uzaba ku Cyumweru.

Uyu uzaba ari umukino wa mbere ku mutoza Masudi Djuma uherutse kwemezwa nk’umutoza wa Bugesera FC mu minsi ishize, aho yasimbuye Bisengimana Justin wirukanwe ashinjwa umusaruro mubi mu mikino umunani yabanje.

Mu kiganiro yagiranye na IGIHE, Umunyamabanga Mukuru wa Bugesera FC, Karenzi Sam, yavuze ko biteguye neza uyu mukino ndetse bashaka gutsinda Mukura Victory Sports bakayifatanya n’inzara ifite, aho bivugwa ko imaze amezi atatu idahemba abakinnyi bayo.

Ati” Ni umukino twiteguye neza ku ruhande rwa Bugesera kuko turashaka kongera kwerekana ko turi ikipe nziza. Mukura tuzayifatanya n’inzara, barashonje turabizi, aho batuye ku Itaba Imbabura ziramanitse.”

Agaruka ku mutoza Masudi Djuma, Karenzi yavuze ko Abanya-Bugesera bagiye kubona ibishya kuko kuri ubu ikipe yabo igiye kugaruka mu bihe byo gutsinda.

Ati” Ni umukino wa mbere kuri Commando [nk’uko Masudi bamwita], Abanya-Bugesera bazaze birebere ko ibintu byahindutse. Ubu ni ugutsinda nta kindi.”

Masudi watwaye Shampiyona y’u Rwanda ari muri Rayon Sports mu 2017, hitezwe kureba uko azitwara muri Bugesera FC nyuma y’uko adahiriwe n’amezi atandatu yamaze muri AS Kigali mu mwaka ushize w’imikino.

Mu mikino umunani imaze guhuza amakipe yombi kuva Bugesera FC izamutse mu cyiciro cya mbere, iyi kipe yo mu Ntara y’Iburasirazuba yatsinzemo itatu, Mukura Victory Sports itsinda ine mu gihe zanganyije inshuro imwe.

Mu mikino ine zahuriye mu Bugesera, iyi kipe yari mu rugo yatsinzemo itatu, itsindwa umwe ku bitego 3-0 mu mukino uheruka guhuza amakipe yombi mu mwaka ushize w’imikino.

Gahunda y’umunsi wa cyenda wa Shampiyona

Ku wa Kane tariki ya 21 Ugushyingo 2019

  • Gasogi United 1-1 Musanze FC

Ku wa Gatanu tariki ya 22 Ugushyingo 2019

  • Sunrise FC vs Heroes FC (Nyagatare Stadium, 15h00)
  • APR FC vs Espoir FC (Stade de Kigali, 15h00)

Ku wa Gatandatu tariki ya 23 Ugushyingo 2019

  • Marines FC vs AS Muhanga (Umuganda Stadium, 15h00)
  • AS Kigali vs Kiyovu Sports (Stade de Kigali, 15h00)

Ku Cyumweru tariki ya 24 Ugushyingo 2019

  • Gicumbi FC vs Rayon Sports FC (Stade de Kigali, 15h00)
  • Bugesera FC vs Mukura VS (Stade Bugesera, 15h00)
  • Etincelles FC vs Police FC (Stade Umuganda, 15h00)
Umunyamabanga Mukuru wa Bugesera FC, Karenzi Sam, yavuze ko biteguye gutsinda Mukura Victory Sports ku Cyumweru bakayifatanya n'inzara
Bugesera FC ikunze kwitwara neza mu mikino yayihuje na Mukura Victory Sports mu rugo
Mukura VS ya gatatu ku rutonde rwa Shampiyona, izajya mu Bugesera ishaka kongera kuhakura intsinzi nk'uko byagenze mu mwaka ushize w'imikino
Masudi Djuma agiye gutoza umukino wa mbere muri Bugesera FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza