00:00:00 IGIHE NETWORK KN KINYARWANDA EN ENGLISH FR FRANCAIS

Brésil yatangiye Copa América inyagira Venezuela yugarijwe na COVID-19 (Amafoto)

Yanditswe na Eric Tony Ukurikiyimfura
Kuya 14 Kamena 2021 saa 11:43
Yasuwe :
0 0

Ibifashijwemo na Neymar, ikipe y’Igihugu ya Brésil yatangiye neza Copa América, itsinda Venezuela ibitego 3-0 mu mukino ufungura irushanwa wabaye mu ijoro ryakeye.

Neymar uri mu bakinnyi bahanzwe amaso muri iri rushanwa, yatsinze igitego kimwe, atanga umupira wavuyemo ikindi ku ruhande rw’ikipe y’umutoza Tite iri gukinira mu rugo.

Marquinhos usanzwe ukinira Paris Saint-Germain, yafunguye amazamu ku munota wa 23 ku mupira wari uvuye muri koruneri, abakinnyi ba Venezuela bananirwa kuwukuraho.

Richarlison yatsinze igitego cyanzwe mu gice cya mbere, iminota mike mbere y’uko Neymar ahusha uburyo bwabazwe ari imbere y’izamu.

Byasabye gutegereza umunota wa 64, Neymar atsinda igitego cya kabiri kuri penaliti yahawe ubwo Yohan Cumana yari amaze gukorera ikosa kuri Danilo mu rubuga rw’amahina.

Iki gitego cyabaye icya 67 Neymar atsindiye Brésil ndetse kuri ubu arushwa ibitego 10 na Pelé watsindiye byinshi iki gihugu.

Ku munota wa 89 ni bwo Neymar yacenze umunyezamu Joel Graterol mbere yo guhindura umupira washyizwe mu izamu na Barbosa ku gitego cya gatatu.

Brésil imaze kwegukana Copa América inshuro icyenda, yatwaye iri rushanwa mu 2019, biba inshuro imwe mu myaka 12 ishize.

Copa América iri kuba ku nshuro ya 47, yari kuba mu mwaka ushize, ariko yimurirwa muri uyu mwaka wa 2021 kubera icyorezo cya Coronavirus.

Iri rushanwa ryajyanywe muri Brésil nyuma y’uko Colombia na Argentine bivuze ko bidashobora kuryakira.

Muri Gicurasi ni bwo Impamashyirahamwe y’Umupira w’Amaguru muri Amerika y’Epfo (CONMEBOL) yavuze ko Colombia idashobora gufatanya na Argentine kuryakira kubera imyigaragambo yabaye muri icyo gihugu.

Ubwandu bwa COVID-19 bwinshi bwagaragaye muri Argentine ni bwo bwatumye na yo itabasha kwakira iri rushanwa ryitabiriwe n’amakipe 10, aho rizasozwa tariki ya 10 Nyakanga.

Venezuela yakinnye na Brésil nyuma y’umunsi umwe igaragayemo ubwandu 12 bwa COVID-19 mu bakinnyi n’abatoza bayo.

Undi mukino wabaye ku munsi wa mbere, warangiye Colombia itsinze Ecuador igitego 1-0 cyinjijwe na Edwin Cardona.

Itsinda B rya Copa América 2021 rigizwe na Brésil, Colombia, Venezuela, Peru na Ecuador mu gihe irya A rigizwe na Argentine, Bolivia, Chili, Paraguay na Uruguay.

Abakinnyi 11 babanje mu kibuga ku ruhande rwa Venezuela
Abakinnyi ba Bresil babanje mu kibuga
Amakipe yombi yabanje gufata umunota wo kwibuka abahitanywe na Coronavirus
Igikombe cya Copa America kiri gutahanirwa
Marquinhos yishimira igitego cya mbere cya Bresil
Neymar Jr. yatsinze igitego cya kabiri kuri penaliti
Gabriel Barbosa na Neymar bishimira igitego cya gatatu cya Bresil
Joel Graterol akuramo umupira wari utewe na Richarlison
Jose Martinez ahanganiye umupira na Fred wa Bresil
Neymar yaryamye hasi nyuma yo guhusha uburyo bwabazwe
Sergio Cordova wa Venezuela arwanira umupira n'abakinnyi ba Bresil barimo Alex Sandro na Fabinho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .