00:00:00 IGIHE NETWORK KN KINYARWANDA EN ENGLISH FR FRANCAIS

Bigoranye u Bufaransa bwatsinze Danemark buyobora itsinda rya Kane

Yanditswe na Byiringiro Osée Elvis
Kuya 26 Ugushyingo 2022 saa 10:13
Yasuwe :

U Bufaransa bwakuye intsinzi y’ibitego bibiri kuri kimwe cya Danemark, bukomeza kuyobora itsinda rya Kane, mu mukino wa kabiri mu itsinda kuri uyu wa 26 Ugushyingo.

Umukino w’u Bufaransa mu ntangiriro zawo Danemark ni yo yahererekanyaga umupira neza. Yashakaga kwinjira mu mukino mbere. Ibi niko byagenze kuko mu minota itanu yari imaze kubona uburyo bwa mbere bwabonetse muri uyu mukino.

U Bufaransa bwatangiye umukino bukinira inyuma, bugashaka ko abakinnyi ba Denmark binjira mu kibuga cyabo. Ibi byatumaga bakoresha imipira miremire ijya ku mpande zariho Kylian Mbappé na Ousman Ousmane Dembélé.

Amakipe yombi yagaragaje ko ari kwigana hagati yayo, nta n’imwe iragira igitekerezo cyo gusatira. U Bufaransa nibwo bwageze imbere cyane, bugerageza amahirwe yo kugeza imipira kuri Olivier Giroud, ariko Victor Nelsson akamutanga ku mipira.

Ibintu byahinduye isura, umuvuduko wa Kylian Mbappé utangira kugora Andreas Christensen amukorera amakosa menshi, biza no kumuhesha ikarita hakiri kare.

Ku munota wa 20 yamusize amukorera ikosa ryahanwe, Adrien Rabiot awushyize ku mutwe, umuzamu Kasper Schmeichel awukuramo. Ubu buryo bwatumye Denmark igaruka mu mukino.

Yagarutse ikina imipira inyuze hejuru ariko nabyo ntibyakunda kuko Raphael Varane yabasumbaga cyane. U Bufaransa bwakomeje kubasatira cyane ndetse banahisha uburyo bwinshi.

Igice cya mbere cyongeweho iminota itatu, ntihagira ikipe iyibyaza umusaruro, bajya mu kumva inama z’abatoza banganya 0-0.

Bavuye mu karuhuko amakipe yose asatirana ariko hakabura ishyiramo igitego. Ku munota wa 58 Antoine Griezman yarase uburyo bwabazwe ari kumwe na Kasper Schmeichel wenyine.

Byasabye iminota itatu gusa, kugira ngo Kylian Mbappé abone igitego cya mbere muri uyu mukino. Iki gitego yagishyizemo nyuma yo guteza akavuyo imbere y’izamu rya Danemark.

Nyuma yo gutsindwa igitego, Danemark yahumutse ijya gushaka icyo kwishyura hasi hejuru. Ntibyigeze biyigora kuko yabonye koruneri ku munota wa 67, Joachim Andersen ayitereka ku mutwe wa Andreas Christensen, nawe awushyira mu izamu.

Nyuma y’iki gitego Danemark yasatiriye cyane ibona n’ubundi buryo bwinshi, iha akazi katoroshye umunyezamu Hugo Lloris. Muri aka kanya abakinnyi b’u Bufaransa bose bari basubiye inyuma kurinda izamu.

Mu mpera z’umukino Kingsley Coman wasimbuye Ousmane Dembélé yirukankanye umupira, awusubiza inyuma kwa Antoine Griezman, awushyira mu rubuga rw’amahina Kylian Mbappé atsinda igitego cya Kabiri cy’u Bufaransa.

Iki gitego Mbappé yatsinze mu minota ya nyuma ni cyo cyatandukanyije impande zombi. Umukino urangira u Bufaransa bucyuye amanota atatu ku bitego 2-1.

Ibitego bibiri bya Kylian Mbappé ni byo bihesheje instinzi bigoranye ku Bufaransa, imbere ya Danemark. Aya makipe yakinaga umukino wo mu itsinda rya Kane.

Ibitego bibiri kandi Kylian Mbappé yatsinze byamugize umukinnyi wa mbere ufite ibitego byinshi mu ikipe y’u Bufaransa. Yagize birindwi arusha Thierry Henry ufite bitandatu.

U Bufaransa kandi bwahise bukomeza kuyobora itsinda rya kane n’amanota atandatu, bukurikirwa na Australia ifite amanota atatu, naho Danemark na Tunisia zifite rimwe.

Ku munsi wa nyuma mu itsinda, u Bufaransa buzakina na Tunisia, Danemark ikine na Australia. Imikino yose izaba tariki ya 30 Ugushyingo 2022.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .