Bigoranye, Arsenal yisanze mu makipe 16 azakina 1/8 cya Europa League (Amafoto)

Yanditswe na Eric Tony Ukurikiyimfura
Kuya 26 Gashyantare 2021 saa 07:55
Yasuwe :
0 0

Pierre-Emerick Aubameyang yafashije Arsenal kugera muri 1/8 cya Europa League nyuma yo gutsinda Benfica ibitego 3-2 mu mukino wabaye ku wa Kane, ikomeza ku bitego 4-3 mu mikino yombi.

Arsenal yari yamaze gutakaza icyizere mu yandi marushanwa yose, yasabwaga gutsinda uyu mukino yari yakiriye kuri Karaiskakis Stadium mu Bugereki nyuma y’uko igice cya mbere cyarangiye ari igitego 1-1.

Pierre-Emerick Aubameyang yafunguye amazamu ku munota wa 21 ku mupira yatsindanye ba myugariro ba Benfica, uhinduwe na Bukayo Saka.

Ikosa ryakozwe na Dani Ceballos mu minota ya nyuma y’igice cya mbere ni ryo ryavuyemo igitego cyo kwishyura ku ruhande rwa Benfica, ku mupira uteretse inyuma y’urubuga rw’amahina watsinzwe na Diogo Gonçalves.

Nyuma y’iminota 15 amakipe yombi avuye kuruhuka, Ceballos yakoze irindi kosa rikomeye ku mupira yasubije inyuma n’umutwe, ufatwa na Rafa Silva warobye umunyezamu Bernd Leno wasohotse amusanganira, atsinda igitego cya kabiri.

Imibare yahise iba myinshi ku mutoza Mikel Arteta, akora impinduka zirimo kwinjizamo Thomas Partey wasimbuye Ceballos na Willian wasimbuye Emile Smith-Rowe.

Kieran Tierney yishyuriye Arsenal ku munota wa 67 ku mupira yatsindiye mu rubuga rw’amahina aherejwe na Willian mu gihe byasabye gutegereza umunota wa 87, Aubameyang atsinda icy’intsinzi ku mupira wari uhinduwe na Bukayo Saka.

Tombora ya 1/8 iteganyijwe kuri uyu wa Gatanu saa munani z’amanywa i Nyon mu Busuwisi. Imikino ibanza izakinwa ku wa 11 Werurwe mu gihe iyo kwishyura izaba nyuma y’icyumweru kimwe.

Uko amakipe yatsindanye muri 1/16:

  • Arsenal 3-2 Benfica (agg: 4-3)
  • Manchester United 0-0 Real Sociedad (agg: 4-0)
  • Leicester City 0-2 Slavia Praha (agg: 0-2)
  • Rangers 5-2 Antwerp (agg: 9-5)
  • Tottenham 4-0 Wolfsberg (agg: 8-1)
  • Villarreal 2-1 Salzburg (agg: 4-1)
  • Hoffenheim 0-2 Molde (agg: 3-5)
  • Napoli 2-1 Granada (agg: 2-3)
  • Shakhtar 1-0 Maccabi Tel-Aviv (agg: 3-0)
  • Ajax 2-1 LOSC Lille (agg: 4-2)
  • Club Brugge 0-1 Dynamo Kyiv (agg: 1-2)
  • AC Milan 1-1 Crvena zvezda (agg: 3-3, Milan yakomeje ku gitego cyo hanze)
  • Roma 3-1 Braga (agg: 5-1)
  • Dinamo Zagreb 1-0 Krasnodar (agg: 4-2)
  • Leverkusen 0-2 Young Boys (agg: 3-6)
  • PSV Eindhoven 2-1 Olympiacos (agg: 4-5)

Amakipe 16 yakomeje muri 1/8 cya Europa League ni: AC Milan (ITA), Ajax (NED), Arsenal (ENG), Dinamo Zagreb (CRO), Dynamo Kyiv (UKR), Granada (ESP), Manchester United (ENG), Molde (NOR), Olympiacos (GRE), Rangers (SCO), Roma (ITA), Shakhtar Donetsk (UKR), Slavia Praha (CZE), Tottenham (ENG), Villarreal (ESP) na Young Boys (SUI).

Pierre-Emerick Aubameyang afungura amazamu mu mukino wabaye ku wa Kane
Aubameyang na Bukayo Saka bishimira igitego cya mbere
Diogo Gonçalves yishyuriye Benfica ku mupira w'umuterekano
Umunyezamu Bernd Leno ntiyabashije kugera ku mupira wa Diogo Gonçalves
Dani Ceballos agerageza gufata Rafa Silva wafashe umupira yasubije inyuma
Rafa Silva yatsindiye Benfica igitego cya kabiri ubwo yari asatiriwe na Tierney
Kapiteni wa Arsenal, Pierre-Emerick Aubameyang, atsinda igitego cya gatatu ku mupira wari uhinduwe na Bukayo Saka
Aubameyang yishimira igitego cya gatatu cyafashije Arsenal gukomeza
Willian na Alexandre Lacazette bashimira Aubameyang
Umutoza Mikel Arteta yishimira intsinzi hamwe n'abakinnyi be

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .