Bekeni ntiyemeranya n’ibyemezo by’umusifuzi wayoboye umukino banganyijemo na APR FC

Yanditswe na Eric Tony Ukurikiyimfura
Kuya 19 Mutarama 2020 saa 01:15
Yasuwe :
0 0

Umutoza mukuru w’ikipe ya Etincelles FC, Bizimana Abdu ‘Bekeni’, ntiyemeranywa n’ibyemezo by’umusifuzi Rulisa Patience wayoboye umukino banganyijemo na APR FC igitego 1-1 kuri uyu wa Gatandatu.

Muri uyu mukino wabereye kuri Stade Umuganda i Rubavu, Etincelles FC yasoje ari abakinnyi 10 mu kibuga nyuma y’ikarita itukura yahawe Akayezu Jean Bosco ku ikosa yakoreye kuri Nshuti Innocent ku munota wa 23.

Nshuti Innocent yari yafunguye amazamu ku gitego cyabonetse ku munota wa 21 mu gihe Niyibizi Ramadhan yishyuriye ikipe y’i Rubavu habura amasegonda make ngo imikino 90 isanzwe irangire.

Aganira n’itangazamakuru nyuma y’umukino, Bekeni yavuze ko atemeranywa n’ibyemezo bibiri umusifuzi Rulisa yafashe, ariko yemeza ko bishobora kuba kwibeshya kuko na we ari umuntu.

"Biragaragara nk’igitego badutsinze, njyewe ntabwo nacyumvikanyeho na we, kimwe n’iriya karita itukura nayo ntabwo nayumvikanyeho n’umusifuzi. Ryari ikosa, nibyo ryabaye, ariko ntabwo ryari rikomeye cyane kuko umukinnyi yakinnye umupira, ariko ni umuntu ashobora kwibeshya nk’uko natwe twibeshya. Ni ukubimenyera tu.’’

Bekeni yari amaze igihe yaririnze kuvuga ku misifurire, ni nyuma yo guhamagazwa kenshi n’akanama gashinzwe imyitwarire kubera amagambo yavugaga ku basifuzi mu myaka yashize.

Nyuma yo kunganya uyu mukino, Etincelles FC yagumye ku mwanya wa cyenda n’amanota 22.

Umusifuzi Rulisa Patience yereka ikarita itukura Akayezu Jean Bosco ku ikosa yakoreye kuri Nshuti Innocent
Bekeni ntiyemeranya n’ibyemezo by’umusifuzi w'umukino Etincelles FC yanganyijemo na APR FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza