BBC yirukanye umwe mu basesenguzi bayo wibasiye abakinnyi b’abirabura

Yanditswe na Eric Tony Ukurikiyimfura
Kuya 19 Gashyantare 2020 saa 08:57
Yasuwe :
0 0

Umusesenguzi w’imikino y’umupira w’amaguru kuri BBC, Craig Ramage, yirukanywe nyuma yo kwibasira abakinnyi b’abirabura bakinira Derby Count mu cyiciro cya kabiri mu Bwongereza.

Craig Ramage wakiniye Derby hagati y’imyaka ya 1980 na 90, yari mu kiganiro Sportscene cya BBC ku wa Gatatu ubwo yavugaga amagambo atarishimiwe n’abatari bake.

Ramage yanenze myugariro w’imyaka 22 wa Derby, Max Lowe, na we wavuze ko “yatunguwe” n’ibyavuzwe n’uyu mugabo nyuma y’umukino ikipe ye yanganyijemo na Huddersfield igitego 1-1.

Ati “Gufata abantu mu buryo budakwiye hashingiwe ku ruhu rwabo no kubagiraho imyumvire itariyo byangiza isura y’umukinnyi uba ufite ahazaza ndetse bigatandukanya abantu muri sosiyete.”

Muri ubu butumwa yanditse ku rubuga nkoranya mbaga rwa Instagram, Lowe ngo wavugiraga abakinnyi b’abirabura bakinana muri Derby County, yakomeje avuga ko yababajwe cyane n’ibyavuzwe na Craig Ramage.

Ati “Nababajwe kandi n’uburyo igitangazamakuru gikorera abaturage kitigeze gisaba umusesenguzi gusobanura ibyo yavugaga, cyangwa ngo cyitandukanye n’iyo mitekerereze ishaje.”

Lowe yatangaje ko Ramage yavuze ko kuri we asanga ibyo abakinnyi b’abirabura bageraho batabikwiye, ahubwo boroherezwa kandi barangiza bakumva ko bagezeyo ku buryo atemeranya n’imyitwarire yabo.

Umuvugizi wa BBC yemeje ko bamaze gutandukana na Ramage n’ubundi wari umusesenguzi wigenga.

Yagize ati “Craid Ramage yavuze amagambo adakwiye mu kiganiro cyabaye ejo hashize ariko cyamaze gukurwa kuri interineti. Ntabwo tuzongera gukorana na Craig.”

Ubwo yari umukinnyi, Ramage yakiniye amakipe yo mu Bwongereza arimo Watford na Notts County. Yakiniye kandi Derby imikino isaga 40, asezera gukina mu 2001.

Abinyujije ku rubuga rwa Twitter, Ramage yasabye imbabazi, avuga ko “yicuza kubera amagambo yavuze nyuma y’umukino wabaye ku wa Gatandatu kandi akaba atari abigambiriye.”

Ku Cyumweru, Ubuyobozi bwa Derby bwasohoye itangazo rivuga ko bwagiranye ibihaniro na BBC bukayibwira ko budashyigikiye ivangura iryo ari ryo ryose.

Derby County iri ku mwanya wa 13 muri Championship, icyiciro cya kabiri mu Bwongereza, ni mu gihe mu mwaka ushize yatsindiwe ku mukino wa Playoff washoboraga gutuma izamuka muri Premier League.

Umwongereza Max Lowe ukinira Derby County ntiyishimiye amagambo ya Craig Ramage wamwibasiye hamwe na bagenzi be b'abirabura
Craig Ramage (hagati) akinira Notts County mu mukino wabahuje na Millwall mu 2000
BBC yatangaje ko itazongera gukoresha Craig Ramage

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .