00:00:00 IGIHE NETWORK KN KINYARWANDA EN ENGLISH FR FRANCAIS

Babiri batawe muri yombi muri dosiye ya ruswa muri Ferwafa; Muhire ntafunze

Yanditswe na Israel Ishimwe
Kuya 23 June 2022 saa 12:16
Yasuwe :

Urwego rw’Igihugu rw’Ubugenzacyaha, RIB, rwataye muri yombi Nzeyimana Félix wari Umukozi ushinzwe Amarushanwa mu Ishyirahamwe ry’Umupira w’Amaguru mu Rwanda n’Umusifuzi Tuyisenge Javan bakurikiranyweho ibyaha bifitanye isano na ruswa yavuzwe muri Ferwafa.

Aba bagabo bafashwe nyuma y’uko Ferwafa isabye RIB kwinjira mu birego bya ruswa ivugwa muri iri shyirahamwe.

Nzeyimana Félix wari umukozi ushinzwe Amarushanwa muri Ferwafa yatawe muri yombi nyuma y’iminsi itatu yirukanwe kubera amakosa yakoze mu nshingano ze.

Uyu mugabo yashinjwe amakosa yakozwe muri dosiye y’ubujurire bwa Rwamagana City na AS Muhanga zahuriye mu mikino ya ¼ mu gushaka itike yo kuzamuka mu Cyiciro cya Mbere.

Itangazo rimuhagarika rivuga ko Nzeyimana yategetse umusifuzi Tuyisenge Javan guhindura raporo yari yatanze, amusaba gukora indi ngo yongeremo ko umukinnyi Mbanza Joshua yahawe amakarita atatu y’umuhondo byari gutuma hemezwa ko ikirego cyatanzwe na AS Muhanga gifite ishingiro.

Iryo kosa yakoze no kuba mu nyandiko ye yarijeje uwamufashije ko azamuha igihembo byatumye ahagarikwa burundu ku kazi.

Yirukanwe nyuma y’uko Ferwafa ihagaritse Muhire Henri Brulart wari Umunyamabanga Mukuru wa Ferwafa ku mwanya we kubera amakosa yakoze mu nshingano ze.

Iperereza ry’ibanze rya RIB ryasize Nzeyimana Félix wari Umukozi ushinzwe Amarushanwa muri Ferwafa n’Umusifuzi Tuyisenge Javan batawe muri yombi.

Umuvugizi wa RIB, Dr Murangira B. Thierry, yabwiye IGIHE ko aba bagabo bari gukurikiranwa.

Yagize ati “Iperereza ry’ibanze ryagaragaje ko hari impamvu zikomeye zituma Nzeyimana Félix ushinzwe Amarushanwa n’umusifuzi Tuyisenge Javan bakekwaho ibyaha bitatu.’’

Ibyaha bakurikiranyweho birimo guhimba, guhindura inyandiko cyangwa gukoresha inyandiko mpimbano; kugera ku makuru hagambiriwe gukora icyaha no guhindura amakuru yo muri mudasobwa cyangwa urusobe rwa mudasobwa utabyemerewe.

Icyaha cyo guhimba, guhindura inyandiko cyangwa gukoresha inyandiko mpimbano, gihanwa n’ingingo ya 276 y’itegeko riteganya ibyaha n’ibihano muri rusange iteganya igihano kiri hagati y’imyaka itanu n’irindwi, n’ihazabu iri hagati ya miliyoni 3 Frw na miliyoni 5 Frw cyangwa kimwe gusa muri ibyo bihano.

Icyo kugera ku makuru hagambiriwe gukora icyaha, gihanwa n’ingingo ya 17 y’itegeko ryerekeye gukumira ibyaha bikoreshejwe ikoranabuhanga mu gihe icyo guhindura amakuru yo muri mudasobwa cyangwa urusobe rwa mudasobwa utabyemerewe gihanishwa ingingo ya 18 y’itegeko ryerekeye guhana no gukumira ibyaha bikoreshejwe ikoranabuhanga.

Ibi byaha bibiri bihanishwa igifungo kiri hagati y’umwaka umwe n’imyaka ibiri ndetse hakiyongeraho ihazabu y’amafaranga ari hagati ya miliyoni 3 Frw na miliyoni 5 Frw.

Dr Murangira yavuze ko ‘iperereza rikomeje kugira ngo hakorwe dosiye ishyikirizwe Ubushinjacyaha mu gihe cyagenwe.’

Abaregwa bafungiye kuri Sitasiyo ya RIB ya Rwezamenyo i Nyamiramo n’iya Nyarugenge ahazwi nka La Galette.

Urwego rw’Igihugu rw’Ubugenzacyaha, RIB, rwataye muri yombi Nzeyimana Félix wari Umukozi ushinzwe Amarushanwa mu Ishyirahamwe ry’Umupira w’Amaguru mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .