Atlético Madrid yasezereye FC Barcelone isanga Real Madrid ku mukino wa nyuma wa Super Coupe

Yanditswe na Eric Tony Ukurikiyimfura
Kuya 10 Mutarama 2020 saa 01:37
Yasuwe :
0 0

Ibitego bya Alvàro Morata na Ángel Correa mu minota ya nyuma, byafashije Atlètico Madrid gusezerera FC Barcelone, igera ku mukino wa nyuma w’igikombe kiruta ibindi muri Espagne "Super Coupe’’ itsinze 3-2 mu mukino wa ½ wabereye muri Arabie Saoudite.

Umukino wahuje FC Barcelone na Atlètico Madrid wabaye ku mugoroba wo ku wa 9 Mutarama 2020.

Igice cya mbere cy’umukino cyaranzwe no gusatira ku ruhande rwa FC Barcelone, Atlètico Madrid itabarwa n’umunyezamu wayo Jan Oblak wakuyemo imipira yatewe na Lionel Messi na Griezmann.

Ku munota wa mbere w’igice cya kabiri, Atlètico Madrid yafunguye amazamu ku gitego cyatsinzwe na Koke wari umaze guhabwa umupira mu rubuga rw’amahina na Ángel Correa.

Byasabye iminota itanu gusa maze Lionel Messi yishyurira FC Barcelone ku mupira yari acomekewe na Luis Suárez mu gihe kandi nyuma y’iminota icyenda yatsinze ikindi gitego, ariko ikoranabuhanga ry’amashusho ryifashishwa mu misifurire (VAR) rikagaragaza ko yari yawukoze n’ukuboko.

Antoine Griezmann yatsinze igitego cyafashije FC Barcelone kuyobora umukino ku munota wa 63, nyuma y’uko umupira wari utewe n’umutwe na Luis Suárez wakuwemo n’umunyezamu Oblak, akawushyira mu izamu.

FC Barcelone yabonye uburyo bwinshi mu gice cya kabiri, igorwa n’umunyezamu Oblak mu gihe kandi hari n’ikindi gitego cyatsinzwe na Gérard Piqué, ariko VAR igaragaza ko hari habayeho kurarira.

Habura iminota 10 ngo umukino urangire, umunyezamu Neto wa FC Barcelone yakoreye ikosa kuri Vitolo mu rubuga rw’amahina, umusifuzi atanga penaliti yinjijwe neza na Alvàro Morata.

Ángel Correa yatsindiye Atlético Madrid igitego cyayihaye gutsinda umukino ku munota wa 86, ku mupira yaherejewe na Morata, awuteye mu izamu Neto ntiyabasha kuwusubiza inyuma.

Gutsinda uyu mukino byatumye Atlètico Madrid izahura na Real Madrid ku mukino wa nyuma uzaba ku Cyumweru tariki ya 12 Mutarama 2020 saa 20:00.

Kubera iki Super Coupe y’amakipe ane?

Igikombe cya Super Coupe muri Espagne cyakinwaga mu buryo bumwe kuva mu 1982 kugeza mu mwaka ushize, aho cyahuzaga ikipe yatwaye Shampiyona ya La Liga n’iyatwaye igikombe cy’igihugu, Copa del Rey.

Mu myaka ya mbere, ikipe yegukanaga ibikombe byombi mu mwaka umwe, yahitaga ihabwa Super Cup mu gihe mu myaka yakurikiyeho, iyatwaye Shampiyona yahuraga n’iyatsindiwe ku mukino wa nyuma mu gikombe cy’igihugu.

Mu mwaka ushize, FC Barcelone yatwaye ibikombe byombi, yahuye na Seville yatsindiye ku mukino wa nyuma wa Copa del Rey, inayitwara Super Cup iyitsinze ibitego 2-1 mu mukino wabereye mu Mujyi wa Tangier muri Maroc.

Guhera uyu mwaka kugeza mu myaka ibiri iri imbere (ni ukuvuga imyaka itatu hamwe), uburyo iki gikombe cyahatanirwagamo byarahindutse.

Irushanwa rizajya riba muri Mutarama, ribere muri Arabia Saoudite ndetse rihuze amakipe ane arimo abiri ya mbere muri Shampiyona iheruka, n’abiri yageze ku mukino wa nyuma wa Copa del Rey.

Ayo makipe naba ari amwe, haziyongeramo indi yaje hafi muri Shampiyona. Uyu mwaka iri rushanwa riri gukinirwa kuri King Abdullah Sports City Stadium iri mu Mujyi wa Jeddah, ifite ubushobozi bwo kwakira abantu ibihumbi 62, rikaba rihuje amakipe ya FC Barcelone, Real Madrid, Atlètico Madrid na Valence.

Kubera iki ryajyanwe muri Arabia Soudite kandi rikaba mu kwa mbere?

Ishyirahamwe ry’Umupira w’Amaguru muri Espagne ryirinze kuvuga amafaranga ryishyuwe n’Abarabu kugira ngo iyi mikino ijyanwe muri Asia, ariko itangazamakuru ryaho rivuga ko ari hafi miliyoni 120 z’amayero mu myaka itatu (ni ukuvuga miliyoni 40€ ku mwaka).

Iki ni cyo gikorwa cya siporo gikomeye kibereye muri Arabia Saoudite nyuma y’umurwano uheruka guhuza Anthony Joshua na Andy Ruiz Jr bakina iteramakofe. Haheruka kubera kandi umukino wa Super Cup y’u Butaliyani wahuje Juventus na Lazio mu kwezi gushize kimwe n’umukino wa gicuti wahuje Brésil na Argentine.

Ubwami bwa Arabia Saoudite bwiyemeje kumenyekanisha isura y’igihugu mu mikino n’imyidagaduro kugira ngo Isi yibuke ko ari igihugu gikungahaye ku bikomoka kuri peteroli.

Super Coupe ya Espagne yashyizwe muri uku kwezi kwa mbere, aho kuba mu mpeshyi kugira ngo itabangamira gahunda y’imikino yo kwitegura umwaka mushya w’imikino.

Ntibyashimishije benshi

Ibigo bitandukanye n’abaturage ba Espagne ntabwo bishimiye kuba iyi mikino yarajyanwe muri Arabia Saoudite dore ko kugira ngo impande zombi zigirane aya masezerano, Arabia Saoudite yabanje kwemera ko abagore bazareba iyi mikino (muri iki gihugu ntibyari byemewe).

Mu kwitegura iyi mikino Ikipe ya Valence izahabwa miliyoni ebyiri, Atlètico Madrid ihabwe eshatu mu gihe FC Barcelone na Real Madrid buri imwe izahabwa miliyoni 6€.

Lionel Messi yagoye abakinnyi ba Atletico Madrid muri uyu mukino
Umukino warimo guhangana gukomeye no kutumvikana ku byemezo bimwe na bimwe
Saul Niguez avugisha Messi nyuma yo kumukinira nabi
Luis Suarez agaragaza ko atishimiye icyemezo cy'umusifuzi
Koke ashimirwa na bagenzi be nyuma yo gutsinda igitego cya mbere
Abakinnyi ba FC Barcelone bishimira igitego cyo kwishyura cyatsinzwe na Lionel Messi
Correa atera umupira wavuyemo igitego cya gatatu
Ángel Correa yishimira igitego cya gatatu cyahesheje Atletico Madrid kugera ku mukino wa nyuma
Lionel Messi yasagariwe n'umufana winjiye mu kibuga ubwo umukino wari urangiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza