AS Muhanga iravugwamo abakinnyi batanu banduye COVID-19

Yanditswe na Eric Tony Ukurikiyimfura
Kuya 21 Ukuboza 2020 saa 01:58
Yasuwe :
0 0

AS Muhanga yiyongereye ku mubare w’amakipe amaze kugaragaramo ubwandu bwa COVID-19, aho irwaje abakinnyi batanu.

Ibipimo bishya biheruka gufatwa abakinnyi n’abandi bakozi ba AS Muhanga mbere y’uko basubira mu miryango yabo, nyuma y’ihagarikwa rya Shampiyona, byagaragaje ubwandu bushya bw’abantu batanu nk’uko amakuru IGIHE yahawe abivuga.

Nubwo ubuyobozi bwayo butigeze bushaka kugira icyo bubivugaho, IGIHE yamenye ko abakinnyi ba AS Muhanga basabwe kuguma mu mwiherero bari hamwe kugira ngo bazabanze kongera gupimwa nyuma y’uko ibisubizo byabonetse ku Cyumweru bigaragaje ko hari batanu barwaye.

Ushinzwe ubuzima bwa buri munsi bwa AS Muhanga, Irambona Robert, yavuze ko batarabona ibisubizo by’ibipimo byafashwe abakozi b’iyi kipe ku wa Gatandatu.

Ati “Sinzi aho mwakuye ayo makuru, twarapimishije ariko ntabwo turabona ibisubizo. Ayo makuru murikumva ni impuha. Ni yo makuru yemewe ahari.”

Uwahaye amakuru IGIHE yavuze ko mu bakinnyi batanu banduye harimo babiri bafite imyaka 23, babiri b’imyaka 21 n’umwe ufite imyaka 19.

Minisiteri ya Siporo iherutse gutangaza ko ubwo AS Muhanga yakinaga na Etincelles FC ku munsi wa mbere wa Shampiyona wabaye tariki ya 4 Ukuboza 2020, iyi kipe yo mu Majyepfo itari yigeze yipimisha.

Ku mukino w’Umunsi wa Kabiri wa Shampiyona wabaye nyuma y’iminsi itatu, AS Muhanga yahuye na Musanze FC kugeza ubu yamaze kugaragaramo abakinnyi 10 banduye.

Iyi kipe yakinnye kandi umukino wa gicuti na Rayon Sports iheruka kugaragaramo ubwandu 14, icyo gihe haburaga iminsi itanu ngo Shampiyona itangire.

AS Muhanga yabaye ikipe ya cyenda igaragayemo COVID-19 nyuma ya Rayon Sports, APR FC, AS Kigali, Marines FC, Musanze FC, Rutsiro FC, Amagaju FC na Alpha FC.

FERWAFA iherutse gutumira abayobozi b’amakipe mu nama izaba ku wa Kane, izagaruka ku ihagarikwa rya Shampiyona no kungurana ibitekerezo ku cyakorwa ngo yongere gukomorerwa.

AS Muhanga iravugwamo abakinnyi batanu banduye COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .