AS Kigali yemerewe guhita isubukura imyitozo

Yanditswe na Eric Tony Ukurikiyimfura
Kuya 16 Ukuboza 2020 saa 09:46
Yasuwe :
0 0

Minisiteri ya Siporo yemereye ikipe ya AS Kigali gusubukura imyitozo nubwo amakipe yose y’Icyiciro cya Mbere mu Rwanda yasabwe kuva mu mwiherero agasubira mu rugo nyuma y’uko hari ayagaragayemo ubwandu bwa COVID-19.

AS Kigali ikiri mu marushanwa Nyafurika, aho izakina na KCCA yo muri Uganda mu ijonjora rya kabiri rya CAF Confederation Cup, yanditse ku wa 13 Ukuboza 2020, isaba kwemererwa gukomeza imyitozo.

Inama y’Abaminisitiri yateranye ku wa Mbere tariki ya 14 Ukuboza 2020, yemeje icyemezo cyari cyafashwe na Minisiteri ya Siporo ko guhera ku wa 12 Ukuboza, Shampiyona y’Igihugu y’umupira w’amaguru ihagarara, ariko amakipe ari mu marushanwa mpuzamahanga akemererwa gukomeza kwitoza no kuyitabira.

Ku wa Kabiri, binyuze mu Bunyamabanga bwa FERWAFA, Minisiteri ya Siporo yemereye AS Kigali gusubukura imyitozo, ariko iyibutsa gukurikiza amabwiriza yo kwirinda COVID-19.

Yagize iti “Dushingiye ku ibaruwa yanyu yo ku wa 13 Ukuboza isabira uruhushya rwihariye AS Kigali rwo gusubukura imyitozo guhera ku wa 14 Ukuboza mu rwego rwo kwitegura amarushanwa ya CAF Confederation Cup 2020/21.”

“Hakurikijwe icyemezo cy’Inama y’Abaminisitiri yo ku wa 14 Ukuboza 2020, ndabamenyesha ko mwemerewe uruhushya kugira ngo mwitegure uwo mukino mpuzamahanga. Ikindi, murasabwa kubahiriza amabwiriza yo kwirinda COVID-19 mu gihe cy’umwiherero w’imyitozo.”

Ku wa Kabiri, Minisiteri ya Siporo yatangaje ko amakipe umunani yagaragayemo ubwandu bwa COVID-19 mu Rwanda arimo Rayon Sports, APR FC, AS Kigali, Marines FC, Musanze FC, Amagaju FC, Alpha FC na Rutsiro FC.

Umukino ubanza hagati ya AS Kigali na KCCA uzabera i Kigali ku wa 23 Ukuboza 2020 mu gihe uwo kwishyura uzabera i Kampala hagati ya tariki ya 5 n’iya 6 Mutarama 2021.

AS Kigali yemerewe gusubukura imyitozo nyuma y'uko amakipe y'Icyiciro cya Mbere yasabwe kurekura abakinnyi bagataha
Abanyamujyi bazakira KCCA yo muri Uganda mu cyumweru gitaha

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .