00:00:00 IGIHE NETWORK KN KINYARWANDA EN ENGLISH FR FRANCAIS

AS Kigali yatsinze Marine FC ikomeza gushimangira umwanya wa mbere (Amafoto na Video)

Yanditswe na Byiringiro Osée Elvis
Kuya 21 Mutarama 2023 saa 10:04
Yasuwe :

AS Kigali yatsinze Marine FC ibitego 3-0, Rwamagana City itsinda Espoir igitego 1-0 mu mikino y’Umunsi wa 16 wa Shampiyona yakinwe kuri uyu wa Gatandatu, tariki 21 Mutarama 2023.

AS Kigali yagiye gukina uyu munsi isabwa kudakora ikosa kuko Kiyovu Sports yari yayikuye ku mwanya wa mbere, ni mu gihe Espoir nayo yari ibizi ariko ibintu bikomeza kuyikomerana.

Iyi kipe y’Umujyi wa Kigali yatangiranye umukino imbaraga nyinshi isatira bikomeye, ibifashwamo na Djibrine Akuki iherutse kugura muri Mukura.

Uyu musore yakomeje kuzonga Marines FC hagati mu kibuga ariko imipira yahererezaga Hussein Tchabalala na Félix Koné ntibayibyaze umusaruro.

Mu minota 20 ya mbere, Marines FC yakomeje gukina yirwanaho gusa kuko yari itaragera imbere y’izamu rya AS Kigali ryari ririnzwe na Ntwari Fiacre.

Akuki yongeye kuzamukana umupira yihuta akinana rimwe na Tchabalala ariko Nkundimana Fabio aramuhagarika amukorera ikosa.

Akuki ntiyabahaye agahenge kuko ku munota wa 27, yazamukanye umupira yambukiranya ikibuga mo kabiri, awucomeka kwa Tchabalala wawuhinduye imbere y’izamu adahagaritse, usanga Koné ahagaze wenyine ashyiraho umutwe atsinda igitego cya mbere.

Marines FC na yo yatangiye kwibona mu mukino, Gitego Arthur yazamukanye umupira neza ariko Rugirayabo Hassan yugarira neza awushyira muri koruneri itagize icyo ibyara.

AS Kigali yakomeje gusatira ishaka igitego cya kabiri, ariko koruneri nyinshi bateraga ntibazibyaze umusaruro. Igice cya mbere cyarangiye AS Kigali itsinze Marines FC igitego 1-0, cyatsinzwe na Félix Koné.

Marines yaje mu gice cya kabiri isatira bikomeye ishaka kwishyura igitego hakiri kare cyane. Gitego yazamukanye umupira ku munota wa 48 ariko ateye ishoti rikomeye ujya hejuru y’izamu.

Iyi kipe yakomeje guhanahana neza, nyuma yo kujya mu kibuga kwa Nsanzimfura Keddy ariko kwegereza izamu rya AS Kigali byari bikigoye.

Ku munota wa 57, umutoza wa Marine, Rwasamanzi Yves yongeye gukora impinduka, Gitego Arthur yasimbuwe na Mugisha Désiré. AS Kigali nayo yahise ikora impinduka ku munota wa 63.

Rukundo Denis yasimbuye Ahoyikuye Jean Paul uzwi nka Mukonya,Tuyisenge Jacques asimbura Félix Koné, Nyarugabo Moïse asimbura Man Ykre.

Ku munota wa 70, Gikamba Ismael yazamukanye umupira ku ruhande rw’iburyo, awumanura kwa Nsanzimfura Keddy wahise atera ishoti rikomeye adahagaritse umunyezamu Ntwari Fiacre awukuramo, Nkundimana Fabio asongamo umunyezamu yongera kurokora ikipe ye.

AS Kigali yahise icomeka umupira vuba, Rukundo awuzamukana wenyine ateye ishoti rikomeye umupira ufata igiti cy’izamu uvamo.

Marine yaryohewe no gusatira, AS Kigali izamuka yihuta ku munota wa 85, Nyarugabo atera umupira usanga Tuyisenge wahise atera ishoti rikomeye cyane atsinda igitego cya kabiri, umunyezamu Ahishakiye Héritier ntiyamenya aho umupira unyuze.

Bidatinze Tchabalala yahawe umupira na Nyarugabo, awushyira ku gatuza ahindukirana Hirwa Jean de Dieu atsindira iyi kipe y’Umujyi igitego cya gatatu ku munota wa kane w’inyongera.

Umukino warangiye AS Kigali itsinze Marine FC ibitego 3-0, ikomeza gushimangira umwanya wa mbere, ari nako Marines FC ikomeza kuguma ahabi.

Undi mukino wabaye uyu munsi, Espoir yatsindiwe mu rugo na Rwamagana City igitego 1-0, iyi kipe y’i Rusizi ikomeza kuguma ku mwanya wa nyuma n’amanota arindwi.

Kugeza ubu, ku munsi wa 16 wa shampiyona, AS Kigali ikomeje kuyobora n’amanota 33, Kiyovu Sports ku mwanya wa kabiri n’amanota 30, Gasogi n’amanota 29, APR ku wa kane n’amanota 28.

Rwamagana City nubwo yatsinze yagumye ku mwanya wa 14 n’amanota 13, Marine FC ku mwanya wa 14 n’amanota 10, Espoir igaheruka n’amanota arindwi.

Imikino iteganyijwe:

Ku Cyumweru, tariki ya 22 Mutarama 2023

  • Rutsiro FC vs Etincelles FC (Stade Umuganda, 15:00)
  • Bugesera FC vs Sunrise FC (Stade Bugesera, 12:30)
  • APR FC vs Mukura VS (Stade Bugesera, 15:30)

Ku wa Kabiri, tariki 24 Mutarama 2023

  • Rayon Sports vs Musanze FC (Stade Muhanga, 15:00)
Abakinnyi ba AS Kigali babanje mu kibuga
AS Kigali yasabwaga gutsinda kugira ngo yisubize umwanya wa mbere
Man Ykre ashoreye umupira mu kibuga hagati
Jibrin Akuki yigaragaje mu mukino wa mbere akinira AS Kigali
Niyonzima Olivier 'Seif' atera umupira ubwo yari asatiriwe na Gitego Arthur
Umutoza wa AS Kigali, Cassa Mbungo Andre, atanga amabwiriza ku bakinnyi be
Félix Koné yishimira igitego cya mbere cya AS Kigali
Ahoyikuye Jean Paul ukina ibumoso mu bwugarizi bwa AS Kigali
AS Kigali yasubiye ku mwanya wa mbere nyuma yo kwihererana Marines FC

Amafoto: Umurerwa Delphin

Video: Iraguha Jotham


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .