AS Kigali yatsinze Artar Solar7 ikinamo Alexandre Song (Amafoto)

Yanditswe na Eric Tony Ukurikiyimfura
Kuya 21 Ugushyingo 2020 saa 09:23
Yasuwe :
0 0

Umukino mpuzamahanga wa gicuti wabareye kuri Stade ya Kigali i Nyamirambo kuri uyu wa Gatandatu, warangiye AS Kigali itsinze AS Artar Solar7 yo muri Djibouti ibitego 2-1.

AS Kigali yitegura guhagararira u Rwanda muri CAF Confederation Cup, aho izabanza kwakirwa na Orapa United yo muri Botswana, yakinnye umukino wa gicuti n’ikipe ikinamo Alexandre Song wakiniye amakipe arimo Arsenal na FC Barcelone, yo izerekeza mu Misiri mu cyumweru gitaha.

Uyu mukino watangiye ukereweho hafi isaha yose kubera imvura nyinshi yaguye mu Mujyi wa Kigali, ikibuga kikuzura amazi.

AS Kigali yashoboraga gufungura amazamu ku buryo bwabonywe na Soudi Abdallah, wateye umupira ku ruhande, yakoze impinduka hakiri kare ubwo myugariro w’ibumoso, Ahoyikuye Jean Paul, yasimburwaga na Ishimwe Christian nyuma yo kuvunika.

AS Arta Solar7 yabonye uburyo bubiri bukomeye, AS Kigali itabarwa n’umunyezamu Bate Shamiru wakuyemo umupira ukomeye wahinduwe na Donale Mohammed ndetse n’uwa Gabriel wari umaze guherezwa na Alexandre Song.

Nyuma y’uko Shaban Hussein ‘Tchabalala’ ananiwe kubyaza umusaruro uburyo yabonye imbere y’umunyezamu wa Arta Solar7, iyi kipe yo muri Djibouti yafunguye amazamu ku munota wa 36, ku gitego cyatsinzwe na Samuel aherejwe na Gabriel.

Ikipe y’Umujyi wa Kigali yongeye kubona amahirwe akomeye ku buryo bwabonetse mu minota ya nyuma y’igice cya mbere, ariko umupira watewe na Soudi Abdallah n’umutwe, usubizwa inyuma n’igiti cy’izamu.

AS Kigali yatangiye igice cya kabiri ikora impinduka havamo Ntamuhanga Tumaini Tity hinjiramo Lawal Aboubakar mu gihe Bate Shamiru yahaye umwanya Ndayishimiye Eric ‘Bakame’. Ku munota wa 52, Biramahire Abeddy yinjiye mu kibuga asimbura Soudi Abdallah.

Kwinjira mu kibuga kw’aba bakinnyi kimwe na Kwizera Pierrot na Hakizimana Muhadjiri binjiyemo nyuma, byatanze umusaruro, AS Kigali ikomeza kubona uburyo butandukanye imbere y’izamu nubwo Lawal Aboubakar yateye ishoti rigakurwamo n’umunyezamu.

Byasabye gutegereza umunota wa 73, AS Kigali yishyurirwa na Biramahire Abeddy ku gitego yatsindishije umutwe ku mupira yari ahawe na Hakizimana Muhadjiri.

AS Artar Solar yabonye uburyo bwashoboraga kuyihesha igitego cya kabiri ahagana ku munota wa 85 ubwo Abdoukada yinjiranaga ubwugarizi bwa AS Kigali ndetse agacenga munyezamu Bakame, ariko ateye mu izamu, umupira uca ku ruhande.

Ishimwe Christian yahesheje AS Kigali intsinzi ku munota wa 88 ku mupira yaherejwe na Kwizera Pierrot, awuteye nk’uwuhindura mu izamu uruhukira mu nshundura.

AS Kigali izahaguruka mu Rwanda mu ijoro rishyira ku wa Gatatu, aho izakina na Orapa United mu mukino ubanza w’ijonjora rya mbere rya CAF Confederation Cup uzaba ku Cyumweru tariki ya 29 Ugushyingo 2020.

Biteganyijwe ko AS Arta Solar7 izakina undi mukino wa gicuti ku wa Mbere, aho izahura na APR FC saa Cyenda kuri Stade ya Kigali.

Ikibuga cya Stade ya Kigali cyuzuye amazi bituma umukino utinda gutangira
Abakinnyi ba Arta Solar7 babanje mu kibuga
Ababanje mu kibuga ku ruhande rwa AS Kigali
Ba kapiteni b'amakipe yombi: Ntamuhanga Tumaini 'Tity' na Alexandre Song bifotoza imbere y'abasifuzi
Ntamuhanga Tumaini ashoreye umupira
Myugariro Bayisenge Emery yitegura gutera umupira
Shabani Hussein 'Tchabalala' yubura amaso
Rugirayabo Hassan acunga ko hari mugenzi we uhagaze neza
Alexandre Song w'imyaka 33 yasinyiye AS Arta Solar7 mu minsi ishize
Song yakiniye amakipe arimo FC Barcelone na Arsenal i Burayi
Nsabimana Eric 'Zidane' ahindukira ngo arebe aho atanga umupira
Alexandre Song agerageza gucenga Soudi Abdallah wa AS Kigali
Umunya-Nigeria Orotamal Alex ahanganiye umupira na Alex Song
Biramahire Abeddy yishimira igitego cyo kwishyura yatsindiye AS Kigali
Hakizimana Muhadjiri agerageza uburyo bw'ishoti
Alex Song yambura umupira Hakizimana Muhadjiri
Hakizimana Muhadjiri azengurutswe n'abakinnyi ba Arta Solar7
Myugariro Ishimwe Christian ahindura umupira
Ishimwe Christian ashimirwa na bagenzi be nyuma yo gutsindira AS Kigali mu minota ya nyuma
Abubakar Lawal, Kwizera Pierrot na Ishimwe Christian bishimira igitego
Kayitaba Jean Bosco agerageza kwambura umupira umukinnyi wa Arta Solar7

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .