00:00:00 IGIHE NETWORK KN KINYARWANDA EN ENGLISH FR FRANCAIS

AS Kigali yatangiye Shampiyona yikomanga ku gatuza, Police FC ibambirwa i Gologota

Yanditswe na Byiringiro Osée Elvis
Kuya 19 August 2022 saa 06:49
Yasuwe :

Ibitego bibiri bya Shabani Hussein Tshabalala byafashije AS Kigali gutsinda Etincelles FC itangira neza Shampiyona y’Icyiciro cya Mbere mu Rwanda mu gihe Police FC yatakarije amanota kuri Stade Golgota itsinzwe na Sunrise FC.

Ku mugoroba wo kuri uyu wa Gatanu, tariki ya 19 Kanama 2022, ni bwo Shampiyona Nyarwanda y’Umupira w’Amaguru y’umwaka w’Imikino wa 2022/2023 yatangiye.

Ku ikubitiro hakinwe imikino itatu irimo uwahuje AS Kigali na Etincelles FC kuri Stade ya Kigali, uwa Sunrise FC na Police FC kuri Stade Golgota i Nyagatare n’uwa Espoir FC yakiriye Marines FC kuri Stade Rusizi [yahoze yitwa Kamarampaka].

Iyi mikino yakinwe saa Cyenda mu gihe uheruka mu iteganyijwe uyu munsi uhuza APR FC yakirira Musanze FC kuri Stade ya Kigali i Nyamirambo.

AS Kigali yari ku kibuga cyayo yatangiye shampiyona itsinda Etincelles FC yageze mu Mujyi wa Kigali ku bwa burembe kuko ubushobozi bwari bwabuze mbere y’uko Akarere kayigoboka ikabona uko ikina umukino.

Ni umukino watangiye watangiye utuje, amakipe yombi asa n’ayigana ariko AS Kigali ikanyuzamo igasatira.

Ku munota wa munani, Kapiteni w’Ikipe y’Abanyamujyi, Haruna Niyonzima yahinduye umupira imbere y’izamu, ariko Umunya-Cameroun Man Yakre ashyizeho umutwe umupira uca hanze gato y’izamu.

Ku munota wa 20, Nyirinkindi Saleh wa Etincelles FC na we yazamukanye umupira ariko ateye ishoti rikomeye Umunyezamu wa AS Kigali, Ntwari Fiacre awukuramo.

AS Kigali yakomeje gusatira izamu bidakanganye gusa ku munota wa 33, Rugirayabo Hassan yazamukanye umupira neza awuhindura imbere y’izamu Tshabalala azamuka neza ashyiraho umutwe atsinda igitego cya mbere.

Nyuma y’igitego cya mbere AS Kigali yahise ijya mu mukino bigaragara ndetse nyuma y’iminota itanu gusa, uyu Murundi Tshabalala yatsinze igitego cya kabiri, hari ku munota wa 37.

AS Kigali yakomeje gusatirana imbaraga nyinshi ari nako igenda ihusha uburyo bwinshi bw’ibitego. Igice cya mbere cy’umukino cyarangiye ari ibitego 2-0.

Etincelles yatangiye igice cya kabiri yiminjiriyemo agafu nyuma yo gukora impinduka, yinjizamo Ciza Hussein na Sadjati, gusa aba bombi ntibashoboye kuyigarura mu mukino kuko yakomeje kubura inshundura za Ntwari Fiacre.

Ku munota wa 75, AS Kigali yakoze impinduka Man Yakre na Haruna Niyonzima batanga umwanya kuri Tuyisenge Jacques na Nyarugabo Moïse.

Etincelles FC yakomeje gusatira ishaka uko yagombora ari nako ibona koruneri ariko ariko igitego kirabura burundu.

Umukino warangiye ari ibitego bibiri bya AS Kigali ku busa bwa Etincelles FC. Hussein Shabani Tshabalala ni we wigaragaje nk’umukinnyi uhanzwe amaso muri iyi kipe, ni nyuma yo gusoza umwaka ushize w’imikino n’ibitego 15 no kongera amasezerano ayikinira.

  Urwishe ya nka? Police FC yatangiye nabi

Mu yindi mikino yabaye kuri uyu munsi harimo uwa Sunrise FC yazamutse mu Cyiciro cya Mbere, yakiriye Police FC ndetse irayitsinda.

Iyi kipe itozwa na Seninga Innocent ikinira kuri Stade Golgota, aho iyo ihaboneye itsinzi ivuga ko yabambye ikipe yakiriye.

Police FC iheruka guhabwa Mashami Vincent ngo ayibere umutoza mukuru ariko akaba ataratangira izo nshingano, yatsinzwe igitego 1-0, cyinjijwe na Brian Ssali.

Uyu mukinnyi ni we wa mbere wanyeganyeje amazamu muri shampiyona kuko igitego cye cyabonetse ku munota wa 15.

Usibye mu Burasirazuba, ibyishimo byanasakaye mu Burengerazuba aho mu Karere ka Rusizi, Espoir FC yakiriye inatsinda Marines FC igitego 1-0, cyinjijwe na Samson Irokan Ikechukwu ku munota wa 21.

Biteganyijwe ko shampiyona izakomeza ku wa Gatandatu, tariki ya 20 Kanama 2022, mbere y’uko hafatwa akaruhuko abakinnyi bakajya mu mwiherero w’Ikipe y’Igihugu Amavubi wo kwitegura imikino ya CHAN 2023 izabera muri Algérie.

Imikino y’Umunsi wa mbere wa Shampiyona y’u Rwanda

Ku wa Gatanu, tariki ya 19 Kanama 2022

  AS Kigali 2-0 Etincelles FC

  Sunrise FC 1-0 Police FC

  Espoir FC 1-0 Marines FC

  APR FC VS Musanze FC [Stade ya Kigali: Saa 18:30]

Ku wa Gatandatu, tariki ya 20 Kanama 2022

  Bugesera FC VS Kiyovu Sports [Stade ya Bugesera: Saa 15:00]

  Rwamagana City VS Gorilla FC [Stade ya Ngoma: Saa 15:00]

  Gasogi United VS Mukura VS & L [Stade ya Kigali: Saa 15:00]

  Rayon Sports FC VS Rutsiro FC [Stade ya Kigali: Saa 18:30]

Kalisa Rachid ni umwe mu bakinnyi ba AS Kigali bagenderwaho mu kibuga hagati
Uhereye ibumoso: Mugheni Fabrice, Rugirayabo Hassan, Hussein Tshabalala na Juma Laurence bishimira kimwe mu bitego byatsinzwe na AS Kigali
Juma Laurence ni umwe mu bakinnyi bashya baguzwe na AS Kigali. Yakinnye umukino we wa mbere muri Shampiyona y'u Rwanda
Umunya-Cameroun Man Yakre agerageza gucenga abakinnyi ba Etincelles FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .