AS Kigali yanganyije na KMC mu mukino ubanza wa CAF Confederation Cup (Amafoto)

Yanditswe na Eric Tony Ukurikiyimfura
Kuya 10 Kanama 2019 saa 08:09
Yasuwe :
0 0

Ikipe ya AS Kigali yananiwe gutsindira Kinondoni Municipal Council FC yo muri Tanzania imbere y’abafana bayo, mu mukino ubanza w’ijonjora rya mbere rya CAF Confederation Cup, binganya na ubusa ku busa.

AS Kigali yakiriye uyu mukino kuri Stade y’i Nyamirambo, idafite bamwe mu bakinnyi b’inkingi za mwamba yaguze nka kapiteni wayo Niyonzima Haruna, Ndayishimiye Eric ’Bakame’ n’abanyamahanga bane yakuye muri Cameroun na Gabon.

KCM FC yaherukaga mu Rwanda mu kwezi gushize ikina CECAFA Kagame Cup, na yo yaje gukina uyu mukino ibura abakinnyi icyenda barimo Mugiraneza Jean Baptitse ‘Migi’ kuko bataboneye ku gihe ibyangombwa bibemerera gukina iri jonjora.

Amakipe yombi nta gihambaye yagaragarije abafana baringaniye bari baje kureba umukino i Nyamirambo, kuko nta buryo bwihariye bugana mu izamu bwabonetse ku mpande zombi.

Igice cya mbere cyaranzwe n’imipira y’imiterekano na koruneri, aho ubusatirizi bwa AS Kigali bwagowe n’abakinnyi b’inyuma ba KMC FC barimo Abdallah Mfuko, Ndikumana Yussuf na Boniface Maganga.

Habura iminota umunani ngo igice cya mbere kirangire, Vitalis Mayanga yagerageje ishoti rikomeye ku ruhande rwa KMC, umupira uca hirya gato y’izamu rya AS Kigali ryari ririnzwe na Bate Shamiru.

Ssentongo Farouq na Hassan Kabunda bananiwe kubyaza umusaruro uburyo babonye mu minota ya mbere y’igice cya kabiri, aho bashobora guhesha amakipe yabo gufungura amazamu. Uyu rutahizamu wa AS Kigali yakuweho umupira na Abdallah Mfuko mu gihe undi we, atageze ku mupira yacomekewe.

Nyuma y’iminota 10 amakipe yombi avuye kuruhuka, umutoza wa AS Kigali, Nshimiyimana Eric yakoze impinduka, akuramo Benedata Janvier wasimbuwe na Nshimiyimana Ibrahim kugira ngo ajye gufatanya na Ssentongo Farouq Saifi byasaga n’aho akina wenyine dore ko Nsabimana Eric yasubiraga inyuma gufasha abo hagati.

AS Kigali yasatiriye bikomeye mu minota ya nyuma, ibona uburyo burimo ishoti rikomeye ryatewe na Cyitegetse Bogarde, umupira uca ku ruhande rw’izamu mu gihe Nshimiyimana Ibrahim na we yananiwe gutsindira AS Kigali ku mupira watanzwe n’umunyezamu Juma Kaseja nyamara yari yamaze kuzenguruka myugariro wa KMC.

Umukino warangiye amakipe yombi aguye miswi, AS Kigali isigara isabwa kuzatsindira cyangwa ikanganyiriza muri Tanzania tariki ya 23 Kanama, ariko byibuze yinjije igitego.

Ikipe izakomeza hagati y’izi zombi, izahura n’izaba yakomeje hagati ya Proline FC yo muri Uganda na Masters Security Services yo muri Malawi.

Proline FC yo yatsinze ibitego 3-0 mu mukino ubanza wabereye i Kampala uyu munsi.

Abakinnyi babanjemo ku mpande zombi:

AS Kigali: Bate Shamiru, Rusheshangoga Michel, Latif Bishira, Songayingabo Shaffy, Ishimwe Christian , Ntamuhanga Tumaini (C), Benedata Jamvier, Kalisa Rashid, Nsabimana Eric, SSentongo Faruq Saifi na Cyitegetse Bogarde.

KMC FC: Juma Kaseja Juma (c), Boniface Maganga, Abdallah Mfuko, Yussuf Ndikumana, Amos Kadikilo, Ismael Gambo, Ken Mwambungu, Vitalisy Mayanga, Serge Nogues, Salim Aiyee na Hassan Salum Kabunda.

Umutoza wa KMC, Jackson Mayanja ashimira abakinnyi be barimo Nogues ubwo umukino wari urangiye
Rusheshangoga yishimiye kongera guhura n'abo bakinannye muri Tanzania
Bate Shamiru yafashe ifoto na Juma Kaseja ubwo umukino wari urangiye
Umutoza wa AS Kigali, Nshimiyimana Eric ashimira abasifuzi bo muri Djibouti bayoboye umukino
KMC yashimiye Imana ko inganyirije i Kigali
Nova Bayama, Benedata na Nshimiyimana Marc-Govin basaga n'aho batishimye ubwo umukino wari urangiye
Benedata Janvier ashaka uko atambuka hagati y'abakinnyi babiri; Boniface Maganga na Ndikumana Yussuf ba KMC
Umunyamabanga wa AS Kigali, Komezusenge Daniel areba uko ikipe ye yitwara
Abakinnyi ba Rayon Sports izakina na Al-Hilal Club ejo ku Cyumweru, baje kureba uyu mukino
Ndayishimiye Eric (iburyo) ntabwo yakinnye uyu mukino ikipe ye yahuragamo na KMC
Abanyamahanga bane AS Kigali yaguze nta n'umwe wabonye ibyangombwa byo kuyikinira muri iri jonjora rya mbere
Visi Perezida wa APR FC Maj.Gen.Mubaraka Muganga aganira na Perezida wa Rayon Sports Munyakazi Sadate
Umutoza wungirije wa Rayon Sports Kirasa Alain aganira na Mutarambirwa Djabil wari umwungirije akiri muri Kiyovu Sports
Perezida wa FERWAFA Sekamana Jean Damascene yarebye uyu mukino
Mulisa Jimmy uheruka gutandukana na APR FC yarebye uyu mukino yicaranye na myugariro w'Amavubi Bayisenge Emery
Nshimiyimana Eric yatoje umukino wa mbere w'irushanwa nyuma yo kugaruka muri AS Kigali mu kwezi gushize
Umutoza wa KMC, Jackson Mayanja atonganya abakinnyi be
Bishira Latif ni umwe mu bakinnyi bitwaye neza ku ruhande rwa AS Kigali
Rusheshangoga Michel ahanganiye umupira na Hassan Salum Kabunda wa KMC FC
Abafana ba AS Kigali bari babukereye hamwe n'ingoma zabo za gakondo
Abafana ba Rayon Sports na APR FC bunze imbaraga, bajya inyuma ya AS Kigali
Kubura igitego byatumye bamwe bataha batishimye
Ndikumana Yussuf mu kirere atanguranwa umupira na Nsabimana Eric mu gihe Ssentongo Saifi yari ategereje
Ishimwe Christian wakinaga umukino wa mbere w'irushanwa muri AS Kigali, akurikiye umupira
Nsabimana Eric atakaza umupira wifatiwe na Ken Mwambungu
Serge Nogues yari yambaye umwenda uriho numero zandikishije sparadra nyuma y'uko lisiti yatanzwe yariho ko yambaye 19 kandi ari 33
Ssentongo Farouq yagowe n'ubwugarizi bwa KMC hamwe n'umunyezamu Juma Kaseja
Amakipe yombi azisobanura mu mukino wo kwishyura uzabera muri Tanzania mu byumweru bibiri biri imbere
Abakinnyi 11 babanjemo ku ruhande rwa AS Kigali
Abakinnyi babanje mu kibuga ku ruhande rwa KMC FC
Ntamuhanga Tumaini na Juma Kaseja, ba kapiteni ku mpande zombi hamwe n'abasifuzi b'abanya-Djibouti bayoboye uyu mukino

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza