00:00:00 IGIHE NETWORK KN KINYARWANDA EN ENGLISH FR FRANCAIS

AS Kigali ishobora gupapura Rayon Sports Sumaila Moro kubera ideni ry’umutoza

Yanditswe na Ntare Julius
Kuya 2 Mutarama 2023 saa 11:11
Yasuwe :

Rutahizamu wa Etincelles FC, Umunya-Ghana Sumaila Moro, arifuzwa n’amakipe abiri akomeye mu Rwanda ari yo Rayon Sports na AS Kigali, nyuma yo kwitwara neza mu mikino ibanza ya shampiyona, agatsinda ibitego icyenda mu mikino 15.

Mu mwaka ushize nibwo Etincelles FC yasinyishije uyu rutahizamu wakiniraga Eleven Wonders.

Shampiyona yatangiye tariki ya 19 Kanama 2022 abantu benshi badaha amahirwe Etincelles FC ko yakwitwara neza ku makipe akomeye, ariko yatsinze Rayon Sports ibitego 3-2, iganya na APR FC igitego 1-1.

Uwari uyoboye ubusatirizi bwatumaga aya makipe arara adasinziriye ni rutahizamu Sumaila Moro, watsinze buri kipe ikomeye bahuye.

Ku munsi wa karindwi wa shampiyona, ku mukino Etincelles FC yakiriyemo ikanatsinda Mukura VS ibitego 2-1 kuri Stade Umuganda tariki 30 Ukwakira, ni bwo ubuyobozi bwa AS Kigali bwatangiye kugenda runono Moro.

Amakuru yemeza ko Nshimiye Joseph, umufana mukuru wayo wanabaye Umunyamabanga mukuru, azi byinshi kuri uyu rutahizamu kuko ari we wari intumwa yagarukaga igatanga raporo yiganjemo inshundura uyu rutahizamu yabaga yanyeganyeje.

Ubuyobozi bwa AS Kigali bwateye intambwe buganiriza ubwa Etincelles FC ku buryo bwagura uyu musore bwashimye, ari naho ibiganiro byatangiriye, ndetse ubu biri mu nzira nziza.

Gusa ikibazo cy’amikoro cyatumye haba gutinda gato kugira ngo Kapiteni w’Amavubi Haruna Niyonzima abanze yerekeze muri AlbTa’awon. Byasabaga ngo iyi kipe yo mu Barabu yishyura AS Kigali, na yo ikohereza amafaranga kuri konti ya Etincelles FC.

Nyuma gato y’umukino Etincelles FC yanganyijemo na APR FC igitego 1-1 cyanatsinzwe na Moro, AS Kigali na Etincelles FC zasinyanye imbanzirizamasezerano nk’intambwe ntakuka yemeza ko bifuza uyu rutahizamu kuri miliyoni 20 Frw.

Mukeba Rayon Sports itaritaye ku gukurikirana Moro mu minsi ya mbere ya shampiyona, yatangiye kubona ubukaka bwe ubwo yayitsindaga ibitego bibiri muri bitatu yatsindiwe i Rubavu, umukino wibukwamo imvururu nyinshi zawuranze.

Ibiganiro ni bwo byatangiye, gusa ntibyashyirwamo imbaraga nko ku ruhande rwa AS Kigali, cyane cyane ko Murera yari ifite ibisubizo byinshi ku ruhande rutaha izamu birimo Luvumbu Héritier, Youssef Rharb ndetse na rutahizamu ushobora kuzana n’uyu Munya-Maroc mu gihe FERWAFA yaramuka yemereye iyi kipe kongera umubare w’abakinnyi, bakava kuri 30 bakagera kuri 33.

Tariki 30 Ukuboza, ku biro bya Rayon Sports ku Kimihurura habaye ibiganiro hagati y’ubuyobozi n’ushinzwe gushakira uyu mukinnyi ikipe, Emmy Fire, gusa ntacyo byatanze.

Muri miliyoni 23 Frw yaba Etincelles FC na Emmy Fire bifuza kuri uyu rutahizamu, Rayon Sports irifuza kuba itanzeho igice cya miliyoni 15 Frw.

Uruhande rwa Moro rwasabwe ko rwasonera iyi kipe ikabanza ikishyura ideni riyiraje ishinga ifitiye umutoza Jorge Paixão, hanyuma ikindi gice cya miliyoni 8 Frw bakazacyishyurwa nyuma. Ni ibintu aba badakozwa.

Rayon Sports irajwe ishinga no kwishyura amafaranga miliyoni 45 Frw FIFA yayitegetse nyuma yo gutsindwa urubanza rwo gusezerera uyu mutoza mu buryo bunyuranyije n’amategeko.

Tariki 17 Ukwakira 2022 nibwo Murera yahawe igihe ntarengwa cy’iminsi 45 yo kuba yishyuye uyu mutoza, gusa cyararenze. Yamusabye gukomeza kuyihanganira mu gihe igikomeje gushaka ubwishyu.

Hari kandi amafaranga yo kwishyura Luvumbu wasinye ku wa Gatandatu, tariki 31 Ukuboza 2022, Youssef Rharb uzaza mu cyumweru gitaha na rutahizamu bashobora kuzana nk’intizanyo, ibiganiro biramutse bigenze neza.

Ubuyobozi bwa Rayon Sports busanga uyu ari umuzigo uremereye ku buryo utatuma bishyura Sumaila Moro miliyoni 23 Frw imbumbe, ahubwo yaba ahawe igice.

AS Kigali yo iracyategereje ko Al Ta’awon yaguze Niyonzima Haruna yishyura hanyuma ikarangizanya na Etincelles FC, Sumaila Moro akerekanwa nk’Umujyamujyi.

Rutahizamu Sumaila Moro wa Etincelles ashobora gutera umugongo Rayon Sports kubera ideni ry'umutoza Manuel da Silva Paixão Santos, akerekeza muri AS Kigali
Moro yatsinze amakipe akomeye mu Rwanda arimo Rayon Sports na APR FC
Umutoza Manuel da Silva Paixão Santos yatsinze Rayon Sports mu rubanza rwakiranuwe na FIFA, agomba kwishyurwa miliyoni 45 Frw nubwo ubwishyu bwarengeje igihe cyatanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .